Nafta, još navek, gospodari z svetom, struja je pre fal
Odnavek je poznato što ima peneze, očem reči, što gospodari z financijama te gosopdari i z celim svetom. Ne sam da je to poznato nek se o tomo i naši mladi vučijo vu školama, no, ne ruon v pučkoj ili pak sredjoj školi, ali na fakulteto ili kak to mi velimo vu visokim školama stoprocentno je. Rekel mi je i pajdaš Tonča kak so se oni to vučili na jegovomo Ekonomskomo fakulteto i zato je on najbrž tak škrti. Znate kaj, dok on plati rundo unda je na te den drugo leto proščeje na našemo hataro. A po tomo kaj so nejbole škrti oni šteri nejveč imajo je poznato celomo sveto. Ve bi morali reči da so to Ameri ili pak Židovi kaj ne bodem dale nabrajal. Stoprocentno je sigurno jeno da oni šteri nejveč imajo gospodarijo z celim svetom šteli mi to priznati ili ne. Poglednite sam Amere i jivoga precednika Trampa, se kaj jemo padne na pamet on to napravi, negda je to dobro, a nejvečpot je ne. Nekaj kaj je napravil v pondelek v sredo je prekrižil, a v petek je donesel več nekaj novoga. To si znuomo, ali zato ruon ne razmem naše ljude kaj se oni sekerajo zbog radi Trampa i zakaj fljučkajo po jemo. Najme kaj, pak Amerika (čitaj: SAD) imajo cirka okoli 350 miljonov pučanov, a prek tristo milijonov ima pravo glasa tak da se je Tramp ne sam zebral za precednika i moral je dobiti prek sto milijonov glasi, a si znuamo kuliko pot je to vejč nek nuca naš bilo šteri precednik. I to je još ne se, si oni šteri so Trampo dali svojega glasa nekaj očejo od jega i ve si probajte premisliti kaj se on mora delati, kaj speluvati kaj bodo si oni šteri so mo dali glasa zadovoljni. Lefko je to z malim ljudima, ako opče Ameri imajo male ljude, ali z ovima šteri nejveč imajo žnjimi je prekprokleto teško, kak z onima kaj trgujejo z naftom tak i z onima kaj bi furt ratuvali jerbo delajo orižje i municijo za ratuvanje kaj ne bodemo i se druge spominjali. Ak so oni meli nejveč od sih na sveto dok se je Tramp sel vu precedničko foteljo unda to tak mora i ostati i ne sam ostati nek morajo meti čuda vejč dok bode on odišel kak so meli dok je došel. Zato so mo pomogli kaj bode znova otprl vrata bele hiže vu Vašingtono. A brzčas je bil bolši od si drugi ak so ga po drugoč zebrali. Bodite sigurni da je Bajden nekaj vredil i da je ne negdi zahuzal bili bi ga znova zebrali makar je on niti ne znal kaj je bil precednik Amerike.
Saka čast autima na strujo, ali nafta još navek nejbole ide
Verjem da znate kak se pripoveda kak so Ameri prekprokleto spametni ili pak imajo veliko srečo jerbo kam god se oni zapičijo, kam god dojdejo navek nabasajo na nafto. Ili pak znajo čuda vejč nek mi drugi? Tak je bilo vu Venecueli, pak ve v Irano i kaj ne bodemo dale nabrajali. Ovo z Venecuelom so rešili, kak bi to rekli, prek noči, ali Iran se je pokazal kak malo (i ne sam malo) trdeši oreh tak da se te “„tihi rat“ vleče več hajdi dugo. Si smo čuli za Hormuški tjesnac črez šteri se prevozi vejč od pol svecke nafte, a žnjim gospodarijo Iranci, nejvečpot, a unda malo Ameri, malo je zaprti, a nejvečpot dela kak komo paše ili pak što vejč plati. Vidli so i Ameri, a mam posle i Iranc, da se sima splati dok je Hormuški tjesnac zaprti. Dok je zaprti nafte ga je dosta za se, makar ne preveč, ali je čuda dražeša nek je to normalno, ako se denes opče zna kaj ja to normalno. Z jene strane cene skačejo, a z druge strane ovi štampajo peneze i što zna kak bode dugo to trajalo, očem reči, što bode prvi popustil. Dok svet počne preveč glasno cviliti i brundati zbog radi cene nafte unda Ameri i Iranci skupa otprejo Hormuškoga tjesnaca na par dni i cene nafte naglo padnejo, ali ne tuliko kuliko so gori odišle. Ali to ne traje preveč dugo i tjesnac se znova zapira. Što je mel dosti penez i dosti mesta te si je kupil dosti nafte, ali čim se tjesnac znova zapre si zdižejo cene kak oni kaj so kupili falešo nafto tak i oni kaj so kupili dražešo nafto, kak kava, pivo, sladoled i kvartelj prinas na Jadrano. Pak se železo kovle dok je vroče. Kaj bodeš cene zdiguval dok nišči ne kupuvle. A kuliko znuomo električni auti ga još jako malo, premalo, tak da je nafta još navek nejvekši biznis na sveto.
Smetje, a ne nafta je nejvekši biznis?
Još negda dok sam bil mali, a ve več imam pomalem i duho po čempresima, se je pripovedalo kak se dela na tomo, očem reči, znanstveniki delajo na tomo kak se bode z smetja dobavljala nafta. Ne znati komo je to prvomo palo na pamet, ali stoprocentno sam siguren da je Nikola Tesla nikaj ne o tomo govoril jerbo se kaj si je on zamislil je našlo svoje mesto med nama ljudima i zdiglo nam je standarda i to par metrov ober zemle. No pustimo ve našega Teslo i idemo nazaj na smetje. Brzčas je z smetja ne napravlena nafta, ali je smetje postalo nejvekši svecki biznis. Si oni šteri se bavijo z smetjom ili pak se motajo okoli smetja vedrijo i oblačijo z ovim našim svetom skupa z ovima šteri gospodarijo z financijama. Verjem da si znuomo jerbo se več tjeden dni, ak ne i duže, si spominamo o smetju. Jeno petnaest-dvajsti let smo se spominali o varaždinskomo smetjo vu balama ili pak o našemo smetju v Totovco, a ve pak je prek noči „buknulo“ smetje v Gospičo. I to ne kakši god otpad nek uvozni, stranjski i to opasni i otrovni. Ve najempot so se počeli si čuditi, kak picek glisti, otkod v Gospičo opasni otpad na hataro PPK Velebita i što ga je, kak i zakaj dopelal. Još se si spituvlemo de so bili državni inšpektori za smetje, de je bil minister, de je bil premijer jedino se nišči ne čudi kak je to precednik države, Zoki, šteri se navek prvi se zna tak kesno zazvedil. Čim je to smetje zišlo na svetlo dneva mam se je pokazalo da so si se znali, a nišči je nikaj ne rekel. Si pripovedajo kak je to mogoče kaj se je v Gospič i okoli jega dopelalo 1500 vekših ili pak menših kamijonov sakefele otpada tak da je ne bilo mogoče da je te kamijone ruon nišči ne videl. Inšpektori so se pokrili po vuhima (i očima) jerbo kak velijo kamijoni so meli papere črno na belo da pelajo običnoga otpada, a dok so ga zmetali i dok ga je zob vremena zel pod svoje unda je došlo do toga da vu tem kupima ga je sega tak kaj se i si spituvlejo je li je i voda vu ličkomo vodovodo dobra za piti?
Javili so se i drugi, pak i Varaždinci, kak se okoli Mundusa motajo sumnjivi kamijoni stranjskih registraciji z smetjom. Ve bode na se zadje zišlo kak je ono smetje v balama bilo tam nalečeno kaj ne bi nišči pital, a kaj se to vozi vu prazne Mundusove pogone?
Najbrž se bode nešči i zapital a kakšega smo otpada to mi kurili prinas v Totovco na dva mahe? Je li je to bilo sam zbog radi toga kaj se z velikih bregov smetja napravijo mali ili pak je i tu bilo nekaj drugo v pitanjo?
Lepa naša je mala zemlja za veliki odmor, a ne za jezero toni Austrijskoga, Nemačkoga, Taljanskoga i Slovenskoga opasnoga otpada. Pak so se naši ljudi fal prodali, naši služijo miljone, a oni šteri nam pošiljajo otpada milijarde. Pak več bi mogli meti nekšo pamet. Što bo nam pazil na Lepo anšo ak ne bodemo sami?
Ve so se i nam Međimorcaj otprle oči pak spituvlemo jeni druge kaj delajo azbestne ploče v Lončarevo pre Muri, a kaj pak delajo kupi plastike vu Svetomo Đurđo na brego?
Vladek i družina za šankom se je našla na Fejsbuko i veli Vladek: Kuliko ja znuom voda je nigdi ne dobra za piti, a ne sam v Liki!
Jožek Radnik