Kaj je novoga pre našim sosedima?
Neje lefko zdržati a kaj čovek ne bi malo poljuknul prek meje k sosedima. Čistam onak da zazvedi kaj se tam dela, je li još navek tam trava bole zelena nek naša domača trava.
Verjem da smo ne pozabili kak je cirka pred mesec dni na parlamentarnim izborima pre sosedima Mađarima dugoletni premijer Viktor Orban odišel po riti k meši, a pobedil je Peter Magyar i to tak kaj v Parlamento ima dvotrečinsko večino. Morete si pregruntati kak je Mađarima več bilo dosti Orbana da so skorom si svoje glase dali Magyaro makar so za Orbana drukali kak ruski precednik Vladimir Putin, tak i amerikanec Donald Tramp, kaj pajdaše, našega Zokija MIlanoviča i srpskoga Aco Vučiča ne bodem spominjal. Tak so sosedi Mađari bili protiv Orbana kak napriliko naši antifašisti protiv HDZ-a.
Otkak je Orban odišel v ropotarnico povjesti, a cugle vlasti vu svoje roke zel Magyar nikaj se ne zna de je završila karta Velike Hungarije, štero je Orban furt mel vu zadjoj kištici svojega radnoga stola. Nikaj se ne zna je li jo je gospon Orban sobom odnesel ili pak jo je ostavil Magyaro kaj on nastavi tam de je on postal. Zmislimo se kak je Orban prek športašov, prek labodoritašov, kanil naše kraje od Međimorja do Baranje prepojiti Mađarskoj i nazaj zafremati Veliko Mađarsko tak da sam ve najgerek je li bode novi mađarski precednik Magyar zadržal karto ili si mi i Mađari bodemo i dale pajdaši. Jako sam najgerek je li ve moremo poslati našega precednika Zokija kaj on ispita kaši nam je novi sosed, je li bode i dale postavljal žico na meji ili pak se bodemo spominali kak pravi sosedi. Čim je Orban odišel mam je Lepa naša, očem reči, INA dobila soda protiv MOL-a pak bi mogli reči i da je tu spuhnul novi veter. Ili kak teca Franca veli, dej Jožek malo se curikni, počekamo malo pak bodemo vidli kaj se bode pripetilo! Ima ona praf, mi negda niti ne znamo kakši politički veter prinas doma puše, a ne kaj bi znali kakši puše pre sosedima v Pešti. Niti je sosed Orban ne mam pokazal roge.
A kak je pre sosedima v Deželi?
Predi nek v Mađarskoj so hodali glase davat naši sosedi Janezi z Deželi. Oni so ne bili tak sigurni koga očejo meti v parlamento i koga očejo za precednika, očem reči, premijera. Dugo so trajali spominki, dugo je niti jeden političar na večinskoj pobjedničkoj strani ne mogel na kup nametati dosti glasov kaj bi mo precednica dala viziperta kaj složi novo Vlado. Na se zadje je ipak, kak se to veli, za prsa pobedil Janez Janša i dobil je priliko kaj složi svojo četrto Vlado. Bodemo vidli je li bode zapuhnul nekši novi veter kaj se dotikavle nas i Dežele ili bodemo i dale vlekli otprta pitanja. Janša je tretji pot bil premijer Dežele 2022. leta, ali ve bode malo jakši jerbo je američki precednik Tramp slovenski zet. Kak got je to ne bogzna kaj, ali ipak Melanijino srce zna otkod je ona zdoma. No, kak veli naš precednik Plenkovič prvi smo si sosedi pak si moramo biti zdobra!
A kaj gvinta sosedo Bariko?
Naši politički sosedi Dežela i Mađarska bi morali biti kak soseda Barika. Ona si je zdobra z sim sosedima i saki šteri dojde k joj na grunt je dobrodošel: ona prime sakoga i potruca z onim kaj ima, još je niti jeden sosed ne odišel z jenoga grunta nezadovolen. To je lepo i takši bi morali biti si pravi sosedi. Neje to tak čuda z čem te Barika more potrucati, ali se ono kaj davle, bilo to na stolo ili pak pod stolom, davle od srca. Nejvečpot oni šteri dohajajo dobro znajo kaj morejo dobiti i zato nigdar ne odidejo nezadovoljni. Potožila mi se soseda kak v zadje vreme ober jenoga grunta lečejo mali raoplaneki, kak ober Ukrajine, (čitaj. droneki) i slikajo jo dok de se ona gola sunča na svoji terasi. Srdita je kaj niti na svojemo grunto, niti na svojoj terasi nema mira i ne razme zakaj te droneki lečejo ober jene terase pak ona sakomo pokaže se ono kaj ga interesera. Brzčas je srdita kaj več niti na svojemo grunto nema mira i da ve si znajo kak si ona ne potbrivle svojo mačkico i kak na jenomo bregeco i dale raste šumica. Rekla je: meni je to lepo i ja si tu napravim frizuro kakšo očem, a do ve se je niti jeden moški još ne pobunil na mojo šumico jerbo je mačkica štera je doma v šumici navek dobre vole i pospomina se z sakim šteri dojde z dobrom voljom i plemenitim nakanama.
„Norijada“ je minula kak Božek zapoveda. Skorom!
Ruon sam se prepravlam kaj pofalim ovoletošje maturante, ovoletošjo „Norijado“ kak je bila kredna, kak je bila vredo i kak je to bilo se čuda bole lepše i bolše nek je to bilo negda dok so maturante vozili z busima od diskača do diskača de so plesali i popevali, ali je i pijača tekla potocima tak da so dugi den vjutro „mrtve“ (čitaj: alkoholno zmočene) pobirali okoli diskačov. Takših zmočenih je bilo i po čakoskomo parko de so bile menše feštice, ali pijače ruon tak prekpreveč. Najbrž so mobiteli, a i sakfele društvene mreže naprajle svoje jerbo denes saki more sakoga poslikati i deti ga na društveno mrežo, a to kaj je jempot na mreži se nebre tak lefko zbrisati, a dok jempot maturanti dojdo k sebi onda je na muoči popraviti ono kaj so zabrljavili. Več par let ga toga nega, maturanti so veseli i lepo oblečeni, cifrasti, kak je red, fučakjo kak i navek, a i popevlejo i to si kak oni šteri imajo sluha tak i oni drugi. Ali maturantima je se dopuščeno. Znate kak je to dok se reshajajo pajdaši šteri so se pajdašili štiri leti i što zna je li se bodo igda ili pak nigda pak zišli si skupa kak so ve. Oni so ve na raskrižjo, jeni pejo na faks, jeni na posel, jeni bodo ostali v Međimorjo, a nešterni bodo se odtepli i prek meje, što zna kam bode koga „reka života“ odnesla.
Rekel sam, se je to bilo lepo i dobro i za fofaliti onda je došla vest kak so maturanti v parko plesali i popevali užičko kolo. Ne znati što je tem našim mladim ljudima podvalil užičko kolo? Kuliko vidimo ne smo jiv dosti sega toga nafčili vu srejim školama kaj bi znali kaj je dobro za nas, a kaj neje. Ne treba senjati drača, oliti kukolja, med tem mladim ljudima. Trebali bi se minister i ministarstvo za škole i đake pobrigati kaj bi se naša deca čuda vejč vučila o našoj bližešoj povjesti kaj bi znali kak je i de nastala Lepa naša i da ne morajo iti predauko nazaj, kak to ido naši antifašisti, kaj bi to zazvedili. Jerbo i oni bodo zutra meli svojo deco šterima bodo morali reči istino. Ako ne znaš kaj je bilo kak bodeš unda to drugima rekel?
Jožek Radnik