Kak je inflacija završila na smetju
Što je god našel ili pak zmislil to smetje trebal bi dobiti odlikovanje vlade RH i precednika Drašeka Plenkoviča i to z hrvackim pleterom jerbo od da se počelo kopati, prekapati i kuriti to smetje v Gospičo, Zagrebo, Varaždino, Osjeko, Totovco, Podturno i kaj nem dale nabrajal de se nestala je, očem reči, zginula je inflacija vu Lepoj našoj. No, mortik je ne odišla z sem, ali več se nišči ne spomina o joj kak da je najempot vušiva ili pak je vu zemljo prepola. SDP-e, Moremo, Most i drugi levičari kaj ne bodem rekel antifašisti so se prek noči prebacili z inflacije na smetje. Najgerek sam, jako sam najgerek kam se bodo itak prebacili dok se skuri smetje i dok bode ostal sam pepel?
Što bi rekel kaj i smetje ima svojo mafijo?
Još nekaj o smetlarima i smetjo. Sa sreča kaj je buknula afera z smetjom v Gospičo jerbo da je ne mi v Lepoj našoj bi još dendenes bili stoprocentno sigurni kak je prinas z smetjom se vredo, očem reči, da se z smetjom bavijo poštejaki, a ne mafijaši kak smo to meli priliko čuti i zazvediti ne sam prek cajtungi, televizije i drugih medijov nek i vu Saboro. Zišlo je na svetlo dneva, posle Gospiča, smetje vu Zagrebo, Varaždino, Splito… smetja ga je seposot kak tam de se je zavedilo tak i tam de se je još ne zazvedilo ili kak to doktori lepo velijo: nega zdravi ljudi, ima sam nepregledani. Tak vam je i z smetjom, nega oni, kaj se smetja dotikavle, šteri so bez greha, jega sam oni za štere se je još ne zazvedilo.
Verjem da se zmislite kak je negda Čakom bil nejbolši kaj se dotikavle pobiranja, prebiranja i pospravljanja smetja dok so ne Priločanci zafremali Prekoma, a Serjančari pak Murskoma i črez kratek čas so priločki i serjanski komunalci prestigli čakoske kaj se smetja dotikavle. Ve dok so ova velika smetlišča došla na svetlo dneva šepetuji se i to se glasneše i glasneše kak je i na čakoskomo smetliščo v Totovco ne se bilo onak kak dragi Božek zapoveda. Kuliko čujem i čitam institucije so počele delati svojega posla, a nešterne glavne fotelje so se prek noči spraznile, ona direktorska milom (direktorica je sama odišla), a ona šefovska v Totovco silom (šefa smtlišča so natirali). Neje lefko denes biti smetlar, očem reči, neje lefko obrnoti glavo fkrej i ne zeti peneze štere ti smetje, očem reči, stranjski biznismeni (čitaj: mafijaši) za smetje nudijao. De so penezi na cesti (čitaj: na smetliščo ) okoli jiv je navek velika stiska!
Kam itak plava naš labodoritaški brod???
Pred dva tjedne so v Splito na Poljudo igrali dva naši nejbolši klubi, tak bar velijo Dalmoši i Purgeri, i na se zadje so Hajdukovci odišli doli z igrališča kak pobedniki, pobedili so 2:1, makar so Dinamovci zabili se tri gole. Znate več kak, nejpredi so jenoga zabili Hajduko kaj so pokazali da znajo, a unda pak dva sebi kaj pomorejo Hajduko kaj pobedi. No nesam kanil o tomo govoriti što je kak igral, što je kak zabijal gole, što je fušal i što se je na krajo veselil, a što pak je v zemljo gledal dok je išel doli z igrališča, odnavek je tak bilo, pak je niti denes ne drugač kaj slavijo pobedniki, a tožni so oni šteri zgubijo. No, štel sam vam pravzaprav reči nekaj drugo, štel sam vas pitati kam itak plavajo te naši labodoritaški brodi, očem reči, kam ide of Hajdukov, splicki, a kam pak of zagrebečki, purgerski, Dinamov? Negda so Hajdukovci i Dinamovci meli svoje poznate škole nogometa, a posebno Dinamo, šteri je posle nizozemskoga Ajaksa mel nejbolšo školo vu Evropi i od te škole je jako dobro živel dok je resprodal te dobre, kaj dobre, vrlo dobre i odlične mlade igrače, a denes se v zagrebečkomo Maksimiro popevle čistam druga pesma. Ne sam v Maksimiro jerbo je niti v Hajduko ne nikaj bole. Poglednite napriliko vu ovomo zadjemo derbijo o šteromo se spominamo je na Poljudo igralo za Hajduk deset strancov, a za Dinamo osem. To je još ne se: trener Hajduka je Urugvajac, a šporcki direktor Poljak. Dinamo, bar za ve ima domačega trenera, ali je zato šporcki direktor Španjolac. Znuomo mi da so naši labdoritaški klubi ne tak bogati kaj bi mogli kupiti prvoligaške igrače tak da dopelajo one za štere imajo peneze. V Hajduko igrajo igrači z Madagskara, Austrije, Kosova, Španjolske tretje lige, Maroka, Gambije, Brazila (tretja liga), Bosne, Belgije, a Dinamovoga dresa nosijo Filipinac, Španjolac, Škot, Šveđanin, Slovenac, Rus, Zambijac, Bjelorus tak da od poplave strancov nebrejo dojti na red kaj bi igrali Marko Livaja v Hajduko, a Mislav Oršić vu Dinamo. Kaj bodete rekli na to da so Dinamo i Hajduk prvi pot od kak postoji Lepa naša ne meli svoje igrače na Sveckomo prvenstvo ovo leto v Ameriki, a Dinamo prvi pot od osamostaljenja Hrvatske nema reprezentativce u mladoj U – 21 reprezentaciji. Ne tak zdavnja je Dinamo mel odlične mlade igrače, ali jiv je resprodal ili pak podelil. Za Dinamo so ne bili dobri, a ve igrajo v drugim velikim klubima v Lepo našoj (HNL) i to jako dobro, a to so: Martin Šotiček i Anđelo Šutalo vu Hajduko, Luka Vrbančič v Osijeko, Marko Soldo vu Sigmi Olomouc, Branko Pavič i Moreno Živkovič vu Reki, Adriano Jagušić vu Slaveno pak Panathinaikoso, Leon Jakirovič vu Intero z Milana… Ve vidite svoje mlade talente so respustili, a vu maksimirske slačionice so dopelali neproverene igrače z Afrike, Azije, Filipina, Zambije, Rusije, Bjelorusije…. Čudna je to nekša šporcka politika v Maksimiro, takša je još nigdar ne bila?
Bernarda pak med nejbolšima
Kak sako leto tak i ovo se zbirajo nejbolši gospodarstveniki i poduzetniki v Lepoj našoj kaj se bode znalo što je itak nejbolši med dobrima. Ovo leto je med pet nejbolših došla, očem reči, zebrana naša poduzetnica Bernarda Cecelja štera je vu vrho posla z šterim se bavi i to kak gospodarstvenica i inovatorica. Ona je započela svoj poslovni pot z fabrikom Bernarda d.o.o štera je doma vu Varaždinskim Toplicama, a delala je madrace i postelje i to one nejbolše kak bi se si mi mogli dobro naspati jerbo saki čovek dok se dobro naspi unda se more naprajti onak kak oče i kak dragi Božek zapoveda. Fabriko madracov i posteli ima na našemo hataro i to v Puščinaj de je i počela delati z 13 težakov, a denes jena fabrika ima 250 težakov i skorom se kaj napravijo (madrace i postelje) prodavle vum Lepe naše i to nejbolšim hotelima vu Evropi i još dale po sveto. To joj je ne bilo dosti pak je vu svojim Varaždinskim Toplicama otprla nejpredi restorana, pak picerijo z nejbolšim picama, a na se zadje je na red došel i luksuzni hotel za zdrastveni turizam z ljekovitom vodom. Polek termalne vode, štera je kak vračtvo, tu so i sake fele fizikalne terapije i rehabilitacije. Bernarda je do ve dobila sakefele nagradi: žena leta, najpoduzetnica, inovatorica – vitezica, „Najžena 21. stoletja“ tak da je nikomo ne čudno kaj došla vu finale EY poduzetnika 2026. leta za štero jo je predložila struka, a dok struka veli da je nejbolša onda je to stoprocentno tak. Gde bi bil kraj Lepoj našoj da je več takši ženi. Gospi Bernardi kapa do poda!
Jožek Radnik