Znuom da smo ne preveč zadovoljni z premijerom Drašekom Plenkovičovim i z jegovom Vladom, očem reči, jegovim ministrima jerbo malo, malo pak nešterni minister skrene z pravoga pota i krene po poto pomirenja prema Remetinco, ali, kak veli teca Franca, mogla bi nam se pripetiti još vekša nevola štera bi došla na svetlo dneva ak bi cugle vlasti vu svoje hirave leve roke prijeli SDP-ovci i jivi pajdaši. Veli teca Franca da ak bi cugle vlasti vu svoje roke prijeli SDP, Moremo i jiva pajdašija to bi bil kraj, ali ne HDZ-jo nek Lepoj našoj. Ovi naši levičari bi jo za kratek čas zahuzali i pripojili nekomo na istoko sam kaj nej meli brigo žnjom i z jenom desnicom kak smo to mogli čuti ono minulo nedelo na „maršo“ v belom Zagreb grado, Splito, Puli i Zadro. No, nadjam se, toplo se nadjam, da nas ne bode nekaj tak hudoga obletelo kaj bi na izborima zebrali Sinišo Hajdaša Dončiča i jegovo pajdašijo jerbo bi to bil kraj nečega kaj smo čakali od stoletja sedmog. Odnegda se zna da jena nevola nigdar ne dohaja sama tak da bi z Hajdašom došle Dalija, Sandra, Anka, Rada, Ivana, Kata, Sanja…i kaj ne bodem dale nabrajal, a takšo političko snago nebre zdržati niti čuda jakša država od naše, očem reči, od Lepe naše. Neje nam lefko, ali verjem da nam je ostalo još tuliko pameti kaj nam ne bode nekaj takšega, nekaj tak hudoga palo na pamet.
Kaj smo mi v Lepoj našoj krivi??
Kaj smo mi v Lepoj našoj krivi dragomo Božeko kaj imamo Nino Obuljen Koržinek ministrico za kulturo štera ruon preveč ne boga za našo hrvacko kulturo. Ministrica Obuljen je ne financerala Sedlarovoga filma „260 dana“, film o strahotama Domovinskoga rata šteri iznosi istine štere bi antifašisti z istoka, agresori na Lepo našo, nejrajši pozabili i zbog radi toga je ministrica ne zmogla peneze kaj bi pomogla filmo šteri govori istino i samo istino. Ili kak so mi rekli oni šteri poznajo ministrico Obuljen Koržinek ona i dok ide na posel i dok ide dimo z posla navek hoda po levoj strani vulice kaj je stoprocentni dokaz da je ona levičarka makar piše i potpišuvle se z desnom rokom.
No, to je još ne se, naša kulturna ministrica Obuljen potpomaže z našimi penezi i to skupa s zagrebečkim grackim načelnikom Tomicom Tomaševičom vu zagrebečkomo Klubu Močvara tobož kulturne programe šteri vređaju zdravo pamet. Oni skupa financerajo programe šteri u božično vreme vređajo katolike i norca se delaju z onih šteri verjejo v Božeka i črez Advent čakajo rođendan maloga Isuseka, očem reči, blagdan Božiča. Več sam naziv toga tobož kulturnoga program „Spolnočka“ govori o tomo da tranvestiti i moški šteri so oblečeni v žene pre betlehemskoj štalici nebrejo pokazati nikaj spametnoga i več sam naziv programa vređa katolike, a kaj ne bodemo spominjali glumce i program šteri ima za cilj kaj bode vređal večinsko katoličko pučanstvo vu Lepoj našoj. To je špot sramota kaj se prinas v Zagrebo se more čuti i videti, a nejvekša nevola je kaj se to se plača z našimi penezi prek „kulturne ministrice“ Obuljen Koržinek, a dok treba dati peneze za Sedlarove filme unda tu penezi navek sfalijo. Još nekaj, kak zagrebečki gracki načelnik more dati dopuščenje za takše programe šteri vređajo naše ljude, naše katolike, a Thomson je ne dobil dopuščenje za drugi koncertlin v zagrebečkoj Areni makar je na kolenima klečal. Kaj se živi i raste v Lepoj našoj, a živi kak bubreg v lojo z našimi penezi? Da bode jempot kraj tem uvredama za Hrvate šteri hodajo po desni strani vulice i križajo se z desnom rokom?
Moški šteri je bil žena je truden z manekenkom štera je bila moškarec!
Adventske spovedalnice čakajo male i velike grešnike
Kak smo več rekli, neje Advent sam kuhano vino pre grackim štandima, neso sam langoši, fritule, sakefele kolači, licitari, adventski venci i sveče nek je to i duhovna priprava za Isusekov rođendan, očem reči, Božič. Uz se ono kaj spada v Advent kak i ono kaj smo mi ljudi kcoj dovlekli ipak je nejvažneše od sega dočekati maloga Isuseka čista srca, očem reči, pomriti se z dragim Božekom vu spovedalnici. Kak se to odnegda zna da i nejvekši svetec zgreši sedem pot na den, to je bilo negda, a denes da se čoveko nudi kajkaj toga unda je teško zdržati kaj ne zgreši i vejčpot od sedem pot na den. Grešiti je ljucki, ali je zato još bole ljucki priznati svoje grehe, Cirkve so otprte saki den, a spovedalnice ruon tak tak da saki grešnik šteri se oče rešiti terha greha to more napraviti saki den. Nekgerek sam, jako sam najgerek jeli bodo ove naše levičarke Dalija, Sandra, Ivana, Anka, Rada… skoristile priliko štero jim adventske spovedalnice nudijo i pomirile se z dragim Božeko ili pak bodo ostale na svojemo verovanjo kak dragi Božek ne postoji. Kakše grehe one delajo, a posebno Sanja Sarnavaka kak jiv oni zovejo „klečavcima“ na Trgo v Zagrebo, šteri molijo krunico, to je prešlo se meje ljuckoga dostojanstva. Veli teca Franca, ak ove puce levičarke ne bodo prešle na desno strano i ak ne bodo odišle vu spovedalnice bodo završile v peklo. Ali za te jive grehe ne bode dosti deveti krug pekla nek bode se moral otprti još jeden i to on deseti. Kak se šepetuji več se je i Lucifer počel o tomo spominati!? Brzčas bi jim bilo puno bole da si mesto škole „Kak postati (anti)fašist“ otprejo školo „Kak moliti krunico“ kaj se bodo mogle pridružiti „klečavcima“ na Trgo.
Verjem da se zmislimo, neje bilo tak zdavnja, Joža Manolič je pred kraj svojega živlenja vu šteromo je hodal po levoj strani vulice, družil se je z Oznom i Udbom, ipak došel do spovedalnice i pomiril se je z Božekom predi nek ga je on pozval k sebi na račun. Ak je mogel Joža morejo i puce.
Orašari v Grado Zrinskih
Neje ovo leto bilo lefko organizerati adventa v Čakovco jerbo je glavni Trg vu renoveranjo tak da so čakoski turistički težaki delali vu teškim i skrčenim uvjetima. No, nebrem nikak razmeti kak vu Čakovco – grado Zrinskih se najde mesta za orašare, a za gardiste Zrinske garde se nebre najti placa. Pa ak ga ne placa v grad, na sever, nek jiv denejo na Jug tam ga dosti mesta. Falimo se kak smo Grad Zrinskih, a jegove gardiste skrivlemo negdi v parmičo!
Sima vama mojim dragim čitateljima želem srečnoga i blagoslovljenoga Božiča da mali Isusek nam i našim familijama donese obilje zdravlja, mira i ljubavi!
Jožek Radnik