Pomočni sodec ne maše, VAR fučka v opsajdo si
Sima nam je poznato da so naši Vatreni završili svojega pota na Sveckomo labodoritaškomo prvenstvo v Ameriki jerbo so nas ne pobedili Portugalci kak to seposot piše nek so to naprajli soci kak ovi na igrališčo, tak ovi vu VAR hiži, a i si drugi šteri so jim dali svojega blagoslova kaj to morejo napraviti. Verjem da smo si gledali utakmico naši Vatreni protiv Portugalcov makar je bila v dve vure v noči. Najbrž smo gledali si mi šteri smo navijali za naše, šteri smo veruvali da so dobri i da bodo pobedili Portugalce kak god oni jaki i dobri bili i da bodemo odišli dale. Oni so bili dobri, ali mi smo bili bolši, a unda so cugle rezultata vu svoje roke zeli sake fele soci, nekša nova pravil i na se zadje so Portugalce zrivali dale, a nam so dali karte za dimo.
Prvo poluvreme tekme protiv Portugalcov bilo je trdo i napeto i rezultat je na pol tekme bil 0:0. Na poluvremeno si je Dalič pregruntal nešterne momente labodoritaške tekme z prvoga poluvremena (to se zove taktika) i zmenil je nešterne igrače i voda je počela teči na naš melin. Fletno smo zabili gola i poveli 1:0, a gola je zabil jeden „japica“ v našoj reprezentacija Ivek Perišičov i otškrhnul nam je vrata četvrtfinala. Tak smo si to mi pregruntali, ali vrag nigdar ne spi. Negda so soci meli črne oprave kakša bi ovomo soco Eskaso z Norveške i pasala jerbo je bil pokvarjeni kak sam črni vrag. Bil je dva metre od našega Nikole Vlašiča dok je napravil običnoga faula kakši ga na sakoj tekmi po deset – dvajsti, ali je odišel pogledati VAR snimko i tam je dobil naputke kak je to elver. A si znuomo da je socova na tekmi prva i zadja tak da se je elver moral strelat. A što ga je strelal drugi nek Cristiano Ronaldo. A kak ga je strelal – to te ja pitam? Zel si je pol zaleta, a na pol si je zel velikoga odmora i počakal je dok se Livakovič hiti vu jeno strano, a unda je on fritnul labodo v drugo strano kaj je značilo da so Portugalci poravnali rezultata. Naši Vatreni so igrali odlično tak da nam je sodec poništil još tri gole jerbo so naši igrači bili v opsajdo kaj znači da se je skorom furt igralo na Portugalovoj polovici. Ipak so Portugalci, tu i tam, naluknuli na našo polovico i tak so došli do kornera z šteroga so nam zabili gola v 94.minoti. No, naši dečki so ne hitili puške v kuruzo nek so i dale igrali dobro i saki smo se čas nadjali kak bodo poravnali rezultata jerbo je još ne preveč cajta ostalo do kraja. Čemo smo se nadjali to se je i pripetilo črez deset minot. Gvardijol, šteri je došel nutri pred deset minot je z jene lepe akcije fritnul lopto v gol i si mi skupa z našim labodoritašima smo se veselili rezultato šteri bi nam donesel produžetke, ali pak je „črni vrag“ (čitaj: udruženi neprijateljski pothvat: sodec – VAR) zmislil opsajda jerbo se je naš labodoritaš Igor Matanovič počesal na kefico i jena las mo je štrajfala labodo tak da je zbog radi toga Pašalič bil v opsajdo i gol je ne vredil. Zabadav so naši nejstareši igrači, Modrič i Perišič prepovedali soco kak je se vredo, ali kak bi moj pajdaš Moker rekel labodoritaška mafija je ostala pre svojemo, Portugalci so izveli opsajda, Gvardijolov gol je ne vredil, a cajta ga več ne bilo kaj bi se rezultat popravil tak so Portugalci, na se zadje, odišli dame, a naši Vatreni so se vrnuli dimo.
Što nam je kriv kaj smo mali???
Kak je rekel izbornik, Zlatko Daličov, mi smo premala zemlja kaj bi tripot za redom došli do polufinala ili pak finala. V Rusiji je nišči ne na nas računal, a dok smo došli do elverov unda nam je več nišči nikaj ne mogel ak ne računamo kak so nas vu finalu mam spustili na zemljo i mam so soci pomogli Francozima kaj ne bi slučajno jedna tak mala država kak je naša bila svecki prvak v labodoritanjo. V Kataro je bilo drugač, tam so nam porihtali kaj smo išli na Brazil i nišči se je ne nadjal kaj bi naši Vatreni mogli vum hititi Brazila. Verjem da se zmislite kak je Brazil od prvoga poluvremena pak se do 85.minote vodil 1:0, a unda se je skazal Bruno Petkovič i poravnal je rezultata, a dok so se streljali elveri naši so dečki (čitaj: Livakovič) bili bolši i mi smo odišli dale. Istina Božek dok smo došli igrat v polufinalo protiv Argentine još smo se niti ne hapili več je Argentina vodila 2:0, za saki slučaj, ali smo ipak v tekmi za tretje mesto bili bolši od Maroka i dečki so došli dimo z bronastim želencijama zlatnoga sjaja. V Ameriki smo, ruon tak, igrali lepo i dobro makar smo spremenili dosti igračov, ali smo mi premali kaj bi tripot za redom, kak je Dalič rekel, osvajali želencije.
Rekel je župnik jedne čakoske župe: – Mi šteri smo drukali za naše Vatrene smo se preslabo ili pak nikak ne molili kaj bi naši labodoritaši došli do kraja, a oni šteri so drukali kaj naši čim predi odido dimo oni so se bole molil!. Ne znati je li oni znajo moliti, ali kuliko vidimo ipak je došlo na jivo jerbo da so vatreni pak došli dimo s želencijom pak bi Thompson i Hrvacke ruže popevali na zagrebečkomo Jelačič placo, a to škodi jetri zagrebečkih purgerov!
To nam je odnekod poznato!!!
Naši rokometaši so 2012. leta na Evropskomo prvenstvo štero je bilo odigrano v Beogrado zgubili v polufinalo od Srbije i to tak kaj so soci dali svoj veliki prilog tak da je Srbija igrala vu finalo protiv Danske i zgubila 21:19, a naši „Kockasti“ so pobeili Španjolsko 31:27 i dimo donesli bronasto želencijo. Posle zgube v polufinalo nejbolši naš i svecki rokometaš Ivano Balič je rekel: – „Novo leto (prvenstvo je bilo v januaro), novo prvenstvo, ali se po staromo. Navek nas soci pokradejo i zemejo nam pobjede. Ak se nikaj ne bode promenilo unda se nek napre dospomenejo kladionice i soci i nek dojdo oni šteri bodo nekaj osvojili, zdignejo pehare i odidejo dimo kaj bodemo mi drugi dohajali i delali stroške.“
Mi, Lepa naša, smo hajdi let meli nejbolše rokometne soce na sveto, Matijo Gubico i Borisa Miloševića, ali oni so sudili onak kak je bilo, a ne onak kak so jim rekli pak so jim zmislili nekše falinge i vugnuli so jiv. Ak glavni EHF (Evropska rukometna Federacija) ili pak IHF (Svecka) nekaj veli unda to tak mora biti, a ne kaj bode svecki prvak nešterni što si je to ne zaslužil ili pak nema dosti penez (igrači so ne važni) kaj bi došel do te pozicije. Bil sam na finalo Sveckog rukometnog prvenstva 2009. leta v Zagrebo, igrali smo mi i Francozi i uredno so pobjedili Francozi, a mi, makar smo igrali doma, makar smo igrali odlično odišli smo po riti k meši.
Saka sličnost s labodoritanjem je čistam slučajna!
Jožek Radnik