Nigdar nemamo čas za branitele
Minulo soboto so naši braniteli, naši Međimorci, šteri so se borili za slobodno i neovisno Lepo našo pod zastavom 54. samostalne bojne obiležili 35. obletnico otkak so zafremali svojo bojno 1991. leta. Zišli so se v lepomo brojo, ali kak je rekel ratni zapovjednik šporcke satnije Vinko Grgić, če duže dale se jiv je meje. Lepo je kaj dojdejo si šteri morejo kaj se znova vidijo, kaj se malo pospominajo i kaj se znova zmislijo kak je to bilo pred tridestipet let dok so ostajli svoje hiže, žene, deco, stareše, rodbino, pajdašijo i odišli so, očem reči, kaj so se odazvali dok jiv je domovina zvala, kak to lepo na spomeniko piše: „Bili ste vi Hrvatskoj domovini, u pogibelji smrtnoj, brana i štit neprobojni“. Nejpredi so se položili venci i vužgale sveče, a unda smo si skupa z patrom Željkom molili za se nas, a posebno za poginule branitele. A 54. samostalna bojna je mela 29 poginulih, a borila se je po celoj Lepoj našoj, a nejduže so bili na pakračkom bojišto. Rekel sam več došli so si šteri so mogli sam je z grada Čakovca ne nišči došel. Nebrem veruvati da ga ruon ne nikoga i da gracki oci nemajo tuliko cajta kaj bi došli se zafaliti branitelima šteri so Lepo našo postajli na noge i pretirali agresore. A falimo se kak nam braniteli čuda značijo i kak nigdar ne bodemo pozabili jive žrtve, a dok tre dojti dok braniteli zovejo unda nigdi nikoga.
A oni so došli dok je nejbole bilo tre. Što zna kak bi to se završilo da so oni ne pred tridestipet let došli, zeli puške v roke i pobedili četnike i jugosoldatesko šteri so halosili po hataro Lepe naše.
Posle je vu Staromo grado bila svečana akademija gde so nas dečki z 54.samostalne bojne znova zmislili o jivim bitkama, o jivomo ratnomo poto. Postavili so i izložbo z slikama jerbo, kak se to veli, slike govorijo vejč nek jezero reči.
Pak je znova rečeno kak bi bilo čistam vredo da se polek spomenika poginulim i nestalim branitelima v čakoskomo grackomo parko postavi i križ jerbo so dečki šteli so dali svoje živote za slobodno i neovisno Lepo našo nosili krunico koliko šijaka i molili so dok so bili v nejvekšim ratnim nevolama. A i na obilježavanjo 35. obletnice smo si skupa molili. Mi molimo, nosimo krunice, mi smo katolici, a nešči brenza kaj se ne postavi križ.
Partiska čelija je znova otprla vrata
Domovinski rat je završil pred tridesti let a kak zgledi komunizam i komunisti so znova zdigli glave, očem reči, komunističke partiske čelije so znova prodelale jerbo več nebrejo zdržati vu ilegali i morajo pokazati da so oni tu, da postojijo i da so nigdar ne odišli z Lepe naše. Skup komunista je trebal biti održan, ne bodete veruvali na Filozofskomo fakulteto v Zagrebo. Sa je sreča kaj se je skup, na se zadje, ipak održal. Nekomo se je ipak na vreme rezbistrilo pak je toga i takšega skupa skinul z dnevnoga reda. Več sam par pot o tomo pisal kak na zagrebečkomo filozofskomo fakulteto (i ne sam na zagrebečkomo nek na sim filozofskim fakultetima v Lepoj našo) delajo sami antifašisti (čitaj: komunisti), a oni nam vučijo deco štera bodo zutra vučila naše vnuke. Kaj reči, ne verjem da so se za to borili naši braniteli. Ak so do ve delali skrivečki, a nesu, jerbo kuliko pot smo čuli Goldštajna, Klasiča, Jakovino, Markovino kaj branijo antifašiste i kaj skupa z SDP-om, platformom Moremo, Radničkom frontom i drugim antifašistima, šteri još niti 35 let posle zafremanja Lepe naše ne živijo v njoj nek se još navek plačejo za Jugom i furt rivlejo antifašizam v temelje Lepe naše, a mi znuomo, a to i v Ustavo piše, da je Lepa naše zafremana na Domovinskomo rato! Najgerek sam, jako sam najgerek da bodo ipak prestali rovariti i da bodo, več jempot, posprajli komunizma v ropotarnico povjesti.
Štimamo se z Lojzekom Šestanom i jegovim kacigama
Ne verjem da moremo v Međimorjo, pak i v Lepoj našoj najti čoveka šteri ne zna ili pak je ne čul za priločko fabriko Šestan Busch štera dela kacige nejbolše na sveto i to kak za vojsko tak za policijo i civilno zaštito. Več hajdi dugo kam god dojde Lojzek Šestanov direktor firme z svojimi kacigami on osvoji nekšo nagrado i to nejvečpot ono nejvrednešo. Firma Šestan Busch dela več tridesti let i to v Priloko de je i zafremana i, kak se to veli, saki den dela se vredneše i vredneše kacige. Sima nam je poznato kak kacige čuvlejo glave, a to je ono nejvredneše na čoveko. Kuliko sam mel za čuti Lojzekove kacige se prodavlejo po celomo sveto, a ve se prepravlajo kaj bodo naprajli i novo vrednešo kacigo, a to znači da bodo kacige lefkeše, a kaj bodo mogle zastajti zrno z malih udaljenosti. Znate kak je to v rato, nigdar se ne zna de vas ili pak nas metek more dočakati. Lojzekovi inženjeri ve delajo na tomo kaj bodo napravili hibridno kacigo vu šteroj bodo spojili aramide i polietilena i unda bodo dobili kacige, kak smo več rekli, kaj bodo lefke za nositi, a žnjimi na glavi bode vojnik siguren. Ali to je još ne se, delajo i na „spametnim kacigama“ štere bodo mele ugrađene senzore šteri bodo po buki mogle otkriti drone šteri dohajajo z ne baš dobrim namjerama. Ve vidite kuliko toga sega mora kaciga meti vu sebi kaj bi bila nejvredneša, kak Šestanova i kaj bi mogla spasiti onoga šteri jo nosi. A tu so Lojzek i jegovi inženjeri odišli nejdale na sveto i zato si očejo kupiti ruon Lojzekove kacige. Ve vidite kam je Lojzek Priloka dopelal? Dopelal ga je do toga kaj si znajo za Prilok, si znajo za fabriko Šestan Busch i si znajo za direktora Lojzeka Šestana. To si treba zaslužiti. I ve mi rečite kak se mi ne bodemo štimali za našim Lojzekom, z jegovom fabrikom i z jegovim kacigama nejbolšim na sveto? Kak prosim vas lepo?
Kaj bode itak Ivica napravil?
Naš Sabor se prepravla kaj bode zglasal novoga Proračuna i to za 2027. leto štero bode fčasi došlo. Neje to nikaj novoga jerbo je tak sako leto za Se Svece. Kak se to zna, proračuna za novo leto donašajo oni šteri držijo vu rokama cugle vlasti, a za ve so to još navek hadezeovci i jivi kompiči. Proračun je prepravleni i saborniki so ga dobili kaj se prepravijo je li bodo za jega zdigli roke ili pak bodo kazali fige vu žepo. Naš sabornik Ivica Baksa je podnesel amandmana vu šteromo šteči peneze od države za dogradnjo naše čakoske gimnazije Jožek (moj imejak) Slavenski. Plenkovič i pajdaši so čistam dobro razmeli Ivico i on jim je pripovedal kak mi nucamo dograditi gimnazijo jerbo se deca preveč tiskajo vu staroj i kak bi štel kaj bi penezi došli z državne kase. Ivica se premilil Plenkovičo tak da je nova čakoska gimnazija našla svoje mesto v proračuno Lepe naše.
Plenki je svoje oddelal, a ve je na redo Jandrokovič kaj se dospomene z sabornikima kaj zdignejo roke i kaj bodo blagoslovijo se ono kaj se bode drugo leto delalo z državnimi penezi. I unda se je javil naš Ivica kak bode on glasal protiv proračuna jerbo je on v opoziciji. Teško je tu biti spameten, amandman mo je prešel, a on bode protiv kaj bi mi Međimorci dobili peneze za novo gimnazijo. Ne znati je li bodo penezi došli ako se Ivica ne premisli?
Jožek Radnik