Ribice na Veliki petek pred glavnom čakoskom cirkvom
Minuli tjeden smo preslavili nejvekšega krščanskoga i katoličkoga svetka, a to je Vuzem, den da je uskrsnul Isus Krist naš Spasitelj. Morem slobodo reči naš Spasitelj jerbo smo mi Međimorci, a tak i mi Čakovčanci krščani i to katolici. Tak je bar bilo po zadjemo popiso svekolikog pučanstva štero živi v Čakovco i na ovom falačko zemle med dvemi vodami. Predi nejvekšega svetka Vuzma bila je Korizma, štera je trajala četrdeset dni, počela je na Pepelnico, mam posle fašnika, a završila je na Cvetno nedelo. Posle Cvetne nedele je Veliki tjeden, dnevi priprave za Vuzem. Cela Korizma so dnevi prepravljanje za nejvekši katolički svetek, nega gostuvanja, veliki fešti, a posebno se to svetkuje vu Velikomo tjedno. To so dnevi molitve, posta, pokore, spovedi, pomirenja z Božekom, što je to ne predi zbavil. Se se to zbavlja v miro i tišini, a ljudi so nejponizneši vu zadje tri dni pred Vuzem, to je Vuzmeno trodnevlje da se ne delajo nikši vekši posli, nikše zabave, ne rovle se v zemlji, zvona po cirkvaj so zvezana i ne zvonijo, a Veliki petek je jedini den vu leto da ga ne v cirkvaj meši. A unda čakoski gracki oci i turistički težaki organizerajo na Fratarskomo trgo, pred čakoskom glavnom cirkvom, pečenje i delidbo ribici i to celo dopolne. Nemam vam ja nikaj protiv ribici, a posebno ne na Veliki petek dok je post i dok se meso ne je, ali ruon pred cirkvom, to mi nikak nejde v glavo. V cirkvi Isus leži v grobo, ljudi dohajajo na Božekov grob na spominek i molitvo vu tišini, a vuni se pečejo ribice. Stoprocentno sam siguren da bi ljudi došli na ribice bilo kam drugam de bi to čakoski gracki oci organizerali, a ne kaj so to ruon pred cirkvom naprajli. Kak daj se norca delajo onima šteri so polek ribici išli v cirkvo. Napriliko, moglo se je to naprajti na Macanovom domo šteri je čistam blizo centra grada i ne bi smetal pobožnima. Moglo se je, ali se je ne.
No,, neje to se…
Sima nam je poznato kak se vređuvle glavni čakoski Trg i tam so se ribice ne mogle peči kak je to bilo sako leto, ali je ne bilo dosti kaj so se pekle i delile ribice na trgo pred cirkvom nek so dopelali i tamburaše šteri so tu napravili pravoga „derneka“. Rečite mi kakša je razlika izmeđo ove velike fešte pred cirkvom i onoga suđenja Isuso v Jeruzalemo pred nekaj vejč od dve jezere let. Unda so se ljudi zabavljali, nesam siguren je li so meli tamburaše, ali so osudili Isusa na smrt. „Dernek“ pred cirkvom na Veliki petek je nigdar niti v ko,unizmo ne bil. Ak smo krščani, a jesmo, tak smo se bar dali zapisati, ak smo katolici, a jesmo i uskrsnico smo si zeli unda bi se trebali nekšega reda držati. Več sam rekel, nemam nikaj protiv ribici na Veliki petek, ali ne pred cirkvom. Jega čuda drugih mesti, a ne tu de smeta onima šteri Velikoga petka provodijo vu molitvi, posto, pokori i v tišini. Nemam nikaj protiv tamburašov, ali ne na Veliki petek i to pred cirkvom. Tuliko ga je drugi dnevi da tamburaši morejo igrati do mile vole, ali ruon na Veliki petek i to pred cirkvom? Komo je itak to na pamet palo?
Ve je bila prilika
Gledim saki pot dok idem mimo glavnoga čakoskoga trga kak težaki rovlejo v zemlji, kak betonerajo i kak prepravljajo terena kaj bodo jenogadneva, zlišpali toga našega glavnoga trga onak kak so si to naši gracki oci zamislili. Si velijo da to bode lepo. Ne bi se štel mešati, ali bodemo vidli za dva tri mesece da to bode gotovo. Bar tak gracki oci velijo. Meštri sam delajo i z nikim se ne spominajo. Nemajo čas. No, štel sam pravzaprav reči kak je ve bila prilika kaj bi bili poslikali z dronima i sonderima kakše se instalacije so v zemli spod pod glavnim trgom. Najme kaj, ve se je se počistilo kaj je bilo na trgo i moglo se je na den – dva pozvati ljude šteri se vu to razmijo, a i imajo meštrijo, nek poslikajo i nek nam nacrtajo kaj bodemo znali, i to zanavek, kaj je itak v zemlji pod glavnim čakoskim trgom zakopano? Mogli smo to naprajti, a nesmo! Ve dok bodo meštri celoga trga zbetonerali i to z armeranim betonom unda več ne bode moči poslikati se ono kaj se ne vidi. Kak veli teca Franca, bila je prilika, a nesmo jo skoristili, nesmo se zmislili, a ve ak bodemo nekaj šteli naprajti to bode isto kak da idete v pondelek k nedelni meši. Malo ili pak čuda prekesno. Sejeno. Sigurno je sam da je prekesno.
Minuli tjeden je v Dalmaciji tak puhala bura kaj je Dalmošo Šimejo bivšo ženo nazaj donesla.
Čakoski brica Jurica šiša i precednika
Vu prošlomo brojo naši novin ste mogli zazvediti što je brica Jurica, de ima svojo brijačnico i kak dugo več lišpa moške z Čakovca, a i se druge šteri dojdo v jegovo brijačnico. Makar je Jurica mladi, ali več dvajsti let dela svojega posla, a zvučil se je pre negdašjemo glavnomo čakoskomo brijačo i majstoro svojega zanata Hinkijo. Kak sam več rekel kaj što je došel po svojo frizuro k Jurici vu veštet i nišči je ne odišel kaj nej bi došel na red sam ak je malo počakal. Verjem da nam je sima poznato kak se je v brijačnici navek čakalo na red i dok se čakalo unda je dohajalo do kajkakši spominki jerbo navek je bilo oni, kak je to i denes, šteri so drukali za Dinamo, a i oni kaj navijajo za Hajduk. A čim se zazvedi što za koga navija spominki počnejo makar smo kvarni za kajkakše spominke, štiklece, moške tajne i fale o ženskama jerbo mobiteli dosta toga poberejo. Jurica vam bode to potvrdil k jemo, več na leta, dohajajo mladi i stari, črni i seri, domaći i stranjski… Ne bodete veruvali, ali Jurica je počel šprehati i engleski, mora ak se oče z Filipincaj i Nepalcaj spominati. K jemo dohajajo gvardijani i župniki, dohajajo gospodarstveniki i političari kak oni vekši tak i ovi naši, dohahjo športaši, a i precedniki. Minuli tjeden, za Vuzem, je na priliko došel kaj mo Jurica napravi svetešjo fizuro i precednik Zrinske garde.
V Čakovco je otprti novi restoran z mladaj i frčnaj konobaricaj. Ober šanka so obesili tablo: – Prosimo goste kaj nej petali konobarice z masnaj rokaj!
Jožek Radnik