Kaj žene pravzaprav očejo???
Kaj vam bodem rekel ostal sam bez reči dok sam pred tri tjedne videl v ovim našim, vašim i mojim novinama kak je glavni urednik dal zadačo svojim novinarima nek zazvedijo kaj itak žene očeju vu svojemo živlenjo? Negdi je bil jako kuražen ili pak so mo se žene nekaj grdo zamerile pak je štel zazvediti kak bi z ženama došel na kraj. Sima nam je poznato kak je još negda stari dobri Ajnštajn zdigel roke od ženi jerbo čim je zazvedil da si žene jeno gruntajo, drugo povedajo, a tretje delajo to niti Ajnštajnova teorija kak je se relativno je nikak ne mogla podnesti. Bila je pre slaba. Ruon tak se odnavek zna kak je naš genije za lektriko Nikola Tesla bil i ostal ledičen črez celo svoje živleje, a teca Franca veli kak ga niti jena žena ne štela jerbo je on bil genije i bil je preveč komplicerani za žene. To dok teca Franca veli kak je bil pre komplicerani za žene to znači kak je jemo niti jena žena ne mogla zapovedati i to sam zato kaj je on nikoga drugoga ne poslušal nek samo sebe, a dok je tak unda žena tu nema kaj delati tak da je Nikola odišel k Božeko na račun kak stari dečko. I moj sosed je stari dečko, neje on nigdar bežal za ženama, ali so se nešterne počeli rivati k jemo a on je sam gledal svojega posla tak da so i žene tu hitile puške v kuruzo i ostavile soseda nek i dale bode sam na velikomo grunto, nek si som dela one posle z kuhačom i nek si sam pere veša na roke.
Ne znati je li smo ve kaj spametneši kaj se ženi dotikavle jerbo zazvedili smo kak bi one štele biti celo živlenje mlade i lepe i kaj bi furt mele tuliko penez kaj bi si mogle privoščiti se kaj očejo i kaj bi jim još nekaj penez ostalo, ali smo ne zazvedili kak se do tuliko penez more dojti? Ali ako čovek oče kaj bo ga žena rada mela furt i navek i kaj ne bode nigdar gledala na falinge unda mora meti dosti penez. Ne verjem da smo to do ve na znali? Najbrž je to zbog mladi kaj se ne bodo preveč dobromo nadjali, ali denes puce ne puščajo z rok onoga dečka šteroga so si zebrale, a puci je i vejč na sveto (kaj dovice ne bodemo spominjali jerbo so one ne puce) tak da je denes teško ledičen ostati.
Moram vam spripovedati kak je zišel moj pajdaš Štefek:
- Draga, večeras te vodim na večerjo!
- Vodiš me? Pak kaj sam ja pes?
- Ma, dobro, to se tak veli. Štel sam ti platiti večerjo…
- Platil bi mi? Pak kaj sam ja flj..dra?
- Pak, dobro, kaj ti je denes? Štel sam te počastiti za našo godišnjico i to v novomo restorano v našemo kvarto de imajo odlično jesti i to iz bio uzgoja… i se bez masnoča!
- Kaj si z tem štel reči, da sam debela?
- Predajem se…, i Štefek je odustal, očem reči, hitil je puško v kuruzo!
Umjetna inteligencija ide krajo…
Nej predi smo se norcali delali z te umjetne inteligencije, unda smo jo zbegavali, a ve dok smo se pomirili žnjom ve vidimo da nebremo bez nje kak niti mi Međimorci bez Mare Zadravcove, ako ne drugo bar se spominmo o njoj. Ve dok se umjetna inteligenicja rivle sikam tam de treba kak i tam de ne treba. Pitam sam jo v minulo soboto je li more Hajduk pobediti Dinamo i rekla mi je da to nebre pripetiti pak makar bode i Livaja igral od prve minote. Kak znuomo Livaja je ne igral, Hajduk je ne zabil niti jenoga gola, a pobedil je 2:1. Kak vidimo se je muoči. Pitam vas pitam je li znate što bode stal na kraj umjetnoj inteligenciji? Znate što žene jerbo umjetna inteligencija bode prva rekla ženama kak nemajo praf i dok se to tretji pot pripeti to bode kraj umjetne unteligencije!
Samo jeden celo leto…
Ve dok se si i to seposot spominamo o smetju kak moški v krčmi tak i žene na mlekari ili pak čehari. Moram priznati da nigdar ne bi rekel da si je smetje to zalužilo kaj ga si mi tračamo, ali ruon tak moram priznati kak nigdar ne bi rekel da se tulikši penezi vrtijo okoli smetja i to ne sam prinas nek po celoj Evropi. Još se je se to ne smirilo, a naši smetlari (čitaj: Čakom) so ostali bez direktorice jerbo se je niti ona ne nadjala da je fotelja direktora Čakoma tak vroča jerbo je Ivek Perhočov dugo v joj sedel i nigdar se je ne nikaj bunil. Si šteri so dopelali smetje v na odlagalište v Totovec so našli otprta vrata i komunalci so jiv prijeli z reširenaj rokaj. Tak je to na leta išlo: Ivek je sedel vu fotelji v Miholjanaj polek grobja, a mi pak smo vozili smetje v Totovce. Dok je smetlišče bilo preveč puno našel se je nešči z druge ili tretje smene pak je vužgal i tak je napravil mesta za novo.
Na početko ovoga leta so nam naši komunalci rekli i to jasno i glasno kak nemajo mesta za elektronski otpad pak so nam dali dopuščenje kak saki od nas more črez jeno leto donesti na smetlišče jenoga televizora, monitora ili pak laptopa. Ne znati što je itak bil tak spameten vu tomo našemo Čakomo i što je to zmisl? Zakaj pitam? Zato kaj bodo naši komunalci pobrali toga jenoga ekrana, a oni šteri bodo meli viška staro pokvarjeno televizijo, staroga monitora ili pak laptopa morali ga bodo nekam posprajti, a hitili ga bodo tam de jim bode prva prilika i brzčas to ne bode nišči doma kupčal. Te elektronski otpad bode se po noči vozil na se strane kak so to ovi delali vu Gospičo. A si znuomo čije je ničije smetje, to moirajo opčine i gardi posprajti z svojimi penezi. I unda bodo se naši komunalci čudili, kak picek glisti, da se je povečal broj divji deponiji. A najbrž bi bilo čuda faleše da se pobere ves elektronski otpad i otpela tam kam se mora, a ne kaj ga bodemo sako malo pobirali po jarkima, kanalima, potokima i šumicama. Kaj velite?
Kak leta ido…
Ove dneve se je napunilo punih 27 let otkak Jožek radnik premišlavle i zapišuvle svoja premišlavanja na zadjo stranico vaših i naših novin tak da je skradja vura kaj se pomalem počnem ravnati v penzijo. Do ve sam napisal prek jezeroštiristo kolumni i lepo mi veli teca Franca nek prestanem kaj ne bodem počel dosađivati ljudima. Najbrž ima ona praf jerbo mi je več parpot podnesla ostavko na svoje mesto v moji kolumni. Teca je svoje rekla, aja vam nebrem nikaj obečati jerbo dok još imam ovo malo soli v glavi kolumna se bode našla na svoji mesti, a sam drgi Božek zna kak bode to dugo trajalo. Morem vam reči da so oni novinari i uredniki šteri so me dočakali v redakciji dok sam se hapljuval več si v penziji, i to zdavnja, a nešterni so več i odišli k Božeko na račun tak da si moram dobro pregruntati kaj odidem predi nek bodo hitili vum. Kaj vi velite o tomo?
Jožek Radnik