Sako leto zazvedimo nekaj novoga
Makar je več vejč od osemdeset let minulo od Drugoga rata nikak nebremo zazvediti kaj se je v tua ratna leta pripetilo prinas v Međimorjo. Znuomo da so mam 1941. leta posle Nemcov ili pak Švabov k nam v Međimorje došli sosedi Mađari, švapski kompanjoni, i po našemo hataro so hercuvali se do aprila 1945. leta. To se znua i nikaj drugo. Nikak nebremo točno zazvediti kuliko je naši ljudi ostalo na fronto, kuliko jiv je ostajlo svoje nejvečpot mlade živote po logorima v Mađarskoj, Austriji ili pa Švabiji, Poljski, kuliko je Međimorcov završilo po drugim frontima kam jiv je ratni vihor odvlekel, očem reči odnesel. Sako malo se pred nas mečejo nekše nove brojke, nekše drugačeše, kak ovi v Jasenovco i kuliko vidimo nigdar se ne bode točno zazvedilo kuliko je Međimorcov i de ostajlo svoje kosti, svoje živote v borbi protiv okupatorov. Ruon tak se ne bode nigdar zazvedilo de je završilo onih nekaj meje od jezero ljudi šteri so preživeli rata, a neso preživeli dok so došli „oslobodioci“ 1945. leta, očem reči de so završile žrtve porača jerbo se zna da so to bile žrtve komunizma, a o tem žrtvama se je 45 let ne smelo niti pisnuti, a ne kaj bi glasno pital što jiv je pobral i kam jiv je otpeljal. Na našemo Staromo grado je ploča za se one borce šteri so bili v po reštima Staroga grada ili pak so jiv Mađari likviderali, a nikši znamen je na za one šteri so posle majuša 1945. leta završili po reštima Staroga grada, a posle so jiv zakopali na Sepo polek Gornjega Hraščana ili pak v Ksajpi polek Svete Jelene (čitaj: Šenkovca). Ruon tak so prešle i žrtve porača v Štrigovi ili pak vu Kotoribi. Osemdeset let je minulo od teh dnevov dok so nepodobni završili v kajkakšim grabama i denes, to moremo slobodno reči, skorom nišči za jiv ne pita jerbo posle tulikših let več nemajo niti rodbino med živima.
Več bi bila skradja vura kaj bi se to se zazvedilo, a ne kaj saki ima nekšo svojo istino i poveda sam ono kaj mo paše, a se drugo se skrivle od svetlosti dneva kak zmija noge. Najgerek sam, jako sam najgerek je li bodemo igda to zazvedili? Ne verjem! Zakaj? Pak dok se denes spominamo o Domovinskomo rato šteri je završil pred 30 let pak se tu nebremo nikak dospomenuti kaj se je pripetilo, a si smo bili svedoki, kak se unda bode za Drugi rat de ga skorom ne več niti jenoga svedoka. A te šteri so je, nek se ne srdijo, saki den se meje znajo i se se meje zmislijo kak je to unda bilo!
Zakaj se ne sprovodijo odluke čakoskoga Grackoga veča?
Za pol leta bode deset puni let otkak je čakosko Gracko veče doneslo odluko kak bode počasni građanin Čakovca Ljubo Kuntaričov, šteri je v oktobro 2016. leta odišel k Božeko na račun vu svoji 92. leti, mel svojo vulico. Dok je Ljubo pred nekaj vejč od deset let preslavil v Čakovco svojega 90 – toga rođendana unda so ga Čakovčanci proglasili svojim počasnim građaninom, a on je svojo herbijo ostavil čakoskomo muzejo tak da ve tam Ljubo ima svojo sobo. Neje se Ljubo još dugo „klataril“ po ovo našemo sveto i Božek ga je pozval k sebi, čakoski gracki oci so mo bili na sprevodu vu Voloskom polek Opatije, a kak sam več rekel još isto leto je Gracko veče doneslo odluko kak bode Ljubo, nejbolši inženjer med glazbenikima i nejbolši glazbenik med inženjerima, mel svojo vulico čim se za to pokaže prilika. Moramo priznati da je Čakovec vu zadji deset let otpral hajdi vulici, ali kuliko vidimo pozabilo se na Ljubija. Da je Ljubo ne nikaj vredel ne bi bil počasni građanin Čakovca, a ak pak je vredil, a vredil je, unda mo tre dati vulico kak so mo Čakovčanci obečali i kak je ondašje Gracko vječe to odlučilo. Brzčas se zna što se mora brigati kaj se bodo sprovodile odluke grackoga vječa.
Kaj očejo Družba, Garda i Matica?
Znuomo da so Družba „Brača Hrvackoga Zmaja“ Zrinska garda i Čakoska Matica tu prinas kaj se brigajo za kulturo i povjest i da zmišljuvlejo ljude na ono kaj se je pripetilo i kaj se nej pozabili događaji šteri so bili važni za našo povjest, Verjem da te tri udruge prinas v Međimorjo obavljajo svojo zadačo onak kak to dragi Božek zapoveda i nedajo kaj bi se nekaj zabilo jerbo ljudi šteri pozabijo svojo povjest bodo morali znova iti vu prvi razred. Obrnite se okoli sebe i bodete vidli kuliko so sam spomeniki podigli, kuliko spomen – ploči postajli, kuliko so knigi napisali ili pak donesli na svetlo dneva. Dok članovi te udrugi mislijo da bi se nekaj trelo napraviti, spremeniti, postaviti unda to predložijo onima šteri držijo cugle vlasti vu svojimi rukami i šteri unda velijo je li to more iti ili pak nebre. Tak je bilo z Fratarskim trgom de so predložili kaj bi se on zval Trg blaženoga Lojzeka Stepinca ili pak glavni čakoski trg za šteroga so predložili kaj bi se zval Trg Zrinskih jerbo je grad Čakovec grad Zrinskih i unda je ne nikaj čudno kaj bi se i glavni trg tak zval. Ali o tomo se je ne nikaj čulo i gracki oci so ne nikaj rekli. Kak veli moja teca Franca: ne me brige, ali štela bi znati po šteroj je to republiki čakoski gracki trg dobil ime? Pred par dni se je počelo pisati po cajtungima kak je blaženi Lojzek Stepincov još navek kontraverzna povjesna ličnost makar je blaženik??? Ruon tak znuomo da je drug Tito proglašen od Evrope za ratnoga zločinca pak još ima dosti vulici po Međimorjo. Kuliko vidimo za jenoga vredijo jena pravila, a za drugoga druga.
Zrinska garda ipak nekaj vredi!!!
Verjem da si Međimorci znajo kak mi imamo Zrinsko gardo. To so oni fest dečki z šterim se mi štimamo kak so fest i kak imajo fajne obleke. Več smo se privčili da je Zrinska garda tam de se nekaj važnoga za Međimorje događa kaj se povjesti, kulture ili pak branitelov dotikavle. Dosti je spomeniki Garda po Međimorjo postavila, a nešterne i vum Međimorja kak napriliko spomenik Nikoli Šubičo Zrinskom v Sigeto ili pak spomenik hrvackim junacima i velikanima Petro Zrinskomo i Frano Krsti Frankopano v Bečkomo Novigrado. Garda je shodila kaj se 30. april svetkuje kak spomendan na Petra i Frana vu celoj Lepoj našoj. Za ovo leto je Garda predložila, a župan i večniki Županiske skupštine so se složili kaj ovo 2026. leto bode leto Nikole Šubiča Zrinskog jerbo ovo eto obslužavlemo 460 – to obletnico Sigecke bitke. Ruon tak ovo leto Zrinska garda obiležavle 25 let otkak so jo čakoski matičari zafremali. Ljudi moji, pak je to ne makar kaj, ipak je to frtalj stoletja. Dečko ili pak puca šteri so se narodili ono leto dok je Garda zafremana do ve so več završili faksa, oženili se i imajo bar dvoje dece. Ak so zgrabni i ak jim je lepo delati posla posle šteroga se dobijo deca.
Jožek Radnik