Tre obiležiti kaj se ne pozabi
Minuli tjeden smo obiležili 361. obletnico stradanja i pogibje Nikole Zrinskog Čakovečkog v Kuršanečkomo lugo, očem reči v kuršanski šumici. Si znuomo kak je Nikola z svojimi pajdaši bil v lovo i kak se odnekod, kak z vedroga neba, stvoril vepar, oliti kak mi Međimorci velimo, divji prasec. Nešči ga je ranil, a on je tak rajeni reščehal nejvekšega i nejjakšega vojskovođo ondašjega vremena. Mi moremo ve reči kaj očemo, moremo reči kak so to divjo svijo poslali Habsburgovci z Beča jerbo so divje svije ne rasle v Kuršanco v ono vreme, moremo si gruntati kak je nešči pomogel divji sviji kaj je hitila Nikolo z koja, ali to nam ne bode nikaj pomoglo jerbo je Nikola ostal ležati na zemli i to v lokvi krvi. Rekli smo da je to bil Nikola VII Zrinski i to Čakovečki. Zakaj Čakovečki? Zato kaj se je v Čakovco rodil, živel je v Čakovco i v Čakovco je natradal. Mi Čakovčanci smo ga nazvali Čakovečki kaj bo se znalo da je naš jerbo ga naši sosedi Mađari jako štimajo. I ne sam kaj ga štimajo nek se se gosteše falijo da je on jiv i da se pravzaprav zove Mikloš Zrinji. Verjem da si znuomo kak je Nikola bil hrvatski pjesnik i hrvatski ban i kak se je boril protiv Osmanlija kaj nej pohalosili jegovoga hatara, očem reči, kaj nej došli do Beča. On je zafremal nejvekšo knjižnico „Zrinijano“ na ovomo delo sveta, dopelal je fratre v Čakovec, izgradil je cirkvo, čakoskoga staroga grada, zazidal je dvorca na Novomo Zrino šteroga so Osmanlije rušili ruon tak dugo kak i Sigeta i poginulo jiv je cirka tridesti jezer predi nek so ga osvojili. Osim toga prvi se je boril z koniima po zimi i jahal je po zamržjenoj Muri i Dravi i skuril je poznatoga Sulejmanovoga mosta v Osjeko dugoga osem kilometrov. O toj jegovoj Zimsko vojni još dendenes se vojni študenti vučijo kak prinas tak i v Ameriki. Ovo leto je v Kuršanco, de je lani postavlen novi spomenik Nikoli, obiležena 361. obletnica jegovoga stradanja, a moram vam reči kak je nišči z Čakovca – grada Zrinskih ne mel čas kaj bi bil došel na komemoracijo, očem reči, obiležavanje obletnice Nikoline pogibije. Nekaj si gruntam kak si je to Nikola Čakovečki ne zaslužil? Nišči od čakoske gracke vlasti je ne došel, ali je zato bilo pet delegaciji z Mađarske i saka je dela venca (vekšega ili menšega) na spomenik. Oni so došli z Mađarske v Kuršanec, a grackim ocima je bilo dauko dojti z Čakovca.
Neje bole prešla niti Katarina Zrinska šteroj so Čakoski matičari i Zrinska garda organizerali obiležavanje 400 let rođenja drugi den posle komemoracije v Kuršanco. Nti tu ga nikoga ne bilo z čakoske gracke uprave. Najbrž so čakoski gracki oci i v četrtek meli važnešega posla. Jempot ga ne časa za branitele, drugi pot za Nikolo Zrinskoga, a treči pot niti za Katarino Zrinsko. Gracki oci so niti ne došli pokloniti se poginulima vu Prvomo sveckomo rato i tak obiležiti kraj rata.
Brzčas bodo si v Čakovco – grado Zrinskih morali posložiti prioritete jerbo se mora znati kaj je važno, kaj je važneše, a kaj je ipak nejvažneše. Znuomo da nebre seposot biti gradonačelnica, ali v gracki upravi ga dosti težakov šteri to morejo oddelati. Tu je zamjenica, tu so pročelniki, tajniki, precedniki…
Živleje bez Vesnikovoga nebodera
Kaj reči, i negda so se deca igrala z šibicama i znali so vužgati slamo (i to nejveč pot sosedovo), škedja, parmo, a bormeš bilo je i toga kaj so vužgali najža na hiži ili pak štali. Pripoveda se da so deca vužgala Vesnikovoga nebodera v Zagrebo šteroga so pazili zaštitari? Ak ne i nekaj drugo unda je ipak malo čudno to se je do dneva denešjega ne pripetilo. Zazvedilo se kak je v nebodero nišči nikaj ne delal i kak je ne bil nikši hasen od jega, a zakaj je itak unda bil otklejeni i zakaj so ga zaštitari pazili i to tak šlampavo kaj so jim deca, za pol dneva, skurila celoga solitera, a niti jenoga so ne vidli, a ne kaj bi šteroga prijeli.
Je li se bode kaj spremenilo v Belom Zagreb grado ve dok je zgorel Vesnikov neboder center političke moči negdašje Juge i Jugonostalgičara?
Več se par dni pripoveda kak ga bodo zrušili jerbo je nekši gingavi i hiravi tak da nišči nebre garanterati kak bode dugo zdržal? Nekaj si gruntam, a kaj ga bodo popravlali ak ga je do ve ne nišči nucal, a dok se bode zazvedilo što ga je vužgal unda se bode zazvedilo (???) zakaj so ga itak vužgali? Je li jim je smetal ili pak tu kanijo zazidati nekaj novoga i vekšega i kaj od toga bode nekši hasen, a ne sam kaj se bodo stražari ili pak zaštitari kartali v portirnici!
Što je vužgal Vesnikovoga nebodera i zakaj se bode zazvedilo ruon tak kak se prinas v Međimorjo zazvedilo što je skuril Međimorsko hižo pred tridesti let?
Kapa do poda gospono Tončijo i Zakladi Mikec
Čim počnejo bratve v goricaj, v sadovjakaj, po poljima mam znuomo da je jesen tu na vrati. A čim je jesen na poceko i deca se ravnajo vu škole, a študenti na fakultete. Znuomo da deca v školaj koštajo, a još so dražeši študenti na fakultetima. A dok je tak unda dobro dojdejo si oni šteri japekima i mamikama pomažejo kaj zaškolajo svojo deco. Tu so gradi, opčine, županije ili pak fabrike štere nucajo školano deco. A školana deca denes jako čuda vredijo jerbo one šteri kopajo, rovlejo, štemajo, šrajfijo ili pak dvorijo zidare moremo dopelati z Bosne, Srbije, Filipina, Nepala… Posebno mesto med onima šter pomažejo našim međimorskim študentima ima „Zaklada Mikec“ štero je zafremal naš Cirkovljančan Anton Toni Mikec i to več zdavnja, pred jedenajst let. Več jedenajst let gospon Toni pomaže našim študentima šteri so željni znanja i imajo volje kaj se nekaj novoga i spametnoga navčijo, ali jivi starci nemajo za to peneze. Tu unda gospon Toni pomaže. Več jedenajst let, sako leto davle po pedeset stipendiji štere se ne morajo vrnuti ak so študenti dobri ili pak bolši od drugih i tak pomaže našim mladim Međimorcima kaj pokažejo sima v Lepoj našoj kuliko mi Međimorci znuomo i kuliko vredimo. Fala gospono Tončeko kaj je odlučil svojimi penezi pomoči Međimorcima, fala mo od srca ili kak moja teca Franca veli, skidam mo kapo do poda za jegovo dobro i plemenito delo, za jegovo plemenito srce. Fala mo u ime sih onih šterima je do ve pomogel i onih šterima denes pomaže. Svaka čast, gospon Toni! Cirkovljančani so navek bili široke roke!
Jožek Radnik