Posle filma došla je i kniga
Verjem da si znuomo, bar mi Međimorci, kak je familija Zrinski hercuvala v Međimorjo od 1546. pak do 1670. leta da je Petar Zrinski skupa z svojim šogorom Franom Krstom Frankopanom otpotuval na spominek k caro i kraljo Leopoldo I i kak znuomo odnod se je ne vrnul nek so jenomo i drugomo, posle leto dni rešta, odsekli glave. To je bil kraj pobune štero je započel Nikola Zrinski Čakoski, a nastavil jo je jegov brat Petar skupa z svojom ženom Katarinom, a rekli smo kak je to završilo. Nejveč se pripovedalo i pisalo o Nikoli Šubićo Zrinskom pradjedo Nikole i Petra, šteri je junački poginul v proboju kod Sigeta, a dosti se znalo i o Petro i Frano zbog radi jive žrtve i stradanje v Bečkomo Novigrado. O Nikoli VII Zrinskomo se je jako malo znalo makar je on rođeni Čakovčanec, živel je v Čakovco, a nastradal je Kuršanskoj šumici (čitaj: Kuršanečki lug) de se je na krajo lova zišel z rajenom divjim veprom i to ga je koštalo živlenja. Još den denes se ne zna kak je te vepar došel v Kuršanec, a još meje se zna kak je uspel sfondati nejbolšega i nejjakšega ratnika onoga vremena pred šterim so drhtali i Osmanlije i to dok je bil pod punom lovačkom spremom. Na to je još nišči ne odgovoril. Kuliko se je do ovoga leta malo znalo o Nikoli, kakši je bil, kaj je delal, kud se se je boril, koga je pobedil i kak je odišel k Božeko na račun tak je ovo leto napravleni film o jegovomo živlejo, a mam posle filma došla je i kniga tak da mi šteri očemo skorom se znamo o Nikoli. Znuomo da je fletno ostal bez jape (Juraj V Zrinski) i da je završil skorom se škole štere so meli vu ono vreme kak obrazovne tak i vojne. Govoril je šest jeziki (hrvatski, mađarski, latinski, nemački, taljanski, turski) v govoro i pismo, ali je zagorski, kak na filmo, ne govoril. Posle filma došla je i kniga profesora i doktora povjesti Hrvoja Petriča tak da se ono kaj smo ne zazvedili z filma to moremo zazvediti z knige. Ak pišemo povjest ili snimamo filma unda moramo paziti kaj pišemo i je li je to bilo kaj smo napisali ili pak pokazali. Napriliko na filmo se more zazvediti kak so se brati, Nikola i Petar, sfadili, a to je ne bilo istina jerbo je to nišči do ve nigdi ne rekel, a niti pak napisal. A kak so se sfadili ak je Petar prevel njapoznatešo Nikolino knigo Adrijanskoga more sirena z mađarskoga na hrvatski jezik, kak so se sfadili ak so se družili sako malo po kurijama štere so bile restepene po celomo hataro z šterim so hercuvali, a i Petar je nastavil pobuno i ustanka protiv Habsburgovci šteroga je Nikola započel? Što piše povjest ima i odgovornost, a ne kak mi šteri damo kaj nam našo hrvacko povjest piše mađarski povjesničar i unda se čudimo kaj on puljka vodo na svoj mađarski melin. Znuomo da je do prekfčera, dok je još bil na vlasti, mađarski, ve več bivši, precednik Viktor Orban mel v svoji kištici karto Velike Mađarske na šteroj je naše Međimorje malo bilo prefatbano s zelenom farbom. A sima nam je poznato da je zelena farba odnegda mađarska.
Kaj more biti važneše za grad Zrinskih od Nikole Zrinskog???
V Čakovco, mesto de se je narodil Nikola VII Zrinski Čakoski je minuli tjeden predstavljena kniga – životopis Nikole, štero je napisal, kak smo več rekli, profesor Hrvoje Petrić i to v Šajerici, a nišči od gracke vlasti je ne mel čas kaj bi bil došel na predstavljanje. Nišči je ne došel kaj bi čul kaj je se Nikola napravil za Čakovec, za Međimorje za Hrvacko. Moglo se je čuti kak je hajdi let predi nek je divji vepar napravil svoje nedjelo Nikola od Čakovca napravil središte ondašje Evrope i si so hodali v Čakovec na spominke, po savjete jerbo je on bil hrvacki ban, ratnik, vojskovođa, pjesnik, tajni savjetnik – spameten kak vrag (čitaj: vrhunski intelektualac). Dopelal je fratre v Čakovec i zafremal fratarskoga farofa, mel je svojo knjižnico nejbogatešo v ono vreme na ovomo hataro, mel je svojega dvorca v Čakovco i napravil je još jenoga za obrano od Osmanlija na Muri pre Legrado (Novi Zrin). Zazvedili smo kak je on bil „heroj šteromo je providnost povjerila v roke sudbino Evrope“, a mam posle tragične pogibije nazvan je „ocem domovine“dvjesto let predi Ante Starčevića. Kuliko vidimo moralo se dojti jerbo se melo kaj čuti. I ne sam to, ak Čakovec oče i dale biti grad Zrinskih unda jiv mora poštuvati i morajo gracki oci meti časa dok Zrinski dojde v Čakovec.
Dok se po bažoljo den pozna
Znate več šteri je to den dok se bažolj kuha po sim onim gradima, sim opčinama i sim mestima štere držijo do sebe? Odgovor je točen: to je prvi maj – praznik dela dok se ne dela nek si, kak težaki tak i penzioneri idejo na bažolj i na se ono kaj kcoj ide kaj ne bodemo pogače, orehnjače, langoše, pive i gemište spominjali. Kak je rekel Tomek Špičekov glavni mešter v Lepoj našoj kaj se kuhje i kuhanja dotikavle. Tomek se razme v kuhanje, ali mo je lininja takša kaj se mam i to z prostim okom vidi da čuda vejč dela na sprobavanjo nek na kuhanjo. No, da se razmimo, ali do toga treba dojti. Hajdi je toga on skuhal predi nek je počel drugima prepovedati kak se nekaj v kuhji i to za stolom i šporhotom dela. Nigdi se je ovo leto za prvi maj, kak bi to Tomek rekel, ne kuhalo po pravomo receptlino: negdi je bilo preveč mesa, a drugdi preveč špeha, drugdi pak je bilo vejč klobasi i to oni masneši tak da so bole plavali i to v črleni juhi jerbo so nutri stepli preveč paprike, a premalo zafrega, kaj ne bodemo ljuka spominjali. No, kuliko sam mel za čuti da je se kaj je skuhano bilo i ponucano jedino je v Čakovco dvapot bažolj sfalil. Ne znati zakaj se je to pripetilo sam sam čul one kaj so išli fkrej od praznoga lonca da so gombali kak se je to nigdar ne pripetilo partijcima dok je Ivek bil precednik, a ve čim je Lana došla ne da je bažolj sfalil nek ga ne bilo dosti kuhanoga. Kaj bi to moglo biti? Najbrž je došlo čuda vejč ljudi nek so se nadjali ili pak so nešterni bili preveč pošlokjeni pak so po tripot išli na kotel tak da ga za one šteri so malo duže spali ne bilo dosti. Ili so morali dojti kesneše. I to čuda kesneše jerbo znate kuliko tre kaj se skuha pošteni bažolj? A, prosim vas lepo, kakši je to bažolj šteri plava na juhi i šteri se bar par metri nečuje makar se duha po bažoljo zadržavle sam okoli auspuha. Verjem kak je Lana prava kuharica i da se joj to več ne bode pripetilo, ali kak je rekla teca Franca jempot i joj mora biti prvič!
Jožek Radnik