Naša soseda Sara Kolak je pak zlatna
Kaj se dotilavle naše Ludbrežanke Sare Kolak štera hiče koplje seposut po sveto i to več petnajst let mogli bi reči da za jo vredi ona pučka izreka kolo sreče se obrče, ali nidar ne postane tak da je jempot gori pak unda doli i na se zadje pak dojde nazaj gori. Verjem da se si zmislimo kak nas je raveselila, pred deset let, dok je kak dvajstijednoletna pucka (kak teca Franca veli) postala olimpiska pobednica na Olimpijadi v Brazilo i osvojila zlatno želencijo. Razveselila nas je ruon tak kak i labodoritaši dok so 2018. leta osvojili srebrno želencijo zlatnoga sjaja. Kak smo se ne nadjali kaj bi labodoritaši mogli dojti do finala Sveckoga prvenstva v Rusiji tak se je nišči ne nadjal kaj bi naša Ludbrežanka Sara Kolak osvojila zlatno želencijo i postala olimpiska pobednica. Kak je naglo došla na svecki vrh tak se je fletno i zgubila. Najme kaj, 2016. leta je bila Olimpijada v Brazilo i tam je Sarino koplje, štero joj je kupila jena pajdašica Sandra Perkovič, zlatna v hitanjo diska, letelo 66.18 metrov, a leto dni posle na Dijamantni ligi vu Švicarskoj Lausanni je hitila koplje još dale i to 68.43 metrov i postavila svojega i našega državnoga rekorda. Posle toga je mela probleme z betegima, no, ne ruon z betegima nek z plečom, pak z laktom i to se je vleklo hajdi dugo. Vrnula se je na Olimpijadi v Parizo pred dve leti, ali je to ne bila ona Sara z Brazila. Ali kak smo več rekli, jeno kolo sreče se furt obrče tak da je ovo leto na Evropskomo prvenstvo v Engleskoj znova hitila koplje dale od si svoji pajdašici (62.43 m) i postala je evropska prvakinja i osvojila zlatno želencijo. Čuda je nas čakalo kaj se Sara vrne na zaletište z kopljem v roki, a još je več bilo oni šteri so furt gombali i coprali kak več nigdar ne bode nikaj od naše Sare. A dok je Sara v pitanjo, si mi šteri jo poznamo moremo reči da je ona nigdar ne bila kak druga deca i nigdar ne bode hitila koplje v trje i da se bode borila dok god postoji kak god mala šansa kaj more nekaj napraviti. Fala dragomo Božeko kaj so jo betegi ostajli, kaj so laket i pleče ozdravili, a voljo još navek ima tak da bode još želenciji okoli jenoga šijaka i još bode novih rekordov i još bodo hajdi pot igrali Lepo našo zbog radi Sare. Denes pak hiče koplje v Lausanni de je postigla državnoga rekorda pred devet let tak da se moremo nadjati kaj bi nas mogla pak iznenaditi. Kak to več Sara zna.
Ludbrežani so se skazali
Dok je Sara došla dimo z Engleske s zlatnom želencijom okoli šijaka dočakali so jo si Ludbrežani šteri so toga dneva bili doma. Ne sam da so jo dočakali nek so joj narisali olimpiskoga murala na zid i šporckoga parka so nazvali po Sari. Morate priznati da je to ne mala stvar. Kak je Sara rekla nadja se da bodo ludbreška deca išla za jom, očem reči, da bodo se bavila atletikom kaj znači da bode ne denes, ne zutra, ali prekzutra i Ludbreg mel svojega atletskoga kluba kaj bi Sari bila velika želja. A mi, mi znuomo da je Sara, kaj se atletike dotikavle, v nejjakšim letima i ak jo bode zdraviče služilo, a verjemo da bode, unda bode v Ludbreg i v Lepo našo donesla još rekordi, još želenciji kak i jena pajdašica Sandra Perkovič.
Kaj bi ve mogli reči, da je Filip Ude z Ludbrega najbrž bi mel svojo šporcko dvorano? Nidar se ne zna?
Malo ljudi zna
Malo ljudi zna da je Sara Kolak ne bila odnavek atletičarka i neje, kak se to veli, od zabavišta hitala koplje. Sara je bila rokometašica i branila je rokomet za mlade v Ludbrego, a onda so jo v ŽRK „Čakovec“ dopelali treneri z čakoskoga kluba tak da je nejpredi branila za mlade, a posle, z svojih šesnaest let, i za prvo ekipo. Dok so v školi hitali loptico Sara je hitila nejdale od sih i dok se to zavedilo treneri z Varaždina so nagovarjali Saro nek dojde trenerat atletiko vu Varaždin. Neje se Sara dala dugo nagovarjati tak da je pomalem ostavila rokomet i odišla v atletiko. Zmislim se kak denes dok je prvč hitala koplje na našemo čakoskom stadiono i hitila je meje od pedeset metrov. Makar je bila pobjednica, ali je ne bila zadovoljna jerbo si je ona splanerala da bode hitila prek pedeset metrov. Posle toga se je još bole prijela posla i kak znuomo bila je prva Hrvatica štera je hitila koplje prek šezdeset metrov. A posle toga so došla evropska junjorska prvenstva, junjorski rekordi, bronca na Evropskomo prvenstvo 2016, a posle Brazil i zlato, hrvatski rekord 2017. I veliki odmor i rehabilitacija jerbo se se strga kaj se prekpreveč nuca pak tak i Sarino pleče, Sarin laket i tak se do Olimpijade v Parizo 2024. leta de je osvojila 4. mesto.
Malo ljudi zna da je Sarina mama Aleksandra bila golmanica v rokometo i da je branila v Ludbrego, Podravki i Koki, a dok je Sara odišla v atletiko Sarina mama je došla v ŽRK Čakovec kaj jo zameni, a Sarin brat Matija je igral nogomet vu Varaždino. Kuliko vidimo vu familiji Kolak si so bili športaši, a Sara je došla nejdale, očem reči, nejviše. I još je ne rekla zadjo reč kaj se atletike i koplja dotikavle.
Gorela je cela Dalmacija
Minoli tjeden smo se nejveč spominali o ogjo v Dalmaciji de je zgorelo jezero hektarov šume, šikarja, a zgoreli so i auti, čamci, brodi, hiže… Nešči je vužgal šikarje v Lokvi Rogoznici, a veter je se ostalo napravil. Tak je puhal kaj so ogjo niti ogjogasci, niti kanaderi, a niti pak traktori ne mogli stati na kraj. Vejč od dve jezere ljudi je moralo ostajti svoje hiže odišli so na kvartelj po šporckim dvorana, hotelima, motelima i sakefele dvoranama. Stradali so i ljudi tak da so i doktori meli posla. Nejbole je gorelo okoli Rogoznice, Omiša, pak posle na Dugomo otoko, Benkovco, Zadro, na Velebito… Ogjogasci so mam rekli kak je to nešči moral vužgati jerbo je čakal dok bode veter počel puhati. Ove kaj so vužigali okoli Zadra te so prijeli. Kak i sako leto (nejvečpot) so to bili Srbi, šteri živijo v Lepoj našoj, ali jo pod milim Bogom ne trpijo. Prijeli so tri Srbina z hrvackom putovnicom i jeno Srpkinjo štera je ožejena za Poljaka, a novinari so napisali kak so prijeli z fercajgima v roki tri Hrvata i jeno Poljakinjo. Novinarska posla. Najgerek sam kaj so itak o tomo napisale Pupovčeve „Novosti“?
Mam sam se zmislil kak je to bilo pred hajdi let dok so na 100 metrov bežali Srbin i Crnogorac, Srbin je prvi došel, a Crnogorec malo kesneše za jim. Drugi den je vu srpskim cajtungima pisalo kak je Srbin bil prvi, a Crnogorac zadji, a vu crnogorskim cajtungima je pisalo kak je Crnogorac bil drugi, a Srbin predzadnji. Tuliko o novinarima istini i poštejo.
Jožek Radnik