Počelo je v Čakovco
Prinas v Čakovco, a i v Međimorjo kaj se familije Zrinski dotikavle, štera je hercuvala v Međimorjo od 1546. pak se do 1691. leta, o tomo se briga Zrinska garda Čakovec. Zato je i Garda zafremana pred 25 let kaj se bode brigala o semo kaj so Zrinski naprajli za Čakovec i Međimorje i kaj se nikaj ne bode zabilo. Ne sam kaj se ne bode zabilo nek kaj se zazvedi i se ono kaj smo mi Čakovčanci, a i mi Međimorci ne znali. Kak smo več rekli Zrinski so hercuvali na našemo hataro, na našemo „Falačko zemlje med dvemi vodami“ nekaj meje od stoletja i pol i zato se Zrinska garda briga kaj se zmislimo sega onoga kaj je važno vu živlenjima članova velikaške familije Zrinski, a dotikavle se nas Međimorcov. Tak se je ovo leto navršilo 460 let od Sigecke bitke de je vu junačkomo probojo poginul Nikola Zrinski Sigecki i si jegovi (cirka 2.800) ratniki, branitelji Sigeta. Dečki iz Zrinske garde so pošepetnoli župano Matiji kak bi bilo dobro kaj bi se ovo leto da se obilježavle 460 – ta obletnica Sigecke bitke proglasilo letom Nikole Šubiča Zrinskog. Župan je ne mel nikaj protiv toga pak je to pošepetnol precedniko Županiske skupštine, Dragijo Glavini, i neje drugač moglo ziti nego kaj so vječniki Županiske skupštine ovo leto proglasili letom Nikole IV Šubića Zrinskog.
Si šteri so došli na obilježavanje 460 – te obljetnice,7. septembra, kak domaći tak i stranjski, so se zišli vu čakoskomo parko pre spomeniko Nikoli Zrinskom Sigeckom, šteroga je Garda postavila 2008.leta, a ve pak je garda prek pota spomenika postajla Klupu Zrinski – klupo hrvacko mađarskog prijateljstva u sklopu projekta Intereg šteroga skupa delajo naša Garda i Zelena zona iz Sigeta. Klupa je tu kaj se bodo si oni šteri si sednejo na klupo spominali nekaj o Zrinskima kak o Nikoli IV, „hrvackom leonidi“ i braniteljo Sigeta tak i o sim drugim Zrinskima šteri so hercuvali z Međimorjem i Hrvackom predi i posle jega. Ako pak bodo na klupi sedeli mladi i oni se imajo kaj navčiti od Nikole Sigeckogs jerbo je on mel dve žene i trinaest dece. Dok je ne ratuval je deco delal.
Nastajlo se je pre Sveti Jeleni
Posle Čakovca si smo se zišli v Šenkovco pre kapeli Svete Jelene polek štere so Zrinski zafremali svojega mauzoleja vu šteromo je svoj vječni mir našla glava Sigeckog junaka, tu se smiril Nikola Zrinski Čakovečki, šteri je nastradal od vepra v Kuršanečkoj šumici i hajdi drugih članova obitelji Zrinski. Morem vam reči da se je zišlo hajdi ljudi poštovatelja familije Zrinski, od državnoga vrha pak na niže. Kak je to i red bili so i govori kaj se zazvedi zakaj se je itak tuliko ljudi zišlo i to naši, a i sosedi z Mađarske. Se se je reklo, znova smo zazvedili kak je to bilo pod Sigetom, a ruon tak so dečki z Garde i domaći opčinski načelnik sima dali na znanje kak je zadji cajt kaj se mauzolej Zrinski zlišpa kaj bi ga mogli pokazati sim gostima i turistima jerbo kak ve zgledi to je ne za kazati. Dvorac Zrinski v Čakovco je zlišpani tak da se toplo nadjam da bode ve i Mauzolej na redo. V šenkoski župni cirkvi služena je meša zadušnica za Zrinske i za se šteri so svoja živlenja dali kaj nam bode lepše i bolše vu ovoj Lepo našoj.
Nazaj v čakoski Stari grad
Kak je bila v pitanjo velika obletnica si oni šteri so došli v Šenkovce vrnoli so se v Čakovec, v Riznico Međimorja de je predstavljena kniga gardinoga profesora povjesti Markusa Piliča „Tko je tko u obitelji Zrinski“ i to na mađarskom jeziko. Ta je kniga prinas došla na svetlo dneva pred dve leti, a ve so jo dečki z Garde dali prevesti na mađarski jezik tak kaj bodo i naši sosedi z Mađarske zazvedili što je što v familiji Zrinski kaj ne bodemo čuli kak je „Hrvatski leonida“ Nikola IV Zrinski mađarski vojskovođa ili pak kak je Nikola VII Zrinski Čakovečki Mađar sam zato kaj je svoj ep „Adrijanskoga mora sirena“ napisal na mađarskomo jeziko. Znate kak je to si se grablejo za nekaj kaj vredi.
Dečki z Garde so nas razveselili jerbo so sima onima šteri so v pondelek došli v multimedijalno (kak se to stručno veli) dvorano Riznice Međimorja pokazali sabljo z šterom se je Nikola Šubič Zrinski boril protiv Osmanlija pod Sigetom. Istina Božek neje to originalna sablja, ali je vjerna replika originalo šteri se čuvle vu Muzejo v Bečo. Hajdi dugo so dečki z Garde špehali kaj dojdo do replike te Nikolina sablje i na se zadje so uspeli prek svojega počasnoga člana mađarskoga generala, profesora i doktora Joszefa Padanyia. Sablja je tu pokazana, a si oni šteri so ne došli na predstavljanje bodo jo mogli videti vu čakoskomo Muzejo polek mača Petra Zrinskoga.
Na se zadje se je išlo „U boj, u boj…“ vu Siget
V minulo nedelo si poti so vodili vu Siget na završno obiležavanje 460 – te obljetnice Sigecke bitke. Kak so Zrinski vitezi i kadeti došli v Šenkovce tak je Zrinska garda išla vu Siget. Nejpredi smo se zišli v Parko mađarsko – turskog prijateljstva. Te park je zlišpani pred deset let, o tomo sam več pisal, da se je obiležavala 450 – ta obletnica Sigecke bitke. Unda je zlišpani spomenik Nikoli Šubičo Zrinskomo i sultano Sulejmano Veličanstvenomo, a po celomo parko so napravlene „postaje“ – panoi na hrvackomo, mađarskomo, turskomo i engleskomo jeziko. Kaj je naš hrvatski jezik došel na „postaje“ nejveč se je boril precednik Čakoske matice profesor Bartolič, ali dok je to napravleno on je več bil pre dragomo Božeko na računu. Kak bilo da bilo nejvažneše je kaj si naši ljudi šteri dojdejo vu te Park morejo na našemo jeziko prečitati kak je to negda bilo vu 16. stoletju, kak predi, a kak pak posle. Rekel je precednik Garde kak bi to moral biti Park hrvacko – mađarsko – turskog prijateljstva jerbo šporckim rečnikom rečeno 1566. leta so vu Sigeto igrali Hrvati i Turci, a Mađari so sam igrališče dali. Si znuomo da je Nikola mel cirka 2800 branitelja i si so bili Hrvati, a sultan Sulejman je mel cirka okoli sto jezer svojih ratnikov, cirka 80 000 Turaka, 15 000 janjičara, a kcoj još 700 Moldavaca i 300 topov. Od branitela Sigeta je preživelo nekaj malo vejč od deset, a sultan je ostal bez, kak se pripoveda, 20 jezer svojih ratnikov. Sulejman je ne bil na prvi liniji, ali je hmrl predi nek je Siget opal v jegove roke tak da je ne mogel aldomaša spiti.
Ovo leto na obiležavanjo Sigecke bitke Grad Zrinskih i Županija Zrinskih so ne meli svoje predstavnike i zato je ne nišči nikaj rekel dok je veleposlanica Turske rekla kak je Nikola Šubič Zrinski mađarski vojskovođa i kak so prijateli Mađari postavili bisto u Sulejmanovoj rodnoj hiži v Trabzono. Velijo da smo jim i mi prijateli, ali so nas ne zvali. A kak je Nikola mogel biti mađarski vojskovođa ak so si braniteli sigecke utvrde bili Hrvati? Veleposlanica je ne pozabila spomenuti i Mohačko bitko de je osmanska vojska, pred 500 let (1526.) potukla krščansko vojsko. Nek se zna.
Jožek Radnik