Oslobođenje ili nova okupacija???
Dok dojde mesec maj znova dohaja do svaje med našim političarima jerbo se levi i desni nebrejo nikak dospomenuti je li se v majo Lepa naša oslobodila okupatorov ili pak so jene (fašiste) zamenili drugi (komunisti). Naši levičari, očem reči antifašisti (čitaj: komunisti) nas furt uvjeravlejo kak je 8. maja Zagreb oslobođen, a desničari nas vučijo kak so te dneve Hrvati podnesli nejvekše žrtve (cirka okoli 10.000 likviderani sam v Zagrebo) i to od partizanov vu štere so bili preoblečeni četniki, a vodil jiv je ondašji general Kosta Nađ i po naputko Ljubičice bele so likviderali se one šteri so jim se našli na poto i šteri so jiv krivo pogledali. Kak to lepo veli Marcel Holjevac v 7 dnevno da se mi ne bi morali boriti protiv i oslobađati od JNA 1991. leta da nas je ta ista JNA pravzaprav oslobodila 1945. O tomo oslobađanjo 1945. leta se lepo i točno veli Kaja Kallas iz Estonije: „9. svibnja se ne može slaviti kao dan pobjede zbog zločina koji su počeli nakon Drugog svjetskog rata, a koji su za mnoge zemlje, uključujući i Estoniju, značili nastavak okupacije, a ne oslobođenja. Da je Staljin (a kod nas Tito, šteri je jako štimal Staljina) nakon što je rat završio, našim državama rekao da možemo ići sa svojom slobodom i neovisnošću i državom kakvu želimo, tada bismo i mi taj dan mogli slaviti kao dan pobjede. Budući da su tada u našim zemljama započela zvjerstva, nemoguće je slaviti ga kao Dan pobjede.“ Se jasno, tu se nema kaj dodati, a niti pak zeti fkrej. Se isto, ista škola, kak navučitel tak i učenik, kak v Estoniji tak i v Lepoj našoj!
Za te dneve v majušo jeni hodajo vužigat „Trnjanske kresove“, a drugi idejo od jame do jame, od groba do groba, po Križnomo poto prema Blajburgo pak nazaj tijam do Hercegovine i vužižejo sveče onima kaj so preživeli rata, a neso preživeli dolazak partizana, očem reči komunista. Sigdi je v majušo 1945. leta rat završil sam prinas je počel. Več sam tu parpot pisal o tomo kak je zadji popis pučanstva na hataro Lepe naše predi Drugoga sveckoga rata bil 1931. leta, a prvi posle rata je bil 1948. leta i kak je 1948. leta bilo Hrvata skorom 900 jezer meje nek 1931. leta, a Srba je na tomo istomo hataro bilo nekaj malo meje od milijon vejč. A furt se pripoveda kak so ustaše v Jasenovco potukle za vreme Drugoga rata milijon Srba. Ne znati de se zmogel te milijon Srba 1948. leta, a de pak se je zgubilo, očem reči, kam je zginulo 900 jezer Hrvatov. Več je skradja vura, posle osemdeset let, kaj se zazvedi kak so se v majušo, junjušo, a i posle punile sakefeke jame, grabe i rovovi de so nestajali Hrvati šteri so se našli na poto pobjednikima. Englezi so priznali kak so se one šteri so došli do Blajburga razoružali i prepustili preoblečenim partizanima, a partizani nikak nečejo priznati da so jiv prevzeli. Još 1945. leta se je zazvedilo, a posle se je to furt skrivalo kak so hrvatski partizani bili korisne budale onih velikosrpskih šteri so provodili komunističko represijo i delali zločine nad Hrvatima kak v Lepoj našoj tak i po Sloveniji, a i dale.
Zazvedilo se je za još jeno Hudo jamo
Oni kaj se saki tjeden špancerajo po Sljemeno zazvedili so od stareših ljudi kak tu polek nas postoji Sljemenska Huda jama. Kak velijo oni šteri so bili deca pred osemdeset let „oslobodioci“ Zagreba so v majušo 1945. leta, posle kak je rat završil, v njo narivali kaj likvideranih, kaj živih niti se ne zna točno kuliko Zagepčancov i posle toga so prirodno špiljo zabetonerali i na se zadje so tu gori zbetonerali vojnoga objekta i postavili mrtvo stražo kaj ne bi nekomo palo na pamet kaj bi tu kaj zroval ili pak skopal. Tu so deca i vnuki zločincov još niti jempot ne vužgali kresove, a nedaj Božek sveče. Ve dok je tua istina došla na svetlo dneva toplo se nadjam da se bode i tua „Huda jama“ otprla i da se bodo prebrojili grehi, očem reči, žrtve „oslobodioca“ Zagreba. Sljemensko Hudo jamo je obišel i Roman Leljak tak da on ne bode mel mira dok ne skopa istino o likvideranim i zabetoneranim žrtvama „oslobodioca“ Zagreb kak je to napravil z Hudom jamom v Deželi de so skopali, kak znamo, tri jezere žrtvi, štere so bile žive zazidane v rudniko Barbarina rov!
Antifašizam se pokrivle
Kaj god naši antifašisti delajo v prvim redima je Sandra Benčič. Na jenim plečima, na plečima zagrebečkoga grackoga načelnika Tomeka Tomaševiča i na kasi grada Zagreba počivle politička platforma Moremo. Kak sam rekel Tomek je gracki načelnik glavnoga grada Lepe naše zebrani več po drugoč, a Sandra pak je saborska zastupnica ruona tak v drugomo mandato. Ona je završila Pravnoga fakulteta, tak nam je bar rekla, študerala je „malo duže“ i to osemnajst let, ali je do dneva denešjega još nišči ne videl jeno diplomo niti ovi na fakulteto, a niti pak jeni doma tak da bi več bila skradja vura kaj bi jo vidli i kaj nej morali pripovedati kak se kinči z ljuckim perjom. Kak sam več rekel, Sandra je seposot de jena platforma Moremo bilo kaj dela: bila je vu Vukovaro i hitila venca v Dunav za poginule za one z druge strane, ali ga je v koloni sječanja ne bilo, bila je na prosvjedima protiv Thompsons, protiv „klečevaca“, za jeno državo i jeden jezik, na Jelačič placo, vužigala je „Trnjanske kresove“ i kak to veli „Hrvatski tjednik“ na listeko je onih šteri so plačeni Soroševim penezima, Se se to zna, a ona je štela biti precednica Lepe naše, a predložili so jo jeni pajdaši z platforme Moremo. Da je protiv pozdrava ZDS to vam niti ne moram govoriti, ali zato se preveč ne buni protiv pozdrava SFSN ili dok nešči maše zastavom negdašje države, hiče srpe i hamre ili pak fali Ljubičico belo. I dok nekomo tre nakeliti sakefele etikete tu je prva s pajdašicom Dalijom, a ve dok Josip Križ tvrdi kak je jeni japica likvideral čoveka i prisvojil jegovoga grunta unda se je pobunila. Nek vidi kak je to dok so mediji protiv je makar jiv je bilo malo oni šteri so prenesli ono kaj je Josip Križ rekel. Nebremo znati kakši je bil jeni japica, ali ruon tak ne znamo kak je do toga grunta došel? Ali niti Sandra čuda toga ne zna kaj pripoveda makar je jako dugo v školo hodala, a još duže študerala.
Jožek Radnik