Herbija naša sagdašja
Odnegda je tak bilo prinas v Međimorjo kaj je glavni pre hiži bil on što je bil nejstareši jerbo ga več generaciji živelo na grunto. No, ak pak so na grunto živi bili i stara mama i stari japa unda je se bilo onak kak je stari japa rekel, ak je to potvrdila stara mama kaj znači da so stara mama (jerbo oni so bili vi) bili glavni pre hiži, očem reči, na grunto makar se je znalo i vidlo što je hlače nosil. Ak je stari japa (čitaj: japica), kak je to i nejvečpot bilo, odišel predi stare mame (čitaj: mamice) k Božeko na račun unda se herbija delila sima jednako. A kak to jednako, onak kak je mamica rekla. Ako pak je bilo drugač unda se je z japicom dalo dospomenuti ako ne pre prvomo frakleco žganice unda pak pre tretji litri graševine i štrtomo cigaretlino. Japica je navek bil za spominek i za dogovor jerbo jemo je več čuda ne trelo i nejvažneše mo je bilo kaj mo je želodec bil namireni ne tuliko z jestvinom kuliko mo je pijača, i to dobra, bila važna. Kak je i o tomo pisalo v ovaj našaj novinaj, nevole so došle k hiži dok so se sini pooženili i dok so snehe došle k hiži. De so mamica bili pre hiži tu so snehe ne vupale i ne mogle pokazati roge, ali ak je japica držal v svojimi rokami cugle familijarne vlasti unda so se snehe micolizile okoli japice, a japici je to pasalo i pomalem je se bilo onak kak je sneha štela, a japica je navek mel litra i vodo ak ne na stolo unda pod stolom pre prvi stolovi nogi. I dok je japica odišel k Božeko na račun unda je nejvekši falat herbije dobil sin šteri je bil na grunto, a si ostali so dobili jednako od one polovice štera je ostala dok je sneha z svojim možom (čitaj: sinom) na sebe prepisala se ono kaj joj je pasalo.
Kak se to veli, lefko se brati dospomenejo, ali dok snehe dojdo kcoj unda to se ide znova, se ide na revizijo. Nebre nikak biti dobro ono kak so se moški dospomenuli ak žene ne dajo svojega blagoslova. Kak god moški držijo do svoje reči, ne znam je li ste vi da kaj naprajli kontra vole vaše bolše polovice i pitam vas lepo kak ste dugo zdržali kaj ste to ne morali spremenili? Verujte mi, to ne muoči zdržati. Lefko je pet – šest pot oditi v krčmo i tam si dehnuti, ali kak god dugo ste v krčmi jempot morate dojti dimo jerbo se krčma zapira, a unda tre odgovarjati na sa ona pitanja na štera čovek nebre odgovoriti dok je trezen, a ne kaj bi mogel dok dojde z krčme. Tak vam je to i zbog radi toga nejveč pot dohaja do svaje. Kak to rešiti? Do ve je na to ne uspel odgovoriti niti profesor Baltazar, niti stari dobri Eistein, tak da nam jedino ostaja kaj bode to naprajla umjetna inteligencija? Najbrž bode ako žene (snehe, neveste) poštuvlejo ono kaj umjetna inteligencija veli. Ne bi ja del roke v ogenj da bode z ženami i umjetna inteligencija došla na kraj. A do unda bodo i dale svaje okoli herbije štero nam naši stareši ostavijo! Hajdi pot bi čuda bole bilo kaj bi se ono kaj imajo odnesli z sobom!
Je li bodemo dobili precednika Vrhovnoga soda?
Sima nam je poznato kak je zadji precednik Vrhovnoga soda Lepe naše, Radovan Dobronič, predi nekaj vejč od leto dni odišel k Božeko na račun i jegova je precednička fotelja ostala prazna. Kak sam rekel duže od leto dni se nebrejo dospomenuti vladajuči v Banskim dvorima i ovi na Pantovčako što bode popunil prazno precedničko foteljo? Ovi Plenkovičovi v Banskim dvorima z prstom kažejo na one na Pantovčako kak so ne za dogovor i kak sam rivlejo svojega kandidata, očem reči, kandidatico, a ovi Milanovičovi na Pantovčako se drvje i kameje hičejo na Banske dvore i na Sabor kak se žnjimi nikaj ne muoči dospomenuti, ne sam da se ne muoči dospomenuti nek se ovi v Banskim dvorima niti se nečejo o tomo spominati ak je ne onak kak so si oni to pregruntali. I ve, prosim vas lepo, kaj nek mi obični smrtniki, mi mali ljudi znuomo što je kriv kaj je fotelja vrhovnoga soca Lepe naše tak dugo prazna? Morem vam reči da o tomo niti teca Franca neče nikaj reči sam je prefrigano stiha, a vidim da se joj mustači smejejo kaj znači da nekaj zna, da si nekaj grunta, ali neče nikaj reči. Nekaj sam mel za čuti da se tu bode nekaj pripetilo, ali kaj, to vam ne bi znal reči? Ak smo tak dugo čakali unda bodemo još malo počakali pak se najbrž bode nekaj pripetilo ve posle zmržjenih svecov v majušo?
Navek so bile stiske okoli fotelje precednika Vrhovnoga soda
Odnavek so bile stiske okoli precednika Vrhovnoga soda i jegove fotelje, no, ne ruon okoli fotelje nek okoli čoveka šteri je sedel v precedničkoj fotelji. Verjem da vam je sima poznato kak je vu toj „vročoj“ fotelji jeno vreme sedel i naš prvi međimorski župan Marijan Ramuščakov. On je bil precednik Vrhovnoga soda v ono vreme dok je Božek pozval k sebi na račun prvoga hrvackoga precednika Franceka Tuđmana tak da je dočakal novo vlado na čelo z Ivicom Račanom, štera je pobedila na izboraj posle Tuđmanove smrti. Dok so SDP-ovci i jiva družina prijeli cugle vlasti vu svoje leve roke spremenili so se one glavne šrajfe hrvacke države štere je HDZ postavil pak je tak na red došel i precednik Vrhovnoga soda. Ali Vlada ga nebre zmeniti, a niti pak Sabor bez dvotrečinske večine, štero so ne meli, a gospon Ramuščak je ne štel som oditi. SDP-ovci so, skupa z Mesičom, gruntali i premišlavali kaj naprajti i zmislili so se,: morali so premeniti Ustava i dok so to naprajli unda je i Marijan moral spakerati kufre i poslali so ga za veleposlanika v Češko. To sam vam štel reči kaj ne bode nešči rekel kak sam HDZ-e furt nekaj meja, a ve vidimo da so niti SDP-ovci ne nikaj vredneši. Vlast je slast, veli teca Franca, dok se jempot čovek dočepa vlasti nebreš ga vugnuti niti z bagerom, a dok čovek prime cugle vlasti v roke sega se rešavle što mo smeta. Da bi političar vodil računa o tomo po čijim glavam gazi dok ide gori jerbo bode te iste glave zišel i dok ide doli, ali dok se ide gori nišči si ne grunta kaj bi se to moglo pripetiti kaj bi moral jenoga dneva iti i doli. Bar ne tak fletno!
Jožek Radnik