Bo nekaj, Plenkovič i Milanovič so se dospomenuli?
Da čovek ne poverje, fčera, prekfčera glavna vest na sim vestima v Lepoj našoj je bila tua kak so se ipak dospomenuli naši vodeči političari, premijer Drašek Plenkovičov i precednik Lepe naše Zoran Milanovičov. A kaj so se to tak važnoga dospomenuli? Dospomenuli so se kaj se bodo zišli, još se niti ne zna de i da se bodo počeli spominati i da se bodo dospomenuli. Najme kaj, brzčas vam ne moram prepovedati kakša je situacija vu svetu kaj se sigurnosti, očem reči, mira i rata dotikavle pak so se naši vodeči političari dospomenuli kaj se bodo zišli na zestanko Vječa za nacionalno sigurnost i Vječa za obranu. To so vječa, to vam niti ne moram govoriti, v ovo vreme jako važna kaj se zna za koga mi drukamo vu ovim „sveckim ratima“ šteri gorijo po celomo sveto, kak of šteroga vodi Rusija protiv Ukrajine, tak i oni drugi vu šterima prste v ratnim pekmezima imajo Ameri i Izrael z jene strane, a Iran, Palestina, Jordan…. z druge strane. Saki den nešči nekoga napadne ovak ili pak onak, z dronovima, reoplanima ili pak z raketlinima sake fele. A mi još niti ne znamo što još za koga druka vu tem ratima i ne sam druka nek što koga po skrivečki pomaže, očem reči, što komo prodavle oružje, granate, raketline ili pak mo davle nafto kaj more pokrenoti svoje naoružanje.
Kuliko vidimo jega dosti problemov o šterima bi se naši vodeči političari ne mogli nego morali spominati i jako sam najgerek kaj se bodo itak dospomenuli ak znuomo kak Zoki druka za Ruse, kaj ne bodemo Iran spominjali, a Drašek za Ukrajino, Amere i Izrael. Nekaj si gruntam da se morajo dospomenuti što bode vozil nafto prek našega Janafa, a još je glavneše da se zazvedi kaj bodemo napravili mi, očem reči, naš minister za obrano Ivek Anušičov ve da smo zazvedili kak so naši sosedi (čitaj: Srbija) kupili daukometne raketline od Kinezov šteri morejo doleteti i kvara naprajti tijam z Beograda v Zagreb, a mi jim moremo, bar za ve, sam sol deti na rep. Naši političari se ravnajo k zestanko več hajdi dugo, kaj ne bodemo rekli kaka, a znuomo da mi ak očemo kupiti nekaj kaj bodemo mogli strositi sosedove raketline z neba to moramo naprajti čim predi jerbo sam dragi Božek zna kak dugo tre čakati kaj nekaj takšega dojde v Zagreb. Neso to kak žemlice, dojdeš v pekaro i odneseš dimo 100 ili pak 200 žemlici kuliko ti več treba za vekšo ili pak menšo fešto.
Kak smo rekli, Milanovič i Plenkovič so se dospomenuli da se bodo zišli kaj se bodo spominuli, a je li se bodo nekaj dospomenuli to je čistam drugi par rokavov. Ali brzčas bi se morali nekaj dospomenuti jerbo ne verjem da bode svet bolši ak se oni ne dospomenejo, ali sitacija vu sveto je ne za igrati se. Mortik so se do ve mogli igrati politike, ali tre i nekaj ozbiljno rešiti. Bormeš je tak!
Janezi delajo mesto nas
Što zna kaj bi znali o Drugomo rato i o žrtvama posle Drugoga rata da ga ne Janeza Romana Leljaka, šteri več četrdeset let prekopavle Deželo i furt prepoveda i piše kuliko je nas Hrvatov nastradalo i zakopano po Deželi. Da se je Leljak ne hapil delati toga posla ne znati je li bi došla na svetlo dneva istina o likvideranim Hrvatima v okolici Maribora, Celja, Dravograda, v Tezno i kuliko bi se znalo o Hudoj jami štera je, fala Leljako, sa reskopana i de so našli prek tri jezere žrtvi štere so v majušo 1945. leta bile hičene v negdašji rudnik Barbarin rov i to živi i tam so dočakali strašno smrt. Leljak je o tomo napisal knigo, a ve dela na tomo kaj bode o Hudoj jami snimil i dokumentarnoga filma kaj se bode zazvedilo kak je to bilo tam i kaj i koga so se tam našli. Velim, Leljak dela našega posla, rovle po zemli i vum zemle zvlači naše ljude i unda dojdemo do istine kak mi v Lepoj našoj nečemo niti pokopati svoje žrtve tak da so nam Janezi na grobljo Dobava v Mariboro dali več dve velike grobnice vu šterima počivajo kosti oni šteri so skopani v okolici Maribora dok se auto-ban delal, a v drugoj likviderani v Hudoj jami. O tomo sam več pisal v ovoj svojoj kolumni kak i o žrtvama Jazovke, Macelja, Lepe Bukve, Križnoga pota…
Pojavil se je i drugi Janez Miroslav Pačnik, šteri nema tak lepo mišleje o Ljubičici beloj kak imajo naši levičari, očem reči, naše antife (čitaj: antifašisti) i šteri o Titijo premišlavle kak o jenomo od nejvekših ratnih zločincov (deveti na listi) na sveto jerbo je tak rekla Evropa, tak je rekel Parlament Dežele, a i za to so roke zdigli naši saborniki vu Hrvackomo ržavnomo saboro. Miro jevu svojemo premišlavanjo del Ljubičico belo na pravo mesto i neje mogel spati jerbo so i Janezi ostavili spomenika Titijo vu Velenjo kak mi v Kumrovco i to ne bilo kakšega nek Augustinčičovoga i to visokoga 10 metrov. To ga je smetalo kak dokazani ratni zločinac još navek ima spomenika vu Velenjo i to v demokackoj i neovisnoj republiki Sloveniji. Dugo je gruntal i na se zadje si je pregruntal kak bode Ljubičici beloj na spomeniko vu Velenjo odžagal glavo. Kak se to veli, kaj se babi snilo to se je i pripetilo, pak je to i napravil. Deset noči je dohajal po skrivečki i žagal je šijaka i glava je pala. Pospravil jo je v haubo i dok jo je pelal vu svojo garažo zastajli so ga policaji i posle spominki z svojimi šefi so mo glavo zeli. Od toga je minulo vejč od tri mesece i još je ne dobil nikšo tužbo, ali je Miro napisal knjigo, štera ima naslova Kak i zakaj i tam se piše kak je velenjski Tito ostal bez glave i zakaj je to napravil.
Kak sam več rekel, hajdi toga mi nej zazvedili da ga ne Janezov šteri rovlejo po ostatkima (čitaj: žrtvama) Drugoga rat, a Titoprinas još navek ima hajdi spomenikov, vulici i trgov.
Zadje vesti
Kak so se zaprli svecki morski poti za prevoz nafte počele so stiske na benzinskim pumpama, cene benzina i nafte so zrasle (fala Vladi kaj pomaže), a nebrete niti tankati kuliko očete nek dobite kuliko imajo kaj nekaj i za druge ostane. To nam je več odnegda poznato. Velike svecke krize se navek stvorijo okoli nafte jerbo bez nafte, kaj strujo i plina ne bodem spominjal, svet nebre živeti i mora postati. A to denes nišči neče. Ne bode preteklo čuda vode cpot pod trnavskim mostom i počela bode stiska okoli šekret papera. Čim bode prvi pot sfalil šekret paper vu štacunima (kak je to bilo pred šest let dok se je korona dotepla na of naš hatar)unda bodemo stoprocentno sigorni kak je pred nami veliko sranje. Moramo si skupa, kak desničari tak i levičari prositi dragoga Božeka nek pomore kaj do toga ne bode došlo. Posebno prosim levičari šteri verjejo kak Božek ne postoji, ali so si ipak zeli Uskrsnico!
Jožek Radnik