Kaj je ne v novinaj se je ne pripetilo…
Tak se je odnavek pripovedalo: kaj je ne v novinajse je ne pripetilo! Verjem da ste to čuli i to hajdi pot do ve. Pred slabih deset dni smo obiležili 35–to obletnico oslobođenja Međimorja od jugovojske, pred 35 let smo jugovojsko natirali zanavek z Međimorja i oslobodili smo ne sam kasarno (čitaj: vojarno) nek i karaule v Goričano, Doljnji Dobravi i v Kotoribi i dok se je to pripetilo Međimorje je bilo prvi oslobođeni hatar vu Lepoj našoj. O tomo sam pisal vu prošlomo brojo, oslobodili smo Međimorje od jugovojske i se oružje štero je palo v roke naših ljudi, naših međimorskih branitelov koristilo so je po frontima širom Lepe naše od Iloka, Vukovara prek Lipika, Zapadne Slavonije do Dubrovnika i Prevlake. To smo lepo obiležili i si šteri so došli na mimohod branitelov od vojarne do spomenika nestalim i poginuli branitelima vu čakoskomo parko so mogli videti i čuti kak se mi štimamo z našim branitelima i kak jim ne bodemo nigdar pozabili jivo žrtvo, a posebno onima šteri so za slobodno i neovisno Lepo našo dali svoje živote. Se je to bilo lepo i dobro sam oni šteri so ne mogli dojti na mimohod, na Svečano akademijo so to nigdi ne mogli prečitati. Nebrem nikak razmeti kaj so se naši braniteli zamerili cajtungima i novinarima kaj se o tomo jako malo oliti bole nikaj ne pisalo? Pak so si braniteli to ne zaslužili! De bodo naši mladi zazvedili kaj je bilo v Domovinskomo rato ak ne vu cajtungima – to te ja pitam?
Što to, itak, kuri po Lepoj našoj???
Dok se za nekoga veli da je ne kak druga deca unda bi to značilo da je malo čuden, da je na svojo roko i da ga je navek ne muoči razmeti. Tak vam je i Lepa naša, celo leto so nam, tak se bar pripoveda, sosedi vužigali šume, šikarje, masline, bore i se kaj raste po Dalmaciji i blizo debele vode i dok smo to ipak nekak, na jedvite jade uspeli pogasiti unda je počelo goreti smetje tak da čovek ne zna je li bi predi počel gasiti raslinje, šume i šikarje ili pak smetje. Da bode nevola vekša, kaj se ogjov dotikavle, ovo leto smo skurili i „Vjesnika“. Neje da nam „Vjesnik“ nekaj jako fali, ali je vu prometo po belom Zagreb grado donesel i nove nevole jerbo zato vozači tramvaja i smetlari ve iščejo iščejo povišice. To je ono kaj se zna, a de so si oni ogji,vekši ili pak menši za štere se niti ne zna jerbo dosti je toga kaj je zgorelo skrivečki. Pitam ve vas pak i teco Franco kaj imajo zajedničko te si ogji? Gasijo jiv ogjogasci, gasijo jiv reoplani – kanaderi, gasijo jiv leteči traktori… I još nekaj? Moramo deti roko na srce i priznati kak smo ne niti za jenoga ogja zazvedili stoprocentno što ga je podežgal? A, institucije furt i navek delajo svojega posla?
Kak si je Big brader zebral ruon Međimorje?
Dok se čovek doma posvadi s ženom unda odide, očem reči, pobegne zdoma i odide v krčmo iskat pajdašijo ili pak se nasloni na šank, na svojega nejbolšega prijatela, i unda se tam malo pospomina z konobaricom, malo sam z sobom ili pak z punom kupicom kaj se zmiri predi nek gene dimo v novo „bitko“ z ženom. A kam bode drugam odišel? Pak došel je v krčmo kaj si z flaše, kupičke ili pak kupice zeme kuraža kak bi mogel se ono pretrpeti kaj ga doma čaka predi nek znova potpiše s ženom „mirovni sporazum“ ili pak popuši lulu mira. Ne zgledi navek kak je ne preveč lepo dok se čovek nema z kim posvaditi, ali dok čovek dojde z krčme unda so si problemi čuda menši ili pak se on preveč ne sekera. Ve dok sam čul kak bodo policaji nametali kamere po celomo Međimorjo i kak bodo kamere pratile sakoga koraka nesam ruon bil vesel jerbo ne znati de si bode čovek mogel zeti kuraža, a kaj jegova bolša polovica to ne bode črez par vur zazvedila. Brzčas žena zna da čovek mora nekam oditi od hiže dok je familijarna „ratna sekirka“ ne zakopana, ali unda se bode spituvalo zakaj si ruon moral oditi v krčmo k Bariki ili pak k Štefi štere delajo v minicaj i imajo nejvekše resporke (čitaj: dekolteje) na radnaj opravaj i unda bode svaja počela znova. Neje denes lefko biti moški: čuda toga ti brani mama, još vejč toga žena, unda je tu i punica kaj ne bodemo spominjali sosedinoga moža i deco. I to je prekpreveč, a ve pak so počeli naši policaji postavljati kamere na se strane? Pak kaj so ne dosti ove kamere štere merijo kuliko se pelamo, a ve bodo i kamere z kim se pelamo, s kim se španceramo, s kim hodamo vu park, na gablec, na desert, pak, ljudi moji, kam to ide? Prosim vas lepo de bodemo mi moški našli svojega mira, de bodemo mogli s kim očemo i delati kaj očemo ili pak kaj moremo?
Pred par let se je pojavila rodna ideologija pak nam ve več žene niti ne verjejo da smo moški i to tak dugo dok ne porinejo roko v gačke i popetajo. Nejpredi nam je to bilo i lepo, ali ve se nam je več i zamerilo jerbo so je i žene sakefele tak da moramo i mi rivati roke vu ženske gačke jerbo kaj se nej, na se zadje, pripetilo da je vu ženskim gačkama vekši komad nek vu moškim gačama. Ve vidite kakše so se nevole na ovomo našemo sveto? Ve čovek niti sam nezna kaj je, kaj bi štel biti i dok to zazvedi komo to nek reče kaj ga ne bodo sikam kam dojde slikali ili pak slačili?
Negda so te kamere slikale labodoritaške kibice
Negda, ali ne tak zdavnja, smo dovlekli kamere na čakosko labodoritaško igrališče v Golobetki kaj smo slikali se one šteri so delali kakše gluposti ili pak svinjarije za vreme labodoritaške utakmice, ali se je to ne nigdar pripetilo tak da so te „labodoritaške“ kamere odišle po riti kmeši, očem reči, v ropotarnico povjesti i tak so jiv posprajli kaj jiv niti vrag nebre najti.
Najte me krivo razmeti, ne bi štel coprati, ali niti od ovi novi kameri ne bode brzčas zišlo nikaj spametnoga jerbo se prinas još točno ne zna koga smeš slikati, a koga ne, a kak bodeš nekoga vred dotiral ak te slike nikaj ne vredijo na sodo? Tu bi mogli jedino služiti oni kaj bodo prodavali slike ženama oni moški šteri z mladaj pucaj hodajo v park po drugo mišleje jerbo se je ve park lepo rezrasel tak da se nutri v park nikaj preveč ne vidi. Nekaj si gruntam da nam je te Big brader nikak ne trebal vu ovomo našemo mirnomo Međimorjo…, dosta nam je međimorski jal i on prekpreveč svaji dela!
Kuliko sam mel za čuti za of štrajk oliti protest vu Zagrebo je kriv negdašji gracki načelnik Milan Bandič…!
Nadjam se da so ve oni šteri so bili za promjeno zadovoljni kaj so natirali Daliča i dopelali Biliča makar nam ve rože nekak slabo cvetejo!
Jožek Radnik