Zakaj je itak odišel Zlatko Daličov???
Zadji pot smo se rekli zakaj so naši Vatreni morali oditi dimo z Amerike, Kanade, Mekika predi kraja, predi nek so to zaslužili svojim igrama, kaj ne bodemo rekli rezultatima jerbo so rezultati čistam drugač kazali i dimo nas poslali. Rekli smo zakaj so naši „kockasti“ odišli po riti k meši, ali smo ne nikaj rekli o tomo zakaj je Zlatko Daličov hitil puško v kuruzo i ostavil je „Vatrene“ Slaveno Biličo nek se ve on dale bantuvle žnjimi. Dok je došla na svetlo dneva istina da je Zlatko rekel da mo je dosti sega, posle devet let, i da si mora malo počinoti, očem reči, ne počinoti, nego spremeniti posla pol Lepe naše, naših vernikov je dalo na mešo zahvalnico za se ono dobro kaj je Zlatko napravil za naše lanodoritanje, za naše labodoritaše i za Lepo našo, to je ona polovica Hrvatov šteri verjejo da Božek postoji, a ona druga polovica vernikov, šteri verjejo kak Božek ne postoji so v Lisinskomo organizerali festival partizanski pesmi zato kaj so se, na se zadje, ipak uspeli rešiti Zlatkija, šteri je osem let nosil dimo srebrne ili bronaste želencije z Sveckoga prvenstva ili pak Lige nacija. I ne sam to, zdigel je naše labodoritaše na sam svecki vrh. Pravi Hrvati so ga radi meli, a Lepa naša je osvojila srce sveta jerbo kam god smo mi Hrvati ( tu se računamo i mi Međimorci) došli i čim smo rekli da smo z Lepe naše ili pak smo došli oblečeni v kockasti dres mam so nas si poštuvali. Tak je to bilo do fčera
„Slučajni“ izbornik
A znuomo kak je Dalič došel na mesto izbornika. On je bil „slučajni“ izbornik, šteroga je ondašnji precednik HNS-a Davor Šuker v oktobro 2017. prosil, osem vur predi nek so Vatreni putuvali na utakmico v Kijev, protiv Ukrajine, nek prevzeme naše labodoritaše, nema kaj zgubiti jerbo je ondašji izbornik Ante Čačič več se zahuzal i moral je oditi. Si so bili za to jerbo so se nadjali da nikaj nebre naprajti i da bodo črez mesec – dva potrošili još jenoga trenera. Zlatko je jedva ftegnul spakerati kufre v Splito i več mo je letel avion za Zagreba, a iz Zagreba je z Vatrenima odletel za Kijev de je, kaj so se si čudili, pobedil. A se ostalo znuomo, posle je pobedil Grčko i odišel je na Svecko v Rusijo otkod se je vrnul z srebrnom želencijom zlatnoga sjaja i dočakalo ga je v Zagrebo prek 500 jezer ljudi i Thompson šteromo so ištekali strujo. Posle toga je došla bronasta želencija z Katara pak srebro z Lige nacija v Roterdamo. Kaj nam pozabil još i to kak je niti jeno tekmo ne zgubil v kvalifikacijama za Ameriko tak da je „slučajni“ izbornik ostal devet let i osvojil čuda vejč sega nek smo mi Hrvati mogli senjati.
Nebrem razmeti kakši so to ljudi šteri so tak dugo rovarili protiv Zlatkija (zmislite se jegove vikendice na Dravi na Hraščanskomo), a on je tuliko toga lepoga i dobroga donesel nam Hrvatima i Lepoj našoj. Najbrž so to oni šterima smeta Lepa naša i još navek se nadjajo kak se bode vrnula Juga. Neje važno kaj smo mi nejbolši na sveto, ali nosimo „kockaste“ drese, več od pol Lepe naše navija za jiv, ali zakaj toj vekšoj polovici Lepe naše popevle Thompson, zakaj se popevle Lepa li si i Ako ne znaš kaj je bilo, zakaj se v labodoritanje meša dragi Božek, Marijica i familija. To nebrem nikak razmeti!!
Opal bode Štefov rekord
Dok so prinas v Čakovco, v Međimorjo, a i v celoj Lepoj našoj nejvekše vručine unda je v Čakovco navek i proščeje. Ak se po jutru den pozna, a tak je navek do ve bilo pak bode najbrž i denes tak, unda bode ovoletošje Prcinkulovo nejvekše do ve. Kuliko vidimo štandov ga nigdar tuliko ne bilo i to sakefele tak da nikomo nikaj ne fali sam tre meti časa i peneze. Tripot sam prešel se okoli i kaj sam mogel videti, videl sam da je skoriščeni ne saki meter grackoga placa nek i saki centimeter. Fala Božeko kaj so bar steze ostale prazne kaj se more sikam dojti makar ne tak fletno kak bi čovek štel, ali ak ima voljo i strpleje unda sikam dojde i sigurno je da kak god dugo ide ne bode nigdi žejen jerbo tank šteli za naše suhe požerake so na sakomo korako. Zmislim se kak denes kak se je negdašji čakoski gracki načelnik Štef Kovačov falil kak je za „jegovo“ Prcinkulovo došlo v Čakovec prek dvesto jezer ljudi, ali smo unda nikak ne mogli zazvediti kak je on to brojil kaj je nabrojil dvjesto jezer, a ve sam rekel, ak se po jutro den pozna, očem reči, ak bode saki den tuliko kak je bilo prvi den onda bodo čakoski turistički težaki i gracki oci zrušili Štefovoga rekorda i najbrž bode došlo prek dvesto jezer ljudi i ne bodo morali sakoga proščenika nejmeje dvapot brojiti.
Se je to lepo i dobro sam je otvoreje Prcinkulovoga prvoga dneva navečer v atrijo Staroga grada ne bilo onak kak je trelo i kak je bilo splanerano. Verjem da so si došli šteri so morali dojti, bila je tu i Zrinska garda z svojimi bubnjari, z svojim topnikom, bili so tu kuburaši z Maruševca, šteri so streljali za početak proščeja i morem vam reči da se je se jako dobro vidlo i se se jako dobro čulo, ali se pod milim bogom nikaj ne razmilo. Kak so mi rekli oni šteri se čuda bole od mene razmijo vu to da je razglas bil preslab. Znate kak je to dok ga hajdi ljudi na na jeni mesti, oni se spominajo, halaburijo i unda je teško razmeti kaj je govoril voditelj,kaj nova turistička direktorica,kaj nam je štel reči župan, a kaj gradonačelnica. Brzčas se bode to popravilo na zapiranjo proščeja ili pak drugo leto v se dob.
Još nekaj…
Znuom, rekli bodete, čuda je to posla i hajdi tre delati da se to se napravi. Slažem se, ali nikak nebrem razmeti zakaj mi moramo navek širiti na proščejo bractvo i jedinstvo? Najme kaj, na nejvekšoj i nejglavnešoj pozornici bodo popevali naši domaći pevači Prljavo kazalište, Mladen Grdovič i Matija Cvek, pevač z Crne Gore Sergej Četkovič i srpska pevačica Neda Ukraden. Nebrem veruvati da mi v Lepoj našoj nemamo dosti pevači, tamburaši i bandisti i da je niti jeden naš Međimorec ili pak Međimorka ne zaslužil/la kaj bi popevala na glavnomo čakoskomo proščejo? Toplo se nadjam da nas ne bode i ovo leto iznenadil, kak je to bilo lani, nekši Tref bend z Kruševca i napravil terevenko v centro Čakovca za proščeje i kak čestitka našim branitelima z jiv den, Den pobjede, šteroga obslužavlemo sam sam tri dni posle proščeja?
Jožek Radnik