Kaj so to Farizeji???
Još nam je niti tua umjetna inteligencija, očem reči, umjetna pamet štera je skrita v našim kompjuterima, tabletima ili pak mobitelimane bila pri roki, a mi smo znali da so Farizeji licemjeri, dvolični ljudi, ljudi šteri jeno mislijo, drugo govorijo, a tretje delajo. Tak to bar piše v rečniko za stranjske jezike. A Farizeji so mi pali na pamet dok sam videl žene i sestre z Udruge zatočenih i nestalih hrvackih branitelov naše županije kak med prvima vužižejo sveče pre spomeniko poginulim i nestalim braniteljima vu našemo čakoskomo parko, šteri još nema križa polek sliki poginulih i nestalih jerbo so i članice protiv toga kaj bi se križ postavil pre spomeniko našim vitezovima i herojima, šteri so ratuvali z krunicom okoli šijaka. O tomo sam več pisal na ovomo mesti, pisal sam ruon tak kak so naše žene z te Udruge bile na izleto v Beogrado i kak so se išle pokloniti Ljubučici beloj v Hiži cvetja, a ve sam pak vam štel reči kak so nešterne žene predi nek so tu prinas v Čakovco, pre spomeniko našim poginulim i nestalim braniteljima vužgale sveče bile v Kumrovco za Den mladosti i tam vužgale sveče (pak) Ljubučici beloj. Najte me krivo razmeti, ali ne bi vam tu znal kaj reči, ali ne muoči služiti i Božeko i vrago. Ruon tak idejo v cirkvo, idejo k meši, a dok dojdejo vum z cirkve unda so protiv križa. Dok sam to se napisal umjetnoj inteligenciji, očem reči, umjetnoj pameti, napisala mi je eror i ne sam dobil nikšega odgovora, ako kaj dojde bodem vam ga napisal.
Kaj je Gojko kanil, a kaj je napravil?
Dok sam napisal Gojko na pameti mi je bil ne tuliko stari kuliko dugovečni (21 leto) esdepeov i rečki gradonačelnik Gojko Obersnel. On mi je došel v pamet dok me teca Franca pitala, a ja pak je pitala jena pajdašica i vrtna soseda Štefa, kaj bode z tem Galebom, negdašjim brodom Ljubičice bele z šterim se je on vozičkal po sveto i kak se teca zmisli da se je još negda pripovedalo kak se je na Galebo drug Ljubičica bela štrumfal z Sofijom Loren. Ne znati je li se Sofija toga zmisli kak je još negda ili kak se to veli, vu ono vreme, bila na Galebo. No, pustimo Sofijo i idemo nazaj na Galeb. Galeba so zvlekli vum z morja 1947. leta dok je još na sebi mel nemačko zastavo, a unda si ga je drug Ljubičica bela privatizeral, dal ga poprajti i od jega je napravil „ploveče zabavište“ za nesvrstane da bi ga drug Gojko, pred 17 let zvlekel z stare krame. Trelo je od jega naprajti turističko atrakcijo, a za ve je postal „rečki Obrovac“, očem reči vreča bez dna. Nejpredi da bode pot od staroga broda do turističke atrakcije koštal cirka 30 milijonov kuni, a kuliko se ve vidi niti 30 milijonov ojerov ne bode dosti. I ne sam to, dok bode brod popravleni nišči se ne rivle kaj bi ga hasnuval; niti turistički težaki, a niti pak furešti. Neje se niti Sofija javila kaj bi štela dojti pogledati mesto svoje mladosti? I ne sam to, Gojko je zgubil izbore, a neje kanil tak da je niti nikomo ne povedal po šteroj bode to relaciji Galeb plaval, koga bode vozil i kam. Negda se je pripovedalo da bodo Kinezi hodali na Galeb kak z križecom, ali kak je Mao odišel k Božeko na račun več niti Kinezi ne pitajo za Galeba, a niti pak za Ljubičico belo. Kak se šepetujilo pod čakoskom grackom vurom predi nek so jo zrušili, a to je čula i teca Franca, Galeb je trebal voziti od Reke do Golog otoka i nazaj, ali na Golom se turisti morejo sam špancerati jerbo nega niti jenoga kafiča, niti štacuna, a kaj se namo o restorano spominali. A rečite mi, prosim vas lepo, kaj interesera lačnoga turisto? Kaj? Hoda okoli i išče de si bode kaj pojel. Obersnel i družina so kupili Galeba, a bole da so peneze hitili v zrak bar bi ftiči nebeski meli od toga hasna, a ve nikaj od toga. Brod jemle placa v rečki luki, nišči ga ne nuca, sam se mota drugim brodima tak da ga je turski brod skaramboleral vu februaro jerbo je zel premaloga anšlaga. Ak je tak, veli teca Franca, bole da je ostal v morjo, kak Titanic. Najbrž bi to bilo nejfaleše. Tak bode to ona rekla i pajdašici Štefi.
Svecko labodoritaško prvenstvo je hapilo
Dugo se je na to čakalo kaj počne ovo labodoritaško prvenstvo po novomo recepto. Nejpredi labodoritaši igrajo v tri države Severne Amerike i to v Kanadi, Meksiko i SAD i prvič na prvenstvo igra 48 reprezentaciji kaj znači da bode trajalo duže od mesec dni. Pak i mora tak dugo trajati da igra tak čuda reprezentaciji.
Nejčudneše je kaj na prvenstvo igra reprezentacija države Curacao, a to je otok – država v Karipskom morjo štera ima malo vejč pučanstva, stanovnikov (155.000) nek Međimorje naše malo (105.520), a skorom je na pol menše (444 km2) od Međimorja (729 km2). Oni so na Sveckomo prvenstvo, a naši međimorski labodoritaši v Tretjoj ligi.
Štel sam vam pravzaprav reči kak si oni šteri so protiv naši Vatreni, protiv naši Kockasti pak hračkajo po našemo izborniko sih naših izbornikov Zlatkijo Daličo. Dok ne znajo kaj bi mo zbajali unda pišejo i pripovedajo kak je pelal v Ameriko krive igrače, a one prave je doma ostavil. Štel bi tu sam reči da je Dalič v zadji osem – devet let navek mel na evropskim i sveckim prvenstvima krive igrače pak je ipak osvojil srebrno ili pak bronasto želencijo. Saki izbornik si jemle igrače šteri mo nejbole pašejo kaj bodo igrali onak kak si je on to zamislil. A kuliko vidimo do ve je navek mel prave igrače i postigel je nejbolše rezultate. Na Sveckomo v Rusiji je zgubil sam jeno utakmico i to ono protiv Francozov vu finalo, a v Kataro ruon tak jeno i to ono protiv Argentine v polofinalo. A se ostalo so te jegovi „nevaljani“ igrači ne zgubili. Dej Božek kaj bode i ovo leto tak v Ameriki. Pripovedajo „naši kibici“ kak nikak ne igramo, kak so nas Belgijanci deli v mali žep, a sosede Janeze smo pobedili na jedvite jade. Sam dragi Božek kaj je Luka Modrič zabil gola pak so jegovi protivniki ve, za jen čas, hitili puške v kuruzo. Ne znajo kak je to dok moraš dobro igrati, moraš sim igračima dati šanso, moraš pobediti i moraš skriti kaj Englezi ne bodo vidli kuliko prav zaprav vrediš. Bodete priznali da je to ne baš tak lefko.
Pak nebre biti Zlatko Daličov dober izbornik čim ima vikendico na Dravi v Kuršanco i to na črno, bez paperov. To bi mo još mogli oprostiti, ali to kaj je z Livna i kaj se je dotepel prek meje k nam v Lepo našo i kaj pobjeđuvle z našim Vatrenim, to nikak.
Jožek Radnik