Da sam Zlatko Daličov je li bi me štela?
Neje bilo dosti kaj se po našim sakefele medijima bajalo Thompsono posle jegovi svecki koncertlini v Zagrebo i Sinjo. Kak znuomo v Zagrebo je publike bilo prek pecto jezer, a v Sinjo prek stopedeset jezer nekaj meje od deset pot vejč nek ima varoš Sinj pučanstva. Kak smo čuli, vidli i čitali nikaj se hudoga na tem koncertlinima ne pripetilo pak je unda trelo nekaj zmisliti kaj se Thompsono dene na hrbet jerbo nebre on kak rođeni desničar biti brez greha oliti brez falinge. Ali dok se zazvedilo da je terasa prek štere je novinarka Nove TV Danka Derifaj plazila v Thompsonov stan ruon tak Markijova unda so ga ostajli na miro i obrnuli so se prema našemo labodoritaškomo izborniko Zlatkijo Daličo jerbo on je zašpotal se one šterima smetajo labodoritaši i jiv izbornik. Smetajo jim jive želencije, svecke i evropske, smeta jim dok naši labodoritaši pobeđuvlejo i dok je za to zaslužan ili pak „kriv“ Zlatko Daličov jerbo so on i labodoritaši, ruon tak, dopeljali na Jelačičov plac v Zagrebo prek pecto jezer ljudi posle srebra v Rusije, a on je ne Hrvat z Lepe naše nek je on došel z Livna, a kak si znuomo Livno je v Hercegovini. Razmem kaj se za Zlatkija grablejo Dalija Oreškovič, Vlatka Pokos, Severina i Jadranka Kosor jerbo je Zlatko pravi mož i imajo kaj videti i kaj v roke prijeti, ali kaj pak je naš Ivekbrežni počel Zlatkija na red pobirati, očem reči, nebrem razmeti kaj se itak Zlatko jemo zameril? Brzčas je Ivek jalen kaj se Zlatko Daličov čuda bole od Iveka razmi v labodoritanje, a Iveko to nikak nejde niti od roke, a kamoli od noge. Još nekaj, ne razmem kaj se Iveka dotikavle, kaj pak mo smeta to kaj Dalič hoda v cirkvo, pak je Ivek nigdar ne delal stisko v cirkvi. A to kaj je Zlatko rođen v Livno, zakaj bi mo to morala biti falinga. Imamo trenera v rokometo, Dagura Sigurdssona, šteri se je narodil na Islando pak mo je to ne falinga jerbo se razme v posel za šteri je dopelani i za šteri je plačeni. Ruon tak kak i Zlatko. V rokometo smo drugi na sveto (srebrni) kak i vu labodoritanjo! A Zlatko nam je sima pokazal i dokazal da se razme v posel šteroga dela i zato te znova pitam, mala moja, da sam Zlatko je li bi me štela?
Braniteli protiv
Branitelji so se pobunili protiv antifa-festivala „Nosi se“ v Benkovco šteri je trebal biti, kak so rekli, „nastavak balvan revolucije drugim sredstvima“, a za jega peneze davle Ministarstvo kulture i medija Lepe naše. A to so naši penezi, rekli so braniteli, a festival na šteromo nastupajo Oliver Frljič, bivša novinarka Faktografa štera sako malo zdiguvle tri prste i zadarski antifa Marko Vučetič nebre pokazati nikaj dobroga i spametnoga.
Branitelji v Šibeniko so se, ruon tak, pobunili protiv festivala alternativne ljevice v Šibeniko („Fališ“), a šteri se napaja z penezi z gracke kase. Braniteli so se pobunili jerbo se žjiv norca delajo i jasno i glasno so rekli da se za to neso borili kaj bodo se gracki penezi trošili za ono kaj je protiv grada, građana, a posebno branitelov.
Što je itak kriv???
Nekaj takšega smo i mi meli v Čakovco za Prcinkulovo da so pravoga derneka naprajli kruševački derači i to sam dva dni predi Dneva pobjede i 30-letnice vojno-redarstvene operacije Oluja. Več je mesec dni minulo od toga derneka, a još se nišči ne oglasil z grada Čakovca kaj bi se zazvedilo što je itak dopelal kruševačke derače na glavno čakosko proščeje? Nišči se je ne „pofalil“ kak jiv je pozval i kaj jiv je pustil v Međimorje, očem reči, v Čakovec i to na glavno proščeje. Nekak so i naši čakoski i međimorski branitelji stiha, nekak so se slabo pobunili jerbo ak se nadjajo da bode nešči z čistoga mira priznal kak jiv je dopelal ili ak bodo čakali kaj bode nešči radi toga „velikoga greha“ podnesel ostavko dugo bodo čakali. Znuomo što je organizeral glavno proščeje Prcinkulovo, to je grad Čakovec i jegovi turistički težaki tak bi oni brzčas morali predi sih znati što bode došel i što bode zabavljal
Međimorce na čakoskomo proščejo. Z lepim smo dernekom preslavili glavno proščeje i čestitali Međimorcima Den pobjede kak i branitelima jiv Den! Nejpredi so turistički težaki poslali pozivnice za proščeje z mađarskaj zastavaj, a unda pak so kak „cukor na krajo“ došli prekdrinski derači z svojim dernekom. Brzčas bi morali nekoga nekaj pitati , a moral bi se nešči zafaliti na poslo šteroga ne zna delati kak Božek zapoveda?
Klopoci so zakesnili
Več je ne nikaj kak je to negda bilo jerbo otkak je sveta i veka klopoci zo se postavljali v goricaj za Bartolovo. Si znuomo da je Bartolovo i kaj klopoci delajo v goricaj.. Ak je slučajno nešči pozabil Bartolovo je 24. augustuša, a na te den je proščeje v Pupini seli, očem reči, vu Prislavco, a klopoci se postavljajo v gorice kaj svojim kričom restiravlejo škvorce šteri se navek dotepejo dok je grozdje zrelo. A več par let je se drugač jerbo grozdje čuda raneše zreli pak i bratve grozdja raneše počnejo, a škvorci o tomo se znajo pak i raneše hodajo kvara delat.
Ve bode trelo klopoce postajti mam po Veliki meši ak očemo kaj bode nekši hasen od jiv i kaj se grozdje završi pod prešom, a mošt vu lagvima. Negda so berbe počele v drugomo tjedno vu septembro, a ve več završavlejo polovicom meseca. Naši vinogradari so meli šego kaj so postavljali klopoce i kaj so se prepravljali za berbo, ali od drugoga leta bode to se treba naprajti na vreme jerbo ak se mejajo vremena morajo se mejati i običaji ak očemo kaj bode se onak kak Božek zapoveda. Znamo mi da se Božek mora brigati i za ftiče nebeske, ali oni si nek pobirajo ono kaj je beračima pobeglo i kaj so ostajli na trsima, a nebre biti kaj bodo škvorci došli prvi, a mi berači bodemo brali ono kaj je jim ostalo.
Berbe so se več navelikom hapile, ali morem vam reči čim ga več grozdja znači da ga več posla, a čim ga več beračov morale bi se čuti pesme po celomo brežnomo Međimorjo, a ne kaj si gledijo sam posla, a pesme i veselje nikak da dojdejo na red. Rekel sam vam več na početko da je več nikaj ne kak je negda bilo, dok se je negda bralo zbog radi pajdašije unda je bilo i pesme i pijače, a denes je to pravi posel i saki težak si mora zaslužiti dnevnico i niti jeden gazda ga ne pita je li ima sluha nek kak fletno bere. I unda se najte nikaj čuditi kaj berači dojdejo z berbe trezni, ali z punom buksom. A nebre težak meti se i peneze i zadovoljstvo?
Jožek Radnik