Več sam v prošlomo brojo pisal o tomo kak so naši Vatreni prešli v Ameriki, kak so ne meli srečo i kak so ne bili zebrani od oni šteri vedrijo i oblačijo vu labodritanjo kaj bi duže ostali v Ameriki i kaj bi duže igrali ili pak se do kraja kak smo mi to bili navčeni, očem reči, kak so nas Dalič, Modrič i naši Vatreni navčili na zadja dva svecka prvenstva z šterih so dimo donesli želencije. Labodoritaška mafija oliti kak je to rokometaš Ivano Balič rekel je mela čistam nekše druge planove vu šterima ga ne bilo mesta za naše Vatrene, a kak je navek vu ovomo našemo živlenje, navek je onak kak oni vekši, ono bogateši, šteri imajo vejč penez, očejo, a kuliko vidimo tak je bilo i ovo leto v Ameriki. Tu i tam se je nešči prevlekel, a nešči drugi je prefletno dimo odišel. Onima šteri ido dimo je navek prefletno. Ne bi vam znal reči što bode itak došel do kraja jerbo ovo svojo kolumno pišem raneše zbog radi urlaba, ali vi bodete več znali što je itak na se zadje zdigel pehara, što je došel do kraja, a što pak je predi kraja odišel dimo kak i mi. Napriliko Nemci i Nizozemci so odišli pred nami, a mi mam za jimi, ali tak je to, kak veli moja teca Franca, laboda je okrogla, ali tu i tam ipak i na vogel padne. Ak se tak naredi.
Utakmica more početi, dospomenuli smo se kak bode završila!
Moral i pošteje so si velika rodbina. Negda bili!
A da bode itak Hajduk na redo?
Da smo več pre teci Franci moram vam reči kak me je teca došla pitati, par dni posle kak so naši Vatreni došli dimo, a jo pak je pitala vrtna soseda Tilča je li je Hajduk još navek v igri za sveckoga prvaka. Morem vam reči da sam ne znal kaj bi joj otpovedal. A vi znate kak je to velika nevola dok ja i teca Franca nemamo kaj reči. Znate kaj smo naprajli? Držali smo se preštimano kak da nas je nikaj ne pitala i to tak dugo dok je soseda Tilča ne zabila kaj nas je pitala. Minuli mesec je soseda Tilča napunila 95.leto pak je ne red kaj joj ruon ja moram reči kak ga ne šanse kak bi jeni Hajduk bil svecki prvak. Jeni vnuk Štef, šteri je vrago z torbe opal, joj je napunil glavo kak so Dinamovci mafijaši (kak i ovi vu FIFI) i zato ne pustijo Hajduka več dvajsti let kaj bi bil prvak Lepe naše pak si je brzčas soseda Tilča pregruntala da so ovi vu FIFI pošteneši i mortik bi Hajduk predi tam došel do prvoga mesta.
Sam v labodoritanjo levica vejč vredi od desnice!
Odluko so donesli dvoglasno: jeni so bili za, a drugi protiv!
Treba se ipak zafaliti…
Par dni posle ot kak so naši Vatreni došli dimo, došel je zagrebečki gracki načelnik Tomica Tomaševičov skupa z Sandrom Benčič k rektoro zagrebečke katedrale, monsinjoro Zlatkijo Koreno, z moljbom je li bi se mogla v zagrebečkoj prvostolnici odslužiti zahvalna meša za naše labodoritaše i to sam zato kaj so tak fletno dimo došli i kaj so ne nikšo želencijo osvojili i kaj ne bode tre nikše dočeke prepravljati. Kak je Tomica rekel neso ruon v pitanjo penezi jerbo bi se oni i našli vu grackoj kasi štera je ne boga i vu šteroj se navek najdejo penezi za nekaj kaj treba, ali je vesel, kak on tak i Sandra, kaj ne bodo morali pak poslušati Thompsona. Priznali so da teško premagadijo Thompsonove pesme, kak oni tak i jivo levo biračko telo i čuda je bole da se je ne nikaj pripetilo jerbo več nebrejo strpeti to kaj športaši Lepe naše donesejo dimo želencije kam god idejo, a jim smeta se kaj ima hrvackoga predznaka, kaj ima hrvackoga kockastoga dresa, hrvackoga grba pak makar je i prvo polje črlene boje. Morem vam reči da je monsinjor Koren ne odbil zahvalno mešo, ali zbog radi te zahvalne meše ne bode otpiral katedralo i Tomici je ponudil mešo v Pastoralnomo centro Blaženoga Alojzija Stepinca sto metri dale. Kak bilo da bilo, lepo je od Tomice kaj se je ipak zmislil da se tre zafaliti Božeko, makar on verje da Božek ne postoji, za se ono dobro kaj so naši Vatreni napravili v Ameriki. Mortik Tomek nebre spati jerbo je ne napravil dočeka rokometašima kak je to bil red? Nigdar se ne zna ili pak ga je Sandra na to vpotila. Kak bilo da bilo mortik bode nekaj z Tomeka? Mortik?
V poštene izbore več nišči ne verje, ali se zebrani nikaj ne bunijo!
Ne zbiram si preveč, dejte mi bilo kakšo vlast!
Bolše (malo) zutra – malo morgen!
Moram vam reči, kaj ne bodete rekli da sam vam ne rekel, moj pajdaš i prijatel Đuro Bel je izdal svojo drugo knigo i to knigo aforizmov, očem reči, kajforizmov, a to so aforizmi na kajkavskomo jeziko Bolše (malo) zutra. To vam je of isti jezik na šteromo vam ja več hajdi dugo pišem ovo svojo kolumno. Moram priznati da smo si mi dva pajdaši makar se negda i ne slažemo, očem reči, negda se i posvadimo. Moram priznati da je saki od nas malo na svojo roko i nejvečpot dela se po svojemo, a znate kak je to da to ne mora onomo drugomo navek biti praf. Dok je gospon Bel predstavljal svojo knigo, pred dva tjedne v Matici, priznal je sima onima šteri so došli kak on skuplja te svoje aforizme – kajforizme kak i ekonomisti peneze, seposot kud got ide. A sima nama je poznato da ga seposot nega penez, a nega niti seposot niti kaj forizmov. Ali ak čovek ide vejčpot i saki pot išče unda čuda pot i najde. To vam je kak i z vrgajima, ak bodete navek doma i ak nikam nejdete nigdar ne bodete meli vrgaje v tajero, a niti pak vu frižidero. Priznal je gospon Bel da koristi talente štere mo je dragi Božek dal jerbo ak jiv ne bode koristil bode ga zašpotal i mortik ga pozove kaj mo položi račune, a to ne bi štel kaj bi se tak v časi pripetilo. Dosti dugo je hodal po sveto bez kape pak mo je kajkaj toga spametnoga palo na pamet, ali ve več par let nazaj mora nositi kapo jerbo z letima saki čovek dobi nekšo falingo pak je tak i moj pajdaš ve gospon pod svojom kapom ili pak pod svojim škrlakom. No, bar za ve ne bodete ostali bez svoji kajforizmi jerbo ga pamet još navek služi makar je denes malo stareša nek je bila fčera. A si vi šteri ste ne bili na predstavljanjo knige v Matici morete jo v Matici nabaviti i to tak dugo dok jo bodo meli. Kak se to veli, što predi jegova djevojka!
Neje lefko biti bedak tu je nejvekša stiska
Navek so me nejveč koštali besplatni savjeti
S ženom se fčasi dospomenem ak je se po jenomo
Istina nejbole boli ako je gola i z drugim!
Jožek Radnik