30 let od kraja Domovinskoga rata
Ovo 2025. leto smo obslužavali 30 – letnice završnih operacija naše Hrvatske vojske v Domovinskomo rato. Kak so odnavek si svecki ili pak vekši rati trajali štiri leti tak se i računalo da bode i te naš rat vu šteromo smo se borili protiv četnikov i jugosoldateskebode išel pomalem krajo, Tomo so čuda pomogle i jedinice naše Hrvatske vojske štere so bile se brojneše i spremneše da ne popustijo niti pedlja hrvacke zemlje četnikima, šteri so halosili prek naše meje i šteli so se one place de so živeli Srbi po onoj jivoj: de je i jeden Srbin tu je i Srbija. Nejpredi smo ovo leto obiležili tridesti letnico VRO Bljesak vu šteroj je oslobođena Zapadna Slavonija, očem reči, Jasenovac, Okučani, Stara Gradiška. Posle Bljeska je bila veličanstvena VRO Oluja vu šteroj je oslobođen Knin, glavni grad Republike Srpske i pobunjenih Srba i nejvekši dio okoperanih područja. No tu je rat ne završil jerbo so se četniki z jugosoldateskom ravnali kaj vrnejo se ono kaj so v Oluji zgubili. No, neso niti naši braniteli dremali pak so jiv seposot dočakali i zbili jim z glave da bodo gospodarili z teritorijom Lepe naše, Posle je bila akcija Maestral skupa s HVO i Armijom BIH i na zadje i Južni potez. Naši braniteli, saka jim čast, neso šteli odstupitri niti od pedlja zemlje šteri je, posle raspada Juge pripal Lepoj našoj. Kak je leto išlo krajo tak je međunarodna zajednica skupa z Amerima pripravljala mirovne sporazume. Nejpredi je pripravleni Daytonsku sporazum šteri je sredinom decembra potpisani v Parizo na Pariškoj konferenciji i posle toga je nastal mir. Osim zainteresiranih država Pariškoj konferenciji je bila prisutna i SPC kaj pojača želje Srbije šteri so do zadje vure ne šteli odustati od nekih dijelova Hrvatske i Prevlake. Ali precednik Tuđman je tu ne odstupil niti milimetra i zato je Lepoj našoj pripalo se ono kaj je naše od stoletja sedmog. No, kuliko znuomo Srbi so te sporazume v Parizo potpisali z figom vu žepo jerbo još denes jim po glavi hoda Srpska krajina, još navek sejajo Prevlako, a suze jim idejo na oči dok jim spomenemo Baranjo. Tu je nejglasneša Srpska pravoslavna cirkva i zato nikak neče dopustiti kaj bi mi v Lepoj našoj meli svoj Hrvacko pravoslavno cirkvo, a ne kaj naši pravoslavci morajo hodati vu Srpsko pravoslavno cirkvo.
V Parizo so od 12. do 14. decembra 1995. leta potpisani mirovni sporazumi po šterima je rat završil, a Juga je za veke vekova odišla v ropotarnico povjesti, očem reči, po riti k meši. Fala prvomo našemo precedniko Franji Tuđmano , šteri je uz pomoč naših tajnih službi se znal kaj Srbi očejo, kaj se skrivečki dogovarjajo i kaj bodo iskali. Na krajo so se plakali kaj so ne prihvatili ponuđeni plan Z-4 po šteromo bi kaj kaj toga meli, ali jempot dok američka baba odide z kolači unda si več nebreš pomoči. Kak veli teca Franca: – Prekesno je v pondelek iti k nedeljni meši!
Teca Franca je rekla: – Si problemi se morejo nebole rešiti z dobrom žganicom. Ak nešternoga problema nebreš rešiti to je siguren znak da je žganica ne dobra.
Čiji je led bole škliski ??
Za ovoletošji Advent so čakoski gracki oci preselili klizalište nazaj na Macanov dom de je negda bilo, očem reči, de so se čakoski sredji naraštaji navčili klizati. Čakovec je svoje prvo klizalište mel pred šezdeset let na terenima negdašje Pedagoške akademije i Druge osnovne škole. Unda so zime bile čuda jakše pak se je šklizalo po prirodnomo ledo, a dok je sunce presvetilo unda je led, skupa z klizačima odišel po riti k meši. Vu zadje vreme, očem reči, par let nazaj, se je klizalište selilo z Macanovoga doma na Trg republike, a ve pak nazaj, Saki gracki načelnik je napravil leda tam de je on mislil da bode nejbole škliski i da ga bodo čakoska deca saki den nucala. Kak sam vam več rekel, Lesi se je vrnul dimo, očem reči na Macanov dom. No, tu se je nekaj pohabilo, em je klizalište nekše malo, em je led ne kak treba i na se zadje nega dece i stareših na klizanjo. Nebremo reči da naši ljudi nemajo voljo za šklizanjem jerbo jiv saki den morete najti vu Varaždino kak tam trošijo svoje vremem i svoje peneze. Varaždinci služijo, a mi nikaj. Ne znati zakaj smo naprajli krova ober klizališta, šteri nam je donesel sam nevolo, jerbo, ovak dok deca vidijo svoje pajdaše kak se šklizejo unda i oni idejo. Vu varaždino je ne sam pun led nek i si kafiči okoli i čeka se na red seposot. Nebrem veruvati da so ve Zagorci (čitaj: Varaždinci) spametneši od nas, a hodali so se klizat k nam na naše prvo klizalište. Najbrž smo negdi zahuzali i to ve dok leda napravimo i dok sunce sveti. Nekak si gruntam da je ne dobro rešeje kaj se plača jena vura, a kližeš se 45 minot. Varaždinci to čistam nekak drugač imajo i nišči ne gomba. Škoda kaj smo pak zgubili jeno leto (čitaj: zimo) i pomogli Varaždincima kaj imajo nejlepšega Adventa v Lepoj našoj. A mi se žjiv norca delamo kak je Varaždin več 850 let nejpoznateši po tomo kaj se črez jega ide za Međimorje i Čakovec.
Nedelišče se po Božičnomo koncertlino pozna
Dok mine Božični koncertlin v Nedeliščo unda smo stoprocentno sigurni da nam je Božič pred vratima, na poceko. Tre sam vrata otprti i pustiti ga nutri. Tak je bilo i ovo leto., iskala se karta vejč jerbo čim karte dojdejo to odide za par dni. Makar ga ovo leto ne bilo stiski za karte jerbo je se išlo prek Interneta, očem reči, prek mobitela. Kuliko vidimo Nedeliščanci so na se mislili tak da se je šporcka dvorana Atona napunila, kak bi rekli, prek noči. Branimir Magdalenić je zebral orkestra, a pjevači i pjevačice zbora Vrhovski so spremni več 26 let kuliko koncertlini trajejo. Bilo je i gostiju i si so bili takši kakše si čovek more sam poželeti. Bil je tu naš Priločanec Filip Hozjak, tenor na glaso, a žnjim i naša svecka primadona, sopranistica, Evelin Novak, a kaj Tajči, štera je došla z Amerika, niti ne bodem spominjal. Fajna i lepo popevle kak i navek. Morem vam reči da so Filip i Evelin nejlepše popevali dok so se za roke držali. Nekaj si gruntam da bi mene Evelin prijela za roko i ja bi propjeval. Nedelski koncertlin je kak staro vino, sako leto je se bolši i bolši. Saka čast načelniko, Branimiro i sima drugima šteri tu imajo svoje prste. I ne sam prste!
Jožek Radnik