„Pajdaš“ Tonča je maršeral s zastavom
Nesam več kanil nikaj pisati o „Maršo protiv fašizma“, ali je pajdaš Tonča došel k meni ravno z belog Zagreb grada i to stopram vu sredo, ali je još navek v rokaj žmulil zastavo bivše Juge, a nutri v joj je mel zamotano črno zastavo z mrtvačkom glavom i ne bodete veruvali, ali se je došel pohvaliti kak je i on štrapaceral po Zagrebo, po Jelačič placo i iskal po belom Zagreb grado fašiste, očem reči, ustaše. Probal sam zazvediti šteri vrag ga je odvlekel v Zagreb i kaj je tam iskal? Morem vam reči da mi se je nigdar ne pofalil da navija za Jugo i da mo je Lepa naša ne po sredini srca kak v črleni jabuki koščica, ali ve sam zazvedil da je tak! Jega muoči Ante Pavelič, šteri je vu Drugomo rato bil glavni ustaša, jerbo je Ante spokral se zlato kaj so meli Hrvati i žnjim je pobegel prek meje, a to je bilo pred osemdeset let, a Tonča se je narodil dok je Ante hrl. Neje mi znal reči kakše to veze ima z Lepom našom? Jako sam bil najgerek de so Hrvati zmogli zlato v Kraljevini Srba, Hrvata i Slovenaca vu šteroj so cugle vlasti i državno kaso vu svojimi rokami držali Srbi posle kak so sfondali Štefa Radiča, Pavla Radiča i Đurija Basaričeka zastupnike HSS-a v Narodnoj skupštini Kraljevine. Muoči ga to zlato štero je nišči ne videl, ali ga ne muočijo onih sto milijardi dolarov kaj je drug Ljubičica Belanapravil duga za svoje vile i viletine po negdašjim republikama negdašje Juge štere so se Republike herbale i platile. Priznal mi je kak so ne našli niti jenoga ustašo, a niti pak niti jenoga fašisto. A de bodo jiv našli ak ga te nesnage v Lepoj našoj več nega.
Tonča je donesel glasa
Tonča je donesel glasa kak so se antifašisti (čitaj: komunisti) v belom Zagreb grado dospomenuli kak bodo otprli malo vekšo školo od dva semestre „Kak postati antifašist“ jerbo morajo pomladiti društvo ak očejo kaj se ne bodo zdošli. Priznal je kak bodo na toj vekšoj školi delale kak profesori(ce) Dalija, Sandra, Anka, Rada, Ivana, Kata, Klasič, Markovina, Jakovina, Goldštajn, direktor bode Vili Matula. Robijo Bajrušijo je ponujena katedra, ali on si još navek premišlavle. Za one šteri ne znajo kaj je antifašizam bode školovanje zabadaf, sam kaj zazvedijo. Što bi rekel da so tak zagrižjeni?
Ili kak Dalija veli…
Dalija lepo veli: – Ak ste protiv antifašizma, unda ste fašisti, a kaj bi drugo mogli i biti. I joj je nikak ne jasno zakaj so naši ljudi protiv antifašizma? Zakaj? Zato kaj so Slobo, Šešelj i četniki bili antifašisti, a oni so se borili protiv ustaša i za Jugo čistam isto kak i ovi naši antifašisti šteri so „maršerali“. Nejvekše zlo Drugoga rata so bili nacisti, a o njima se nišči ne spomina, fašisti so bili v Italiji i oni so se zdošli 1943. leta dok je Italija kapitulerala. Ne znati zakaj se skrivlejo zločini komunizma šteri je trajal cirka osemdeset let, a si oni šteri so bili glavni (Lenjin, Staljin, Tito, Fidel Castro, Mao Ce Tung…) so potamanili cirka sto milijonov ljudi. A ve naši antifašisti (čitaj: komunisti) nazaj zovejo to nevoljo i toga krvoločnoga režima. Da čovek ne poverje. Nek si poglednejo kak je to na Kubi pak jim mortik mine volja?
Nejmeje razmem Dalijo Oreškovič? Četniki so joj sfondali familijo, a ona se bori za „antifašističko“ državo bez granica, naroda s jenim jezikom ali sa zvezdom petokrakom. A četniki so masakrirali i ubijali pod tom istom petokrakom i pod tem istim zastavama kak je „pajdaš“ Tonča šuljal pod pazduhom.
Kak bodem razmel Dalijo ak ne razmem do fčerašjega pajdaša Tončija?
Ljucko je znanje ošpitno
Naši povjesničari so nejveč pot završili Filozofske fakultet, a kak si naši Filozofski fakulteti (Zagreb, Split, Reka,i Osijek) školajo sam leve povjesničare (kakši profesori takši i povjesničari) unda nam vum dohajajo sam levi povjesničari šteri se ili pak skorom se znajo o Drugomo rato i o tomo što je bil na čijoj strani kak ,i to štera je strana prava ili pak kriva. Nas so naši stareši vučili kak je navek prava strana desna zato se i ljudi križajo z desnom rokom, a ona druga, očem reči, leva je kriva. Tak so vam zišli i naši povjesničari, oni se znajo, kak sam več rekel, kak je počel i kak je završil Drugi rat, se znajo o partizanima, ustašama pak i četnikima makar so se narodili dvajsti ili pak tridesti let posle nek je Drugi rat počel, a malo vejč kak nkaj znajo o Domovinskomo rato šteri je počel i završil dok so naši povjesničari več završili fakultete i več so se špinčili z diplomami štere so druzgali vu svojimi rokami. Odnavek sam si gruntal da ono kaj sam videl, ono o čemo sam se spominal, ono v čemo sam sudjeloval bole poznam nek ono o čemo sam čital kaj je napisal Može Pijade, Vladek Bakaričov i jivi pajdaši, a stopram ako znuom da so pisali onak kak jim je pasalo, a ne onak kak je bilo. Profesori na fakultetaj malo znajo o Domovinskomo rato kak bodo unda študenti vejč znali. Tu se tre nekaj spremeniti pak so si naši braniteli, šteri so zafremali Lepo našo, zaslužili kaj se o njima preipoveda, kaj o njima vučijo deco štera denes idejo v pučko školo. Ak ne bodemo deco nikaj navčili nikaj ne bodo znali i unda se ne bodemo smeli čuditi kaj bode zišlo kak so partizani, a ne braniteli zafremali Lepo našo. A to nesmemo dopustiti, istina se mora znati, saki v povjesti mora meti ono mesto štero si je zaslužil.
Izbornik Dalič na Thompsonovom koncertlino
Marko Perkovič z conom zvani Thompson je održal svojega domoljubnoga koncertlina vu Varaždino, vu varaždinskoj Areni. A kak naš labodoritaški izbornik stanuvle vu Varaždino neje prepustil priliko i svojega pajdaša je išel podržati na koncertlino. Posle so se Marko i Zlatko poslikali za uspomeno kak bodo se jeden i drugi mogli pofaliti svojim vnukima kak so skupa popevali i kak obedva znajo kaj je bilo. Malo se bojim za Zlatkija jerbo ljevičari več dugo gombajo kak je Zlatkijovo vreme minulo i kak bi na jegovo mesto moral dojti nešči drugi, nekši levi. Najbrž Zlatko zna nekaj kaj ja ne znam, ima nekšega svojega asa v rukavo jerbo ne razmem kak se nadja kaj bodo ga podržali naši levičari (čitaj; antifašisti) ve posle ove slike z Markijom štera je preplavila Fejsbuka i Istagrama kaj Guglina ne bodem spominjal?
Jožek Radnik