Naši sosedi prek Mure so zebrali
Minuli tjeden smo ne bili kak bi to čovek rekel jako najgerek što bode itak pobedil na izboraj pre našim sosedima v Hungariji, ali smo furt pogledavali prek meje kaj se bode pripetilo posle šesnaest let vladavine Viktora Orbana, šteri je bil desničar i svadil se je z celom Evropom, no ne ruon z celom Evropom nek z Evropskom unijom jerbo je držal štajngo levičaro Putinu vu jegovomo rato z svojim prvim sosedima Ukrajincima. Orban je tu bil kontra Evrope i neje podržaval sankcije štere je Evropa odredila za Putina i Rusijo, a Brisel pak je Orbano ne daval nikše penez iz zajedničke Evropske kase kak je to delal z sima drugima. Što je bole prešel, očem reči, je li je Mađarska prešla bole ili pak je odišla po riti k meši kaj se dotikavle Rusije i Evrope to sam Orban zna.. Zna se da navek ak nešči za nekoga druka to se dela zato kaj od toga ima nekšega hasna (osim ak navinja za Hajduk) pak je tak najbrž Mađarska mela hasna od Rusije sam zato kaj jo je Orban podržaval. Brzčas je tu bilo i nekaj drugo v pitanjo, a ne sam fal ruska nafta i ruski plin. Orban je bil trdi desničar i neje puščal izbeglice v Mađarsko kaj mo ne bodo delali nereda, a držal je štajngo levičaro Putino? Zmislite se kak je pred cirka 6-7 let napravil ogrado od žice okoli cele Mađarske.
Kaj se izborov dotikavle najbrž so Mađari ne pozabili kak so Rusi žnjima špotarili dok so bili skupa vu Varšavskomo pakto, pak jim nekaj takšega znova ne tre. Ali jiv je na to moral nešči zmisliti i najbrž jim je to Magyar rekel kak Orban preveč druka za Rusijo i da jiv (čitaj: Mađare) Evropa čaka z raširenim rokama i punom kasom?
Znate kaj, ipak mi nekaj nejda v glavo, Orban je bil desničar i zgubil je izbore od drugoga desničara Petera Magyara, a naši levičari feštajo? Nekaj je tu ne kak dragi Božek zapoveda! Znuomo da so se naši premjeri posvadili z Orbanom ne sam okoli politike prema Rusiji kaj bi rekli prema Ukrajini nek smo se mi našli na sodo z Mađarima zbog radi INE i MOL- a i toga soda smo mi zgubili. Prepovedalo se da je na sodo pravica bila na mađarskoj strani i zato so Mađari nigdar ne dali Hernadija, šteri je tobož dal mito Ivijo Sanadero, a naš Ivo je završil v Remetinco jerbo je zel mito. A Ivica Račanov, Slavek Liničov i Štef Mesičov, šteri so zaprav prodali prvi frtalj INE Mađarima jiv se je nikaj ne pitalo. Rekli bi, oprali so si roke kak Poncije Pilat!
Kak bode nam ve da je Orban odišel a Magyar došel?
Sima nam je poznato kak je Viktor Orban vu zadji kištici svojega radnoga stola mel karto Velike Mađarske i sako drugo noč je senjal kak bodo Međimorje naše malo, Podravina do Baranje, skupa z Baranjom znova pod jegovom zastavom. On je to skrival, ali ono kaj je delal je govorilo o tomo kaj po noči senja. Znuomo da je napravil labodoritaško igrališče v Osjeko i kak so osječki labodoritaši živeli od mađarski penez. Neje to on napravil sam zato kaj so mo Osječani bili lepi nek zato kaj je računal da bi jenoga dneva mogel znova vum zeti karto Velike Mađarske. A zakaj je zgubil izbore? Najbrž se je preveč naslonil na Trampa, a nišči na sveto nema rad Trampa ve dok „dela reda“ i ratuje po celomo sveto. Oče biti svecki policajec i delati reda onak kak jemo (čitaj: Amerima) paše. No, idemo mi nazaj v Mađarsko. Kuliko se ja razme vu ovo našo i evropsko politiko nam bi trelo biti bole kaj se dotikavle ne sam nas i naši sosedi Mađari nek i naši sosedi Srbi. Poznato nam je kak so Orban i Vučič skupa drukali za Putina i da je Orban podržaval Vučiča ruon tak kak i Putina jerbo je i Putin podržaval Vučiča, a Vučič je bil ne sam srečen nek i zadovolen kaj ga ovi dva podržavlejo. Magyar je več rekel, tak se bar pripoveda, kak se toplo nadja da se bodemo žnjim seli za stol i dospomenuli o semo kak se pravi sosedi kak pajdaši morajo dospomenuti. Moramo deti roko na srce i reči kak nam to paše jerbo ak se nekaj pohabi v odnosima z našim sosedima na istoko (čitaj: Srbima) unda nam je jako važno da so naši sosedi na sevro (čitaj: Mađari) pravi pajdaši. Verjem, očem reči, siguren sam kak smo ne pozabili kak so nas Mađari podržavali dok smo 1990. zafremali Lepo našo, a več 1991. leta smo jo morali iti branit. Tu so nam Mađari čuda pomagali; prek Mađarske smo se vozili, švercali smo oružje, pobrigali so se za naša prognanike… A to nesmemo nigdar pozabiti, a i šteli bi kaj bi tak i dale bilo ak bi se nekaj pak, nedaj Božek, pohabilo.,. A to ak još nekaj imamo nerešeno okoli INE I MOL-a to moramo rešiti kak pravi sosedi, saki nek pazi na svoje interese, a ne kaj bi mi ve šteli isprajti se ono kaj smo zahuzali z INOM: Bele noči vu Sibiro, naftna polja vu Siriji, malverzacije Vanje Špiljka, Mike staroga sina itd.
Nekaj tu ne razmem, levičari slavijo pobjedo Petera Magyara v Mađarskoj, a vodeči ljevičar, precednik Lepe naše Zoran Zoki Milanovič se je zaprl na Pantovčako, spustil je rolete i z nikim se ne spomina jerbo je jegov libling i pajdaš Viktor Orban odišel po riti k meši.
Šalabahteri v labodoritanjo
Verjem da znate kaj so to šalabahteri? Pak si smo jiv nucali dok smo v školo hodali. Nišči je ne bil tak spameten kaj bi mogel se škole zbaviti bez šalabahterov. Posle škole smo se zišli z šalabahterima v politiki de so nam političari na paperčeke (čitaj: šalabahtere) napisali komo nek damo svojega glasa, a kaj bodo oni srečni. Se je to onak kak mora biti, ali da se bodemo z šalabahterima zišli i vu labodoritanjo tomo sam se ne nadjal. Ne znam kuliko ste v pamet zeli što je i de mel šalabahtere na labodoritaškoj utakmici? Bilo vam je to na kvalifikacijama za Svecko prvenstvo dok so vu Zenici igrali domaći labodoritaši, očem reči, reprezentacija BIH i zapadni sosedi Talijani. Kak je nešči moral pobediti jerbo je sam pobjednik mogel iti na ovoletošje Svecko prvenstvo v Ameriko, posle 1:1 nakon 90 minot igrali so se produžetki, a kak so niti „Bosanci“, a niti pak Talijani ne zabili gola morali so se streljati elveri. Vidite, tu so se pojavili šalabahteri. Najme kaj, golman taljanske reprezentacije Donaruma je mel šalabahtera na šteromo si je napisal kam šteri bosanski labodoritaš strelja elvera. Što zna kak bi to se bilo završilo da je nekši domaći dečec ne fktral šalabahtera Donarumi tak da so, na se zadje, pobedili domaći labodoritaši i kak pobedniki bodo ovo leto igrali v Ameriki na Sveckomo prvenstvo. Da je Donaruma nucal šalabahtera govori nam podatak kak je ne obranil niti jenoga elvera, a Bosanci bodo dečeca, šteri je fkral šalabatera, pelali z sobom na Svecko prvenstvo. Što bi tekel da so šalabahteri tak važni v labodoritanjo?
Jožek Radnik