Još navek Zlatko Daličov nekomo smeta
Da čovek ne poverje kaj je to v našim ljudima šterima smeta Zlatko Daličov izbornik naših labodoritašov. Sako malo naše leve cajtunge i leve novinare kršeli v riti zajedajo i tak dugo kopajo dok nekaj ne najdejo kak bi na red pobrali izbornika Daliča, očem reči, delajo na tomo kaj bi ga spravili vum z izborničke fotelje. Zakaj? To vam nebrem razmeti jerbo čovek z našim labodoritašima vedri i oblači po celomo sveto, kud god ide, de god igrajo labodoritaši seposort pobeđuvlejo. Lani so izborili viziperte za Svecko prvenstvo v Ameriki i ve je nekomo palo na pamet kaj bi Daliča vruhnul, očem reči zmenil i to sam zato kaj je kupil zemljo na Dravi i to na Hraščanskomo hataro i to pred nekaj vejč od deset let, a za to nema se papere štere bi moral meti. Pitam vas pitam, kak vas tak i sebe, što na Hraščanskoj Podravini, a ruon tak i na Kuršanskoj ima papere i što je uspel legalizerati vekšo ili pak menšo, zidano ili pak drveno hižico? Prosim vas lepo pokažite mi toga. A na Dravi i na Dravskomo jezero ga cirka okoli dvesto hižici sake fele i to na vekšim ili pak menšim sinokošama i od sih teh dvjesto hižici novinarima je za oko zapela sam Daličova hižica i to ruon ve dok se prepravlja za Svecko labodoritaško prvenstvo. Kak sam mel priliko za čitati Daličova hižica je na zaštičenomo području, a kak da so se druge vun zaštičenoga dravskoga područja. Još nekaj, Dalič je kupil zemljo za dvajsti jezer kuni i to nekaj meje od jene makote i to nove mekote, a to je povlaštena cena, a ja sem kupil na istoj toj Dravi pol mekote senokoše za pecto ojerov i to mi je žena rekla kak sam to preveč platil. Pital sam sosede na Dravi je li jiv je što kaj pital pak so mi rekli da več deset let nišči nikaj, ruon tak kak niti mene i unda bo mi nešči rekel kak Dalič i jegova hižica nekomo ne smeta sam zbog radi toga kaj je on izbornik hrvacke labodoritaške reprezentacije i to ne bilo kakši izbornik nek nejbolši do ve. Otkak Dalič zbira i vodi naše labodoritaše oni so v sveckomo vrho, bili so do ve dok se je ne znalo kaj Dalič ima hižico na hraščanski Dravi, a stoprocentno sam siguren da bodo i dale. A jalnoši, kaj se hižice na Dravi dotikavle, nek si nekoga drugoga zemejo na zob. Kak je Zlatko rekel, da bodo drugi platili poreza i legalizacijo unda bode i on to napravil. A do unda obrnemo se si skupa prema našim i sveckim nejbolšim labodoritašima, našim Vatrenima.
Hajdukovci poštuvlejo Božeka i korizmo
Korizma je navek prilika kaj saki čovek napravi inventuro svojega živlenja pak so tak i Hajdukovci naprajli. Došla je na svetlo dneva istina kak je Hajduk najkatoličkiji labodoritaški klub v Lepoj našoj, ali ne zato kaj ima cirkvo svetoga Tončeka pod tribinaj nek zato kaj se sako leto v korizmi odrekne nekaj velikoga, a kaj je još niti jeden drugi labodoritaški klub v Lepoj našoj ne napravil, bar ne vu zadjih 2o let. Ne bodete veruvali, niti jeden klub, pak niti Dinamo, neje uspel to napraviti niti unda dok dok je vu jemo hercuval Zdravko Mamičov, a niti pak posle. Vidim da ste najgerek kaj je itak to? Bodem vam rekel: Najme kaj, Hajduk se sako korizmo, vu zadjih dvajsti let, odreče znova kak kupa tak i prvenstva. Bodete se z menom složili da je to ne mala stvar i da to morejo sam „Beli ftiči“ i nišči drugi. Takšo veliko pokoro je ne nišči, slobodno morem reči, vu celomo sveto, napravil, bar ne do ve. To morejo sam veliki klubi ili kak bi to rekli naši labodoritaški komentatori, to morejo sam klubi šteri imajo karaktera. Igrači, treneri i uprava si navek najdejo nekšega zgovora jedino drukeri (Torcida) sako leto znova gombajo, vužižejo stolce, ali si nebrejo pomoči. Drugo jim ne preostaja nek da se kak pravi katoliki dajo v roke Božeko: O, Bože na nebeso dej pomori belom dreso, belom dreso, beloj boji, o, Bože pak smo i mi tvoji.
Čiji je naš Ivica?
Čiji je igrač naš sabornik Ivica Baksa? Kakše je to opče pitanje? Pak so si naši političari, prosim vas lepo, naši, kak ovi doma tak i ovi v Zagrebo jerbo se borijo za napredak našega kraja, našega „Falačka med dvemi vodami“, našega Međimorja, kak Ljubo Kolarekov tak i Boška Banova, pak tak unda, najte me krivo razmeti i Ivica Baksa. Samo čitajte i poslušajte kaj govorijo i se vam bode jasno. Ak je meni se jasno unda bode i vam. Brzčas!
Tak zgledimo kak daj neko drugom leta fkrali
Šteli mi to priznati ili ne ali sakoga dneva smo se stareši tak da on štiklec z šterim smo se negda hecali: još sam nigdar ne bil tuliko star kak denes je ve došel na svoje. Očem reči leta nam tak fletno idejo kaj se starački domi ne ftegnejo zidati. Ne bodete veruvali, negda so se naši stari ne dali vu staračke dome niti ak bi jiv bili pelali z japanerom, a ve najempot se je to obrnulo i si bi šteli iti v domo. Ali ve se je tu pojavil drugi problem, saki naš stareši čovek si išče sponzora što mo bode doma platil jerbo penzije so ne velike, a domi koštajo. Sakomo v letima je lepo da koli jega pahečejo mlade sestrice, da je v toplomo i čistomo i da tripot – štiripot na den ima kaj jesti i kaj mo je furt pivika ili pak gemištec v rokaj. I još nek mo je tu pajdašija štera se zna kartati nega kraja staračkoj sreči.
Sima nam je poznato kak se v Nedeliščo zida Dom za stareše šteri bode mel se kaj si čovek poželeti more jedino si peneze i zdraviče morate sobom donesti. Zida se novi dom šteri bode mogel prijeti stodvajsti sretnikov. Zakaj sretnikov? Zato kaj ve nekaj meje od 1900 Međimorcov i Međimorki čaka mesta vu domima, a v Nedeliščo bode mesta sam za prvih stodvajsti. Teško je tu biti spameten, z jedne strane zidamo zabavišta i škole vu štere nema što hoditi jerbo ga ne dosti dece, a mi stareši, šteri duže živimo, nemremo nikak dojti vu svoja „zabavišta“, nega jiv dosti. Mi stareši smo pravzaprav stareši, a ne kaj sam tak zgledimo. Čistam je nekaj drugo kaj se mi mlado osječamo, ali osječaj je jeno, a to kaj sami nikaj nebremo to je čistam nekaj drugo. Teško je priznati istino, ali je od je ne muoči pobeči. Kuliko god bi bi mi to šteli. Zato je v domima čuda lepše jerbo so tam si jednako stari ili pak jednako mladi!
Jožek Radnik