Bernarda – „Nejjakša žena“ z Puščin!
Tak mlada, a več nejbolša ne sam v Lepoj našoj, ne sam v Makedoniji, ne sam vu Srbiji nek v celoj Jugoistočnoj Evropi, a to je gospa Bernarda Cecelja direktorica i gazdarica poduzeča Bernarda z Puščin. Poznato nam je kak je gospođa Bernarda rođena vu Varaždinskaj Toplicaj, ali je svojo firmo, svoje poduzeče zafremala v opčini Nedelišče i v mesti Puščine. Niti gospođa Bernarda je ne ruon stoprocentno sigurna zakaj je za svoj biznis zebrala Međimorje naše malo, ali nekak joj je naš međimorski zrak pasal i dok je došla prek Drave, dok je došla v Puščine se joj je nekak išlo od roke tak da ovo priznaje na konferenciji „JAKA ŽENA“ štera je održana vu Sbiji vu Vrnjačkoj Banji de je gospa Bernarda zebrana za nejbolšo poduzetnico v Jugoistočnoj Evropi, a jeno poduzeče je dobilo nejvekše priznanje štero so davali na toj konferenciji, a to je priznanje za DE LUXE lidera v proizvodnji sakefele postelji, a i madracov šteri pašejo vu te postelje na šterima se čovek (kaj ne bodem pozabil i žene) more naspati do mile volje. To je još ne se, se one šteri so došli vu Vrnjačko Banjo je gospa Bernarda navčila kak se more biti uspješan v biznisu, kaj i kak tre delati kaj čovek postane lider na tržištu, da za“uspeh prek noči“ treba nejmeje štiri ili pak pet let i zbog radi toga je gospa Bernarda dobila GRAND PRIX nagrado kak najpoduzetnica minuloga 2020. leta. Lepo je to čuti kaj mi prinas v Međimorjo imamo takše poduzetnike kakše drugi nemajo, očem reč, takše kakše drugi morejo sam senjati. Što zna kakše bi se nagrade bila pobrala gospa Bernarda da so ovi vu Vrnjačkoj banji znali kak se gospa Bernarda bavi i zdrastvenim turizmom i kak ima svojega hotela z bazenima z ljekovitom vodom, a osim toga ima restorana, picerijo, slastičarno, farmo… i kaj ne bodem dale nabrajal. Dobro so rekli sosedi vu Vrnjačkoj Banji da oni nemajo tak sposobno ženo. Ne sam da so rekli nek so to i priznali. A nam ne ostaja drugo nek kaj se bodemo štimali z gospom Bernardom i z sem onim kaj je za nekaj meje od tridesti let napravila v našem krajo, v Lepoj našoj, v Evropi… Gospa Bernarda, saka čast i kapa do poda!
Alojzije Šestan „Stvaratelj za stolječa“
Nekak v isto vreme kak je gospa Bernarda postala nejbolša regionalna poduzetnica gospon Alojzije Šestan, osnivač, direktor i (su)vlasnik, očem reči, alfa i omega firme Šestan – Busch je dobil nagrado za životno delo vu poduzetništvu sa zlatnom lentom pod nazivom „STVARATELJ ZA STOLJEČA“, a nagrado mo je dal Međunarodni ekonomski forum „Perspektive“ i Društvo Promo Global Zagreb i to priznanje so mo dali za razvoj poduzetništva na području Srednje i Jugoistočne Evrope. Si znuomo da je firma Šestan – Busch na nejbolšemo glaso kaj se dotikavle proizvodnje kacigi štere čuvlejo glave ratnikov po celomo sveto. Niti nebrejo tuliko kacigi naprajti kuliko jiv se nuca jerbo nam je sima poznato da je na sakomo kontinento nekši rat i to negdi vekši, a negdi menši, ako opče rat more biti menši. Hajdi je zahvali dobil gospon Šestan kaj mo pišejo oni šterima je Lojzekova kaciga pomogla kaj jim je glava ostala cela i na ramenima. Morem priznati da je i meni pomogla dok sam došel jesno, očem reči, rano vjutro dimo, a žena me dočakala z mlinčekom. Lojzekova firma posluje več duže od tridesti let i sako leto hiti vum z proizvodnje nekšo novo kacigo tak da prodavlejo kacige tijam v Ameriko. Kaj vam ne bode čudno ak bodete vidli i američkoga precednika Trampa u Lojzekovoj kacigi. Znate unda kuliko Lojzekove kacige vredijo ak so jiv i Ameri kupili, a sima nam je poznato da oni navek koristijo ono kaj je nejbolše. Lojzekove kacige je i umjetna unteligencija dela na visoko peto mesto na sveto i to po kvaliteti. Kak sam zazvedil Lojzek se ravna, skupa z dečkima iz Tehniksa, kaj bodo naprajli i kontejnere šteri bodo otporni na sakefele metkov i drobneše šrapnele. Fala Lojzeko kaj je pokazal celomo sveto kuliko vredi naša međimorska pamet i međimorske roke. Fala mo – to je nejmeje kaj mo moremo reči!
Kaj se pamti Stipe???
Pripoveda se, a to mi je i teca Franca potvrdila, da so stareši ljudi kak mala deca, ali to ne vredi za se stareše ljude. Napriliko to ne vredi za Stipo Mesiča. On se je ve dok je več čistam blizo 91. letu zmislil kak je zapamtil kaj se je pripetilo za vreme Drugoga sveckoga rata i to 1942. i 1943. leta dok je on mel sedem ili pak osem let. Ne da je to čudno nek je to jako čudno jerbo do ve je to još nigdar ne rekel kaj so mo se skazale ratne slike i kaj se jiv zmislil, ali sam ono kaj so ustaše delale po svojim logorima šteri so bili negdi vu Slavoniji blizo Stipea kaj je on to se mogel videti. Zakaj je to jako čudo? Zato kaj se Stipe čuda toga ne zmisli kaj se je pripetilo dok je bil stareši i dok je čuda bole pamtil nek dok je bil dečec vu špilhozama i dok se je v pesko igral. Napriliko on se nikak ne zmisli kak je 1990. leta popeval vu Australiji Juru i Bobana, a i druge ustaške pesme. Ruon tak se ne zmisli da je posle pesmi vu Australiji dobil od naših gastarbajterov tri čeke z dolarima, a štere je premenil v peneze dok se je vrnul v Lepo našo i ne jiv je del v državno kaso. Ruon tak se ne zmisli dok je skupa z Jožom Manoličom štel zrušiti prvoga precednika Franjo Tuđmana jerbo je najbrž v Domovinskomo rato drukal za Jugo.. Nikak se nebre zmisliti kak mo je finska Patria, od štere je naša hrvacka vojska kupila samohodke, poslala mito od 600 jezer ojerov, a on jiv je, kak je rekel, nigdar ne dobil. Dok je bil precednik Lepe naše nosil je v Hag ratne topničke dnevnike, ali niti to je ne nigdar priznal. Ruon tak se nebre zmisliti što je pobedil v Domovinskomo rato i kak so naši braniteli i naša hrvacka vojska zafremali Lepo našo i zato još navek hoda zdiguvat ustanke, skupa z Milčijom Pupovcem i drugim antifašistima, vu Srb i slavi rođendane Ljubičice bele vu Kumrovco. Nikaj mo je ne v pameti ostalo kaj se Bleiburga dotikavle, Jazovke, Hude Jame, Macelja, Gologa otoka, Lepoglave, Križnoga pota, Jasenovca od 1945. – 1951, Vukovara, Škabrnje, Lipika, Ovčare, Srebernice:::Nikak se nebre zmisliti da so mo minuli obedva mandatlini štere je mel kak precednik Lepe naše jerbo se još navek šepuri kak doživotni precednik kak je to negda bil Ljubičica bela. Najbrž je to v pitanjo druga mladost da se je zmislil ono kaj je ne nigdar znal, a niti pak čul i kaj mo je nigdar ne bilo na pameti zadjih osemdeset let. Čudne smo biljke mi ljudi i kuliko vidimo ima nas sake fele!
Jožek Radnik