Par tjedni nazaj si se spominamo o labodoritanjo, o Sveckomo labodoritaškomo prvenstvo štero se igra v Ameriki, Kanadi i Meksiko de igrajo i naši labodoritaši. Seposot se o tomo spominajo samo je v Selnici spominek o žganici i festivalo žganice FICKO, šteri se je ovo leto po osmi pot održal vu Selnici, a organizerala ga je udruga Međimurska žganica štera je zafremana ruon tak pred osem let tak da je jako mlada, a več si znajo za jo i to ne sam prinas vu Međimorjo, ne prinas vu Lepoj našoj nek se o Međimorskoj žganici pripoveda po skorom celoj Evropi, a posle par fraklecov žganice i po celomo sveto.
Udruga Međimorska žganica je nejpredi na pamet pala Štefo Mesaričovomo, Merhatovčaro z Središča na Muri i Igoro Haličo Jurčevčano z Male Sobotice. Oni so bili prvi šteri so se o tomo spominali i šteri so složili nejpredi Prvoga festivala žganice FICKO, šteri je bil vu Merhtovco pre Juri Zadravcovomo na grunto, a unda Drugoga, šteri je bil vu Zasadbrego jerbo je v Merhatovco pre Juri dežđ curel.
Morem vam reči, kaj se ne bodem falil, da sam bil na sim Fesivalima međimorske žganice sam ne na prvomo i ne na ovomo zadjemo, očem reči, osmomo vu Selnici jerbo mi je bilo preveč vroče.Vreme dela svoje. Najte me krivo razmeti, ali na Drugomo festivalo žganici ga bilo kaj kaj sega, sakefele žganici, a ve na Osmomo je to čistam nekaj drugo i si šteri so bili so priznali da je to bil nejbolši i nejvekši festival vu Lepoj našoj. Što bi rekel da se bode tak čuda v tak kratkomo cajto naprajlo i da bode Festival, Međimorska žganica i Selnica došla na vrh državne lojtrice, i ne sam državne, kaj se žganici dotikavle.
Kak je to bilo pred šest let?
Kak sam vam več rekel, na Drugomo festivalo žganice ga bilo takši žganici kaj si niti zidarima ne mogel ponuditi, očem reči, i zidari so frkali z nosima dok so podehnuli nešterno žganico. No, neje to se, unda ga bilo jeno petnaest uzorkov tak da si si ne mel niti kaj zbirati. Znate kak je to bilo, ono kaj je vredilo se je včasi spilo, a od onih žganici z šterih so se i zidari zbrčkavali si so obrnuli glave. Kak zgledi da je to v dečkima vužgalo kuražo i dospomenuli so se kaj bodo počeli delati žganice onak kak to dragi Božek zapoveda. Udruga Međimorska žganica je zafremana, selnički načelnik Ervin Vičevič jim je dal krova nad glavom i hižnoga broja tak da so počeli navuki de so pomogli školani agronomi z Agronomskoga fakulteta, šteri so sima povedali, sima šteri so šteli poslušati kak i da tre brati sadovje od šteroga bode na se zadje žganica, kak ga tre prepravljati, v kakše lagve metati i kak ga tre narezati, natuči ili pak zgveždrati kaj bode moglo zavreti. Dobili so navuka kak dugo mora vreti i da tre pod kotlom zakuriti i početi žgajariti. Zazvedili so pak so si počeli jednako delati, a ne onak kak je komo palo napamet ili kak je to rekel stari japa ili pak stara mamica. I neje bilo zabadav, za štiri – pet let počele so na festival FICKO dohajati žganice štere so bile onakše kak dragi Božek zapoveda, a da so pravzaprav takše potvrdili so stručnjaki z sakefele fakultetov, šteri jiv več par let ocjenivlejo i dodjelivlejo želencije i to od zlatne prek srebrne do bronastih. Dečki, štere so na kup nametali Štef i Igor, a kvartelja jim je dal selnički načelnik i selnička opčina, precednik jim je Branko Perčičov, a pomažejo si odreda, si šteri imajo radi društvo i žganico. Pod svoje jiv je zel i Ivek Goričancov šteri je maher kaj se marketinga dotikavle tak da ve ne sam žganica nek i festival ima glavo i repa. Negda se je po Međimnorjo pila rakija, a ve pak se pije žganica. Veli Štef Mesaricov, velijo dečki z Međimorske žganice ak se sadovje žgajari unda vum z kotla more teči sam žganica, a nikak rakija. No, ak na Festival dojde 185 uzorkov žganice, likerov i sega drugoga kaj kcoj ide i to z osem državi, kak je to ovo leto bilo, unda nebre biti v pitanjo sam žganica mora biti i nekaj rakiji. Ali ak je žganica dobra ili pak nejbolša unda more biti i rakija.
Nega sadovja od šteroga se nebre dobiti zlatna žganica
To so nas navčili dečki z Međimorske žganice kak ga nega sadovja z šteroga se nebre dobiti dobra žganica i zato jim saka čast kaj so navčili se nas tak da ve si mi pobiramo se one vočke štere rastejo po našemo brežnomo Međimorjo i ne dopuščamo kaj bi nekaj palo z dreva i kaj bi tam ostalo i zgnililo. To je ono nejvredneše kaj smo dobili od dečkov z Međimorske žganice. Zdigli so visoko očino Selnica i selničkoga načelnika gospona Vičeviča na lojtrici žganici vu Lepoj našoj tak da ve si znuomo kakša mora biti žganica, a kakši pak likeri, šteri krepijo dušo, šteri grejejo srca, a pamet je tu kaj nas brenza kaj ne preteruvlemo v pražnjeno fraklecov i kaj ne spraznimo vejč nek moremo podnesti. Ali znate kak je to teško, kak je teško poslušati pamet da vidiš tuliko zlatni žganici, još vejč srebrni, a kaj bronaste ne bodem spominjal i kak je teško oditi fkrej od punoga frakleca. Kaj reči, pak ne tre ruon se žganice i likere sprobati jeden den, najbrž zato i leto ima tristošezdesetpet dni.
Negda so i Štrigovčanci probali pak je ne išlo
Kak je to lepo da jeden takši festival žganice kak je of FICKO vu Selnici postane ne sam nejbolši nek i vrhunski vu Lepoj našoj, ali verjem da so se naši, očem reči, selnički žganičari nadelali i to ne malo. Neje lefko takšega festivala zafremati, naprajti i oddelati tak kaj je se išlo kak po žnori. To je veliki posel, trelo je prijeti 185 uzorkov, posložiti jiv onak kak je red, trelo je dopelati mahere šteri so to sprobali i kaj so se na se zadje mogle i medalje podeliti i to onak kaj so si bili zadovoljni.
Nekak mi je na pamet palo kak so Štrigovčanci probali, pred 15 – 20 let naprajti tvornico žganice Tijaro. Počeli so dobro pak so jo i zazidali, a unda je negdi nešči zahuzal i fabrika je prepala tak da je celi projektlin odišel po riti k meši. Ve se vidi da so meli dečke z Međimorske žganice več bi zdavnja meli fabriko i nišči niti nebre znati de bi bil kraj međimorskim žganicama. Nikaj bez Međimorcov šteri očejo delati, šteri znajo kaj očejo, očem reči, šteri imajo vizijo, šteri imajo Štefa, Igora, Ervina, Brankija, Nacija… Verjem da bode Selnica još dugo broj 1 na lojtrici žganici vu Lepoj našoj i da bodo festivali žganice nastavleni onak kak so se dečki dospomenuli. Saka čast dečki, kapa do poda!
Jožek Radnik
