Nigdar ne bomo pozabili jivo žrtvo
Dobro nam je poznato kuliko nam vredijo naši braniteli i nigdar nesmemo i ne bodemo pozabili jivo žrtvo, a posebno ne bodemo pozabili onih 78 z našega maloga Međimorja šteri so deli svoje živote na oltar Domovine kaj bodemo mi, šteri smo ostali mogli živeti vu slobodnoj i neovisnoj Lepoj našoj bilo je rečeno par pot na obiležavanjo 35 – obletnice oslobođenja Međimorja (17.septembra). Skorom si naši poginuli braniteli so svoje živote položili za Lepo našo s krunicom okoli šijaka i z molitvom na vusnicama. I ne sam to, si so oni meli sprevode z velečasnikima i ve da nam tak čuda vredijo mi smo protiv (ne mi nek oni) kaj se bi postavil križ pre spomeniko poginulim branitelima v čakoskomo parko. Ne bi štel pak ponavljati pričo o farizejima… Ne bi štel, ali moram! Pak i umjetna inteligencija zna da so farizeji licemjeri, lažlivci i se drugo sam ne poštejaki: jeno si gruntajo, drugo pripovedajo, a tretje delajo. A verjem da se slažete z menom da so si naši braniteli to ne zaslužili. Ako jim postavimo križa pre jivomo spomeniko to je nejmeje kaj moremo za jiv naprajti jerbo so se oni borili za nas, za našo neovisno Lepo našo, za naše bolše zutra, štero so oni ne doživeli i to, kak smo več rekli, z krunicom okoli šijaka i z puškom v rokaj. Čim so meli krunice se so rekli kaj se Božeka dotikavle i ne nucajo nikše fiškale šteri bodo nam govorili kaj so si oni gruntali i kak so veruvali da dragi Božek postoji. Najbrž nebrejo biti jivi fiškali oni šteri hodajo v Kumrovec i tam z črlenom petokrakom na glavi mašejo s zastavom negdašje Juge, a dok se vrnejo dimo prvi so dok se vužiže sveča pre spomeniko, a posle, posle meše i molitve, so ruon tak prvi i nejglasneše kričijo protiv križa pre spomeniko. I rečite mi, prosim vas lepo, kak mi ne bodo farizeji pali na pamet. Braniteli so bili tu dok nas je trelo obraniti od četnikov i unda je red da jim se mi odužimo z križom šteri jim je pomogel dok jim je bilo nejteži na fronto. Dosti dugo smo se zgovarjali i jeni na druge z prstom kazali.
Nesmo se ruon skazali
Minuloga vikenda se je v čakoskomo Centro za kulturo kazal film 260 dana naš i američki ratni dramski film šteroga je zrežiral Jakov Sedlar. Film je snimljeni po istinitomo autobiografskomo romana Marijana Gubine. Film govori o familiji Marijan Gubine štera je bila za vreme Domovinskog rata nejpredi v logoro, a posle so bili vu zatočeništvo de so kajkaj toga grdoga delali i doživeli na kaj so jiv sosedi četniki z Dalja prisiljavali. Bili so jiv saki den, žene so silovali, skupljali so mrtve… i kaj ne bodem dale nabrajal. Sedlar je prikazal se onak kak je gospon Guberina to vu svojemo romano napisal. To ste brzčas čuli ili pak ste o tomo nekaj prečitali. Štel sam vam pravzaprav reči nekaj drugo, film je vu čakoskomo kino igral tri dni i došlo ga je glet z brojkama i slovima cirka 100 (sto) ljudi. Kaj reči? Tu se ruon tak vidi kuliko nam naši braniteli, naši ljudi z prve linije fronte, ljudi šteri so preživeli logore i sakefele druga zlostavljanja, vredijo. Niti tu se nesmo ruon skazali, očem reči, pak smo zahuzali ili pak nas niti ne interesera kak je bilo onima šteri so se žrtvovali za slobodno Lepo našo. A dok je igrala balkanska antiromantična komedija Svadba unda je za tri dni došlo glet 3000 ljudi. Tu se nema kaj reči!
Kaj bomo itak z ličkim smetjom?
Kolo (ne)sreče se tak fletno obrče kaj niti ne ftegnemo to se pratiti. Ne tak zdavnja je bil veliki protest na Jelačič placo i tak se je čuda ljudi zišlo kaj jiv još den denes brojijo jerbo se nikak nebremo dospomenuti je li je bilo vejč ljudi dok so dohajali ili pak dok so odhajali? Črez tjeden dni se nebre nikak zazvediti što je se bil na Jelačič placo, a što pak je ne bil. Zakaj? Si šteri so tam bili so se složili, a ruon tak i mi doma šteri smo to gledali ili pak poslušali kak se te kupi smetja v Liki, v Gospičo moraju čim predi vugnuti kak ne bi deci i ljudima škodili zdravjo. Niti jenoga ga ne bilo v Lepoj našoj šteri se je ne z tem složil. No, dok se je trelo početi voziti i kuriti bezopasno, očem reči, obično smetje i za to so bile zebrane velike peči v cementarama v Našicam i v Puli znova so počeli veliki ako ne i vekši protesti kak so ljudi v Puli i Našicama protiv toga kaj se bode v jivim cementarama kurilo z tem ličkim smetjom. Ve vidite, jen den smo za to kaj se smetje vugne kaj ne bodo ljudi zbetežali, a drugi den smo protiv toga kaj se bi to smetje otpelalo i skurilo tam de se saki den kuri. Ve vidite cementara Koromačno več na leta kuri z smetjom i nikomo nikaj ne smeta, a Našičani i Puljani so protiv. Najgerek sam, jako sam najgerek kak bode to itak završilo. Pak i drugi smetje negdi kurijo, nesmo mi v Lepoj našoj šteri smo prvi šteli vužgati smetje. Najbrž i drugi imajo vejč smetja nek mi v Lepoj našoj pak bi unda bilo čistam nekak normalno da pitamo te druge (Grac, Beč, Minken) kam so oni itak potepli svoje smetje.
Mi v Međimorjo imamo privilegijo i kaj se smetja dotikavle, prinas v Totovco je ekološka katastrofa jerbo je nešči zmetal 20 toni i to se ne zna kakšega smetja jerbo so čoveko šteri je znal v Čakomo dali otkaza, a vu Varaždino je ne katastrofa makar je v Munduso zmetano dve jezere toni sakefele smetja, a v Gospičo je niti onih p 30 jezer toni došvercanoga otpada od naši sosedi prek meje ne naprajlo ekološko katastrofo jerbo je voda dobra za piti. I unda bo nešči rekel da se nišči ne briga za nas Međimorce?
Pak smo mi još negda kurili v Totovco…
Verjem da se i vi zmislite da smo i mi negda kurili smetje v Totovco. Smetje se je vužgalo samo od sebe ili pak je nešči drugi to vužgal to brzčas nigdar ne bodemo zazvedili jerbo je istraga još navek ne došla do kraja makar je od prvoga velikoga ogja minulo sedem let, a od zadjega nekaj vejč od dve leti. Kak bilo da bilo črni gosti dim je išel na se strane pak smo ipak, bar do ve si preživeli osim onih šteri so hmrli. Kuliko znuomo nišči je ne hmrl od gostoga črnoga dima.
Znate kak je to, teško je veruvati ono kaj čovek čuje v krčmi posle četrte runde, ali so se dečki spominali v krčmi blizo Totovca kak je naše totosko smetlišče popujeno jerbo se je i tu vozilo smetje odnekod drugod i da so se te, kak se to veli, kazete ne spunjene sam z našim međimorskim smetjom. Dečki v krčmi so se spominali kak se je i tu vozilo smetje po noči kak i v Puščine, a je li je to istina sam dragi Božek zna. Da se je smetlišče Totovec fletno zapunilo istina je, a ruon tak je istina i to da mi Međimorci imamo saki den se vejč smetja štero je trelo nekam odpelati? Ne znati zakaj itak si k nam vozijo smetje (ak mi imamo prekpreveč svojega) vu te naš nejlepši horvacki cvetnjak med dvemi vodami. A i mi Međimorci se moramo brigati kaj te „Falaček zemle med dvemi vodami“ i dale ostane cvetnjak, a ne smetlišče na štero bode vozil saki šteri se zmisli i šteri nema svoje smetje kam deti. Međimorje je nejlepši falaček zemle na ovomo sveto i moramo mi šteri smo denes znati da smo ga mi ne nasledili od svojih stareši nek smo ga posodili od naši vnukov kaj znači da ga moramo takšega kakšega smo dobili i nazaj vrnoti vnukima!
Jožek Radnik