Si poti vodijo vu Terbotz!
Pred dva tjedne si so poti vodili v Železno Goro v restoran Terbotz familije Jakopič. Ali ne ruon v restoran jerbo restoran dela več duže od dvajsti let nek v novi starinski hotel šteri je zlišpani od stare kurije. Dugo je tua stara kurija čakala kaj dojde na red kaj jo gazdi Jakopiči zrihtajo kaj bode i ona tak fajna kak je to restoran prek pota. Dosti je cajta minulo i na se zadje se je kurija fčakala jerbo je trelo na kup nagrnuti hajdi penez. Znate kak je to, neje lefko z stare podrte kurije, štera je bila na milost i nemilost zobo vremena, naprajti hotela kaj bodejo si meli voljo v jega dojti. Saki je nekaj penez dal, nekaj Evropa, nekaj naša Vlada, a nekaj familija Jakopič tak da je pred dva tjedne vrpca prerezana i hotel je počel delati. Vrpco so skupa prerezali gazda Branimir Jakopič i premjer Andrej Plenkovičov, bilo je tu šest – sedem ministrov i čuda ljudi sake fele šteri so bili pozvani. Došla je i Zrinska garda z Čakovca jerbo so gardisti pred nekaj vejč od dvajsti let stanuvali vu restorano Terbotz i otod so kak mlada udruga, očem reči, mlada garda hodali na pot dugi prek dvajsti let. Bar do ve, tak da je bil red da i oni dojdejo i dočakajo se domače i stranjske goste i uzvanike i ulepšajo toga dneva, toga svetka šteroga je familija Jakopič jako dugo čakala.
Kak smo več rekli hajdi je penez, nekaj meje od pet milijonov ojerov, ponucano kaj se tua kurija z potrtim krovom zlišpa i to tak kaj ve zgledi onak kak je negda zgledala, ak ne i lepše dok je bila mlada, očem reči, nova. Moremo reči da se ve Jakopiči imajo kaj je negda, dej mo Božek duši lefko, gazda Martin vu svojoj poduzetničkoj i prefriganoj glavi splaneral. Verjem da nam je sima, šteri smo poznali gazda Martina žal kaj je i on to ne doživel. Jakopiči so nejpredi meli gorice i z svojim vinima so se navek štimali, a i denes je ne drugač, jerbo za jiva vina zna cela Evropa, restoran dela več duže od dvajsti let, a ve je tu novo zlišpani starinski hotel z semi, kak se to veli pratečim sadržajima tak da saki od nas, pak i oni nej bole haklik i šegavi morejo najti se kaj nucajo i očejo. Lepo je rekel gazda Branimir kak smo si pozvani, kak so sima vrata otprta i kak nas jegova familija, štero pod komandom drži gospođa Nada, a tu so i sini Filip, Martin, Vinko, dečki kak od brega odvaljeni, čaka i bode se naprajla kaj bodemo si zadovoljni.
Kuliko sam mel za čuti i premjer Plenkovič si je več rezerveral apartmana za prvi vikend da bode mel fraj, a to bode čim Amerika i Iran prestanejo ratuvati.
Kak so to se Jakopiči lepo zlišpali i dale bodo si poti vodili vu Železno Goro očem reči, v Terbotz. Mi Međimorci imamo još jenoga konja za trko z turističkim težakima Lepe naše i ne sam Lepe naše.
Spomenden pogibije Petra Zrinskog i Frana Krste Frankopana v Čakovco
Skorom celi april se obslužavlejo Dnevi Međimorske županije i v tem dnevima je saki od nas mogel najti nekaj kaj mo je po volji i kam je išel. Bilo je tu sake fele festi kak za deco, tak za školarce, za sredje generacije, a bormeš i za stareše. Sima nam je poznato da je Den Međimorske županije zadjega, očem reči, 30. aprila, a obslužavle se na spomen tragične pogibije našega hrvackoga bana Petra Zrinskog i markiza Frana Krste Frankopano vu Bečkomo Novigrado pred 355 let, točneše 30. 04. 1671.leta. Kak so zagrebačko katedralo još ne poprajli posle potresa pak je ne muoči nutri kaj bi se tam poklonili kostima Petra i Frana, štere od 1919. leta tam počivlejo unda je glavna državna proslava Spomendana bila v Čakovco, a organizerala jo je čakoska Zrinska garda. Ovo leto je Garda nejpredi preslavila dvajsti pet let kak je zafremana i kak vodi brigo o Zrinskima, Frankopanima i branitelima i na izložbi postavlenoj o toj obletnici nam pokazala sabljo Nikole Šubiča Zrinskog z šterom se boril pod Sigetom. Posle, v soboto, dopelala v Čakovec, i to na Fratarski trg, skorom se povjesne postrojbe z Lepe naše, došle so tri postrojbe z Mađarske i jedna z Bosne i Hercegovine. Došli so i Bokeljani. Bil je jeden jako lepi, ak ne i nejlepši mimohod po Čakovco tak da se si Međimorci, šterih je ne ruon preveč došlo vu soboto v Čakovec, morejo žnjim štimati. Postrojbe so hodale po celomo Čakovco, a korako so jim držali čakoski pleh bandisti. Biskup u miro, mons. Josip Mrzljak je v glavni čakoski cirkvi odslužil mešo zadušnico za naše tragično stradale heroje, a posle so Štolceri uprizorili „Oproštaj“ kaj smo vidli kak so se Petar i Fran opraštali od svoje žene i sestre Ane Katarine. Gardisti so ne pozabili na naše poginule branitelje pak so pre spomeniko položili venca i saka postrojba je vužgala svečo kaj so jim zahvalili za jivu žrtvu, a i obljetnica VRO „Bljesak“ je čistam blizo.
Mimohod je završil pre spomeniko „Oproštaj“ vu dvoriščo Staroga grada de so si glavneši položili vence i vužgali sveče: Glavni pokrovitelj obilježavanja precednik sabora je poslal svojega izaslanika, poslal je i premijer svojega, ministrica kulture je poslala svojo izaslanico, hrvacki generali so poslali svojega izaslanika, bil je tu naš župan Matija Posavec, bila je i čakoska gradonačelnica, bilo je tridesti gardistov, članovi Matice, Družbe „ Brača hrvackoga zmaja“. Pred kraj so bili i govori, a posle nam je zbor Josip Slavenski spopeval „U boj, uboj…“, a oglasili so se topi, kubure i puške povjesnih postrojbi. Se kak so naši heroji i mučenici zaslužili.
Bili smo i v Bečkom Novigrado
Drugi den se je putuvalo vu Bečki Novigrad kaj smo se i tam na mesti de so jim odsekli glave poklonili našim hrvackim mučenicima Petro i Frano. Tam so nas dočakali naši gradiščanski Hrvati, dočakali so nas dečki z našega Veleposlanstva vu Bečo, a došla je i dogradonačelnica Bečkoga Novigrada. Komemoracija je bila pre spomeniko Petro i Frano vu glavnomo grackomo parko, šteroga je pred sedem let postajla Zrinska garda Čakovec. Si šteri so govorili (precednik Garde, domača dogradonačelnica, čakoska gradonačelnica, naš veleposlanikv Bečo) so se zafalili Gardi za spomenik i za organizacijo hodočašča, a sima šteri so došli kaj so ne pozabili na naše heroje i jivo žrtvo. Posle komemoracije pre spomeniko si smo skupa odišli vu katedralo v šteroj so nejpredi bili zakopani Petar i Fran i tu je prečasni Ivan Herceg, nedelski župnik, dekan i gardin duhovnik služil mešo zadušnico. Na meši so popevali cirkveni zbor z Puščina i dečji zbor z Nedelišča tak da je meša bila popevana i svetešja. Na krajo meše smo otpopevali „Lepo našo“ i tak pozdravili domovino, a rezišli smo se z pozdravom Zrinske garde NAVIK ON ŽIVI KI ZGINE POŠTENO!
Jožek Radnik