Moramo si z policaji biti zdobra
Of tjeden smo preslavili godovno svetoga Mihaela zaštitnika naše hrvacke policije, policajki i policajov. Znate kak je to, dok se nekaj fešta unda tre dojti kcoj, a pogotovo ak te zovejo. A posebno ak te zove policija jerbo z policaji si moramo navek biti zdobra. Znate kak je to vu živlenjo, nigdar ne znamo kaj se nam more pripetiti jerbo smo furt na cesti, očem reči, vu prometo i nigdar ne znaš da se more nekaj pripetiti, da negdi zahuzaš i napraviš ovakšo ili onakšo greško. Verjem da znate da so policaji zmislil tuliko propisi sam zbog radi toga kaj negdi moramo fulati kak god pazimo. I zato si moramo biti zdobra z policaji, a i oni z nami jerbo su oni tu kaj bodo reda držali, a ne kaj bodo prek nas trenerali strogočo. Ak mene pitate kaj ja očekuvlem od policajov bodem vam i rekel: štel bi kaj bi policaji nam pomogli dok dojdem v nevolo, a ne kaj mam jemlejo vum z žepa notesa i pišejo štrofa ili pak jemlejo frulico i moramo puhati. Kaj bom vam rekel, a znajo i policaji da je teško navek trezen biti i voziti auta i bez jenoga maligana jerbo pajdaše imamo seposot, a čuda so nam hujši (čitaj: bolši) v brežnomo Međimorjo jerbo tam so gorice, tam so pelnice, tam je vino i tam se pije.
Sima nam je poznato kak so brežni Međimorci ljudi dobroga srca i niti jeden te ne pusti z goric, z pelnice ak si bar nekaj ne spiješ. Ako si nikaj ne spiješ to je uvreda za gazdo goric, očem reči, gazdo pelnice tak da nejvečpot nejdemo z goric z suhim požerakom. Makar je Međimorje ne veliko, ali je nigdar ne dom tak blizo goric kaj te nej mogli zastajti policaji i kaj ti nej frulica zapopevala. Ve vidite tu je cajt de bi nam policaji mogli pomoči, ak si je čovek nekaj malo spil i ak je to ne čuda prek onoga kuliko je dopuščeno unda bi tu policaji mogli bit dobroga srca, kak i gazda goric šteri je natakal retke gemište, i pomoči čoveko kaj bi vredo dimo došel. Verjem da i policaji to znajo da ak malo vinjenomo šofero napišejo čeka na jeno sto ojerov, kaj je nejmeje, to ne bode pomoglo kaj se mam strezni makar se prepoveda da dok te rebnejo po žepo mam si trezen. Tak vam i moja teca Franca veli, ali vam ja to ne verjem. Prosil bi policaje kaj bi oni to sprobali pak kaj bodemo unda i mi zazvedili od čega muhe crkajo.
Sveti Remuš Štrigovčanec
Mam posle Mihalja i Dneva policije Štrigovčanci so obslužavali svoje glavno proščeje – Remušovo. Makar je Štrigova cela rezrovana, ali je došlo hajdi proščenikov kaj se pokloni i pomoli svetomo Remošo., svojemo sveco. Štrigoski turistički težaki i jiv šef Jožek (moj imejak) Mikecov so organizerali dneve svetoga Remoša, šteri so trajali celi tjeden, a morem vam reči da je cirkva (čitaj: katedrala) z dva turne jako lepo zlišpana i saki šteri dojde ima kaj za videti. Štrigovčanci so predi nekaj meje od dva mesece dobili novoga župnika, velečasnoga Igora Radišiča šteri je sima lepo, jasno i glasno rekel kak je sveti Jeronim rođen vu Štrigovi kak je to napisal i monsinjor prof.dr. Matija Berljak, a on je to prečital vu Vatikano v buli pape Nikole petog šteri je još 1447. leta objavil urbi et orbi da je sveti Remuš rođen v našoj Štrigovi (negda Stridono), a Dalmoši se morejo sam štimati z našim Remušom. Velečasni Igor je tak lepo govoril o svetomo Remušo kak da ga je sam Remoš poslal v Štrigovo vu službo.
Regionalni edukacijsko – rehabilitacijski centar
Novoga rehabilitacijskoga centra je otpral precednik Vlade Drašek Plenkovičov. Tua nova Specijalna škola, kak jo mi skračeno zovemo, zazidana je v Martanama i bode pomagala deci i osobama z invaliditetom, djeci z poteškočama v trazvojo i psihosocijalne podrško. Centar je veliki, čuda vekši nek je bil stari Centar za odgoj i obrazovanje polek Treće osnovne škole v Golobetki, ali kak je veliki tak je i čuda koštal. Velijo se skupa prek šesnaest milijonov ojerov, a Vlada RH je dala cirka šesnajst milijonov. Ne bodete se zmislili, a pisal sam o tomo kak je to bilo dok je Plenković donesel milijone ojerov i došal je zapičiti prvo lopato i postaviti kamena temeljca, a oni šteri so došli kaj bodo svedoki toga povjesnoga događaja kaj se posle petnaest let spominkovanja i skakanja okoli sih vu Lepoj našoj počela zidati nova Specijalna škola so fučkali Plenkovičo brzčas zato kaj je on premijer i zato kaj je Hadezeovec.
A ve dok je došel otpirat toga velikog centra pak so gombali proriv jega i nametali so mo, prek Fejsbuka, takše grde reči kaj so ne za mojo kolumno. Bajali so mo kaj več penez nek v Međimorje davle v Dalmacijo, ali, ljudi moji, pak je Dalmacija čuda, čuda vekša od Međimorja. I još nekaj, da ste čuli šteroga Dalmatinca kaj je fljučkal i grdo govoril za Plenkoviča? Verjem da bi i vi predi dali onomo što vas fali nek onomo šteri na vas hiče drvje i kameje. Kaj velite? A i teca Franca se tu slaže z menom i ona je navek rajši dala onomo šteri si je žnjom bil zdobra.
Kaj bo z Palestinom?
Več hajdi dugo se si i to seposot spominkujemo kaj bode z Palestinom i Palestincima.
Znuomo kak ratuje Izrael proziv Palestine, očem reči, protiv Gaze i Hamasa šteri v Gazi hercuje i započel je svajo s Izraelom. Teško je tu biti spameten jerbo moremo sam reči ono kaj čujemo. Znate kak je ono glavno i zakaj te rat tak dugo traje i zakaj je tak krvavi i nemilosrden (ne šparajo niti deco), a oni šteri to delajo (Izrael i Hamas) držijo to za sebe. Jeno dva tjedne nazaj si so skakali v zrak kak trebajo se države sveta priznati Palestino, a i Lepa naša ruon tak. Morem vam reči da je hajdi državi priznalo Palestino, ali Izraelci nikaj ne bogajo nek i dale tučejo i bombarderajo Gazo. Naš precednik Milanovič je o priznanjo Palestine govoril na Skupštini UN i jega so podržali naše antife(Oreškovič, Benčič, Kekin…) i družina, ali je nišči nigdi i niti jempot ne rekel kak je Palestina još den denes ne priznala Lepo našo.
Nekomo so ne si šrajfi na brojo? Gracko grobje je zdiglo cene jerbo, velijo, so zrasli stroški živlenja!
Jožek Radnik