Napunili so stole i kupice, pozvali tamburaše
Za nami so ostali dnevi vina, dnevi pušipela, dnevi dok je vino teklo potokima i to po brežnomo Međimorjo. Nejvečpot se pripoveda kak vino nebre teči potokima po bregima, ali za vreme Urbanovoga je prinas vu Štrigovi, Železni Gori, Svetomo Đurđo na brego i to moči videti. I kaj je nejčudneše dok vino teče po bregima na se spehe nišči ne beži fkrej od jega nek si dohajajo kcoj i saki den je okoli vina, očem reči, okoli kleti, okoli pelnice, okoli lagvov se vekša i vekša stiska. Kuliko pot sam več tu na ovomo mesti pisal o tomo kak prinas v Međimorjo rastejo, ne sam rastejo nek se i pijejo nejbolša vina na sveto. Kak sam rekel, ali kuliko sam ovo leto v ove dneve vina i videl ljudi dohajao iz sih krajov Lepe naše, a dohajajo i oni prek meje, kaj proverijo je li ja govorim istino. Ne sam da dohajajo nek i ostajajo tu i sprobavlejo se ono kaj je zraslo na ovoj našoj kak mi velimo škrtoj zemlici. Zemlica je škrta, ali ak se naš međimorski čovek žnjom pospomina, ak jo dobro pognoji, zorje, dobro prepravi i prave trse posadi unda tu i zraste dobro, kaj dobro, nejbolše vino. Ne moram več to govoriti kaj ne bode zgledalo da se falim, ali jezere ljudi kaj su v ove dneve vina dohajali k nam v Međimorje nam govorijo da so ljudi zazvedili kaj morejo prinas najti i kak je to ono kaj so na leta iskali. Da je ne tak ne bi dohajali, ne bi z sobom dopelali pajdašijo i ne bi tu tak dugo ostajali. Još bodemo morali zafremati i nekše hostele, hotele kaj si bodo vinoljupci mogli prespati ak nekoga vino prevari pak si cugne malo vejč nek je kanil i ak oni šteri imajo ključe od auta malo globleše poglednejo v kupico. Kuliko sam mel za čuti i na tomo se dela.
No, niti naši ljudi, naši vinari i vinogradari ne ostajajo dužni svojim gostima, oni jim davlejo se kaj imajo kak ono kaj krepi dušu tak i ono kaj krepi telo ili kak moja teca Franca veli naši brežni Međimorci so za Urbanovo – dneve vina otprli dušo, otprli so kleti, otprli so pelnice, otprli so i lagve. Ali to je još ne se, si mi znuomo da je ne moči piti na prazen želodec, a unda tu do reči dohajajo i žene naših vinogradarov štere spravljajo se one dobrote i finote od šterih čovek nebre oditi fkrej tak dugo dok ga nekaj jega na stolo. Dok se čovek okrepi za stolom unda na red dojde kupica, lagev i pelnica. Kak sam več rekel to su vina štera govorijo štiri jezike i to tak tečno kaj te nišči nikaj ne razme, a si so dobre vole. Nebreš fulati vu štero got pelnico dojdeš sigurno je jeno da bodeš vum išel dobre vole ak čovek pije onak ka se mora piti: pomalem, spametno i ne spiti vejč nek čovek more podnesti. Verjem da bodo dobri glasi o našim nejbolšim vinima dauko odišli i da bode se vejč ljudi dohajalo k nam na okrepo, na vino posle šreroga se čovek osječa bole i po šteromo dobi pamet i sakoformo vupeše, ali sam najgerek je li bodemo meli dosti vina? Naši vinari velijo da ga ne brige jerbo sako leto sadijo novo trsje tak kaj bodo lagvi zdržali celo leto pak jim to unda moramo veruvati.
Znate kaj so naši stareši odnavek pripovedali, što furt hoda v gorice ne zna za betege i ne nuca nikšega drugoga leka nek so mo klet i pelnica nejbolša apoteka Tak je več dvajstipet let otkak se Urbanovo – dnevi vina obslužavlejo, a tak je bilo i predi, ali ne za se!
Muke po Čakomo
Čim se je vreme spremenilo, čim smo vure porinuli jeno vuro na pre i čim so dnevi postali malo dukši i malo topleši mam so i naši komunalci prešli na letno radno vreme. A to je ono čega smo se bojali. Ne zato kaj bodo raneše vjutro počeli smetje pobiratili pak hrumeti z kosilicaj nek zato kaj bodo pak sprevodi na čakoskomo grobjo po nejvekšaj vručinaj. Velijo kak sprevodi morajo biti za vreme radnoga vremena, a naši komunalci delajo vjutro od šest pak odvečer do dve. Ne bi vam znal reči što još ima takše radno vreme, ali komunalci ga imajo tak da unda se dojde na to kaj so sprevodi na čakoskomo grobjo od dvanajst do dve ili kak sam rekel po nejvekšaj vručinaj. Več sam o tomo i lani tu pisal, ali se je nikaj ne spremenilo. Kak prvo ljudi šteri očejo iti na sprevod svojemo bližnjemo, svojoj rodbini svojim sosedima morajo raneše oditi z posla ak očejo na vreme dojti na sprevod, a unda na grobjo zevlejo i iščejo hlada de se bodo skrili od sunca ak nečejo kaj jiv prime sunčanica ili pak se nedaj Božek zrušijo ak jim dojde slabo. Ne znati zakaj je tak veliki kunjšt kaj bi se za težake na grobljo naprajlo klizno radno vreme pak bi sprevodi bili malo kesneše odvečer dok minjejo nejvekše vručine i dok sunce malo heja? Bili bi niti prvi niti zadji šteri delajo po kliznomo radnomo vremeno. Zna se kuliko vur saki težak mora oddelati tjedno, a da bode to oddelal to se težaki dogovarjajo sa svojim šefima i gazdima, a ne kaj ljudi morajo trpeti nejvekše, očem reči, nejjakše vručine. Još bi sam trelo kaj se na sprevodo nekaj hudoga pripeti i kaj bode nekomo pravzaprav slabo i kaj bode morala dohajati hitna ili pak nekša druga pomoč.
Gracke nagrade
Kak i sako leto za Den Grada Čakovca tak je i ovo leto čakosko Gracko veče dodelilo nagrade onima šteri so to nejbole zaslužili. Med nagrađenima je ovo leto bil i Zlatko Bacinger šteri je dobil nagrado za osobit doprinos razvoju i promicanju kulturnog i povjesnog identiteta Grada Čakovca. Tak so bar rekli. Vu obrazloženjo je bilo rečeno da je on zaslužan kaj je osnovana Zrinska garda, štero je osnovala čakoska Matica i kaj je osnoval Bratovštino Petra Zrinskog. Nemam ja nikaj protiv jegove nagrade za životno delo, ali nebre dobiti nagrado za ono kaj je ne napravil. Najme kaj, gospona Zlatkija so hitili vum iz Zrinske garde pred 15 let jerbo je delal vejč kvara nek hasna, a unda je on vtruc zafremal Bratovštino Petra Zrinskog. Dok se je on rezišel z Gardom garda je mela meje od 50 članova (denes ima prek tristo), a Bratovština je nigdra ne mela vejč od šest članov, a zadji nastup je mela pred deset let. On je posle kak je dobil nagrado izjavil kak je med nami čuda jalnoši i da si dobri projekti imajo čuda japi, a hudi sam jenoga, kaj god je on z tem štel reči, ali ovi vu Gardi velijo kak je Garda ne drevo bukva posadiš, raste i buja samo od sebe. A to se nejbole vidi na Bratovštini.
Jožek Radnik