Srečne svetke i srečno novo leto
Za vreme minuloga Adventa smo čuli kajkakše čestitke za Božič, a ruon tak i za novo leto. Ne znati što je to zmislil i što je donesel k nam čestitko srečne svetke, se nejboše i sako dobro. Se to čestitari zgovorijo kaj se ne zna kaj vam čovek oče čestitati, očem reči sve bodo zmislili i čestitali čuda sega sam kaj ne bodemo spomenuli Božiča, a okoli jega, okoli maloga Isuseka, se celi Advent, a i celo Božično vreme vrti. Dok ljudi spomenejo srečne svetke ne znati ruon točno na štere so svetke to pravzaprav mislili. Se počne od Badnjaka i Božiča, a mam posle Božiča je sveti Štefek prvomučenik, a posle svetoga Štefeka je godovno svetoga Iveka evanđelista, apostola šteroga je Isus mel nejrajši. Mam posle Ivekovoga godovna so Nevina dečica štero je Herod sfondal, a mi ga opslužavlemo kak Herodeševo. Posle dohaja sveti Tomaš, a na staro leto sveti Sivestar, mam posle pak je bila nedela svete obitelji, Isusa, Marije i Jožeka, a na mlado leto se svetkuje Marija Bogorodica. Se je to lepo i dobro sam je čuda lepša čestittka: Srečnoga Božiča vam želim, dej nam Božek zdraviče, a k tomo veselje, na to mlado leto sega obilja. Čestitka kratka, jasna i se se zna kaj očeš pajdašo, rodbini, sosedo čestitati i kaj očeš da mo bode Božič i novo leto veselo zdravo i se ono kaj sebi želiš to jemo čestitaš, a ne sam ono: srečne svetke i se nejbolše.
Na Herodeševo se je žena vrnula od meše nekak poparjena i nikak je ne dala vum sebe kaj se je itak pripetilo v cirkvi i što jo je tak resfucnul. Nekaj sam si gruntal da je mortik proproved bila preduga, ali ne, na se zadje se zazvedilo da joj se je Evanđelje čitano pre meši ne nejbole dopalo. Najme kaj, v Evanđelju se spominje i ne sam spominje nek evanđelista naređuvle kak žene morajo, furt i navek, poslušati i poslunuti svoje može i to one zakonite. To joj je ruon ne pasalo jerbo se pre našoj hiži več na leta dela na tomo kaj ne da je žena glavna nek se nikaj ne napravi bez nje. Ve smo znova zazvedili da je to naš dragi Božek čistam drugač splaneral, ali kuliko vidimo žene se i z Božekove zapovedi zbrčkavlejo.
Lepo je čakati, očem reči, piti od polneva
Neje dugo trelo kaj se i mi Međimorci hapimo čakati novo leto od polneva jerbo se nebremo fčakati večeri. Negda smo hodali vum z Međimorja v Deželo ili pak v Marijo Bistrico, a par let tomo nazaj i prinas so počeli ispračaji staroga leta polne tak smo predi odišli na doček i predi smo se zišli z novim letom. Ak se dobro zmislim prvi so Nedeliščanci počeli z tom šegom pak je tak i ovo leto novo leto došlo nejpredi v Nedelišče. Dočeki so još bili v Čakovco, Središčo na Muri, Svetoj Mariji Dolnji Dobravi, Mali Sobotici… i na Mađerkinomo brego vu Štrigovi. Ne znati je li nam se je staro leto tak zamerilo pak se čim predi očemo ziti z novim i mladim letom ili pak idemo čim predi na dočeke jerbo ako predi dojdemo predi počnejo fešte, očem reči, predi se počne piti, veseliti i nazdravljati. Kakše ti je to novo leto ak jo ne dočakaš malo mamuren ili pak bar rahlo vinjeni. Kuliko sam mel za čuti, na Mađerkinomo brego ga bilo nejveč veseljakov na poldnevnomo dočeko makar so se z tem poslom hapili na ovo staro leto. Zazvedili smo kak se je na Mađerkinomo brego zišlo veliko mnoštvo veseljakov kaj mladih kaj malo stareših, tak da smo zazvedili kak zgledi veliko mnoštvo, a nišči nam je ne znal reči kakše je itak to malo mnoštvo. Razlika izmeđo maloga i velikoga mnoštva je isto takša kak i izmeđo malih i velikih Hrvatov! Najbrž!
Kaj se pripetilo Donaldo Trampo?
Američkomo precedniko Donaldo Trampo se je nekaj pripetilo na staro leto jerbo smo vjutro na novo ,leto zazvedili kak je napal Venecuelo, a nišči je ne pravzaprav znal zakaj. Ne sam da jo je napal nek je otpelal k sebi v Ameriko precednika Venecuele Nicolasa Madura i jegovo ženo. Pripovedajo oni šteri se nejbole znajo kak je precdnik Madura ne delal onak kak mo je to precednik Tramp pošepetnol. A zakaj bi on i tak delal pak ga je ne Tramp zebral i postavil. Znuomo si kak se je Tramp falil kak je on kak američki precednik ne započel niti jenoga rata, a ve to več nebre reči. Morem vam reči kaj si ja o tomo gruntam: si znuomo da je precednik Tramp navek nosil črleno kravato i neje ratuval, a ve čim si je del plavo kravato mam je počel ratuvati, a započel je svoje ratuvanje u Venecueli. Verjem da ste čuli ono pričo kak Ameri sikam kam dojdejo najdejo nafto pak je tak nabrž bilo i u Venecueli. Mel sam za čuti kak Venecuela ima nejveč nafte od sih državi na sveto pak je unda ne čudno kaj je Donald svoje ratnike ruon tua poslal. Tramp nebre trpeti kaj je nešči bogateši od Amerike jerbo Amerika mora vu semu biti nejbolša i nejbogateša. Kuliko smo čuli ve se imajo jedino jim još Grenland fali. Dok je znova postal precednik Tramp se je boril za mir vu sveto, a leto dni posle počel je ratuvati. Fletno se je pravica skazala, on pravzaprav z ratom oče dojti do mira. Najte me krivo razmeti, ali to mi nekak na Putina vleče.
Internet je zazvedil kak je naš precednik AP pisal sosedovomo zeto Trampo: Dragi Donalde, nadjam se da si dobro. Samo sam ti štel reči kaj boš znal da i mi imamo precednika šteri se z nami špotari i brenza napreduvanje lepe naše…
Došla je zima z snegom
Dugo smo prosili Božeka nek nam pošle snega i to nejpredi kaj bodemo meli beloga Božiča, a posle još vejč kaj bodo se naša deca mogla grudati, sanjkati i delati snegoviče za vreme zimskoga ferja. Snega ga bilo premalo kaj bi Božič bil onak beli kak smo mi to šteli, ali je zato ve posle nacurelo snega vejč nek smo naručili i vejč nek moremo pospraviti i rezgrnuti. Neje to sam prinas v Međimorjo, ne sam po Lepoj našoj nek seposot po celoj Evropi. Več hajdi let ga snega ne bilo pak smo se ga odefčili odmetati i rezgrijati tak da sneg i zima mrzleša od minus deset nam delajo sam probleme. Niti se deca morejo sanjkati i grudati se, a niti pak promet teče kak je to red. Nekaj prosimo, a dok to dobimo unda nam je preveč.
Moljba zagrebečkoga HDZ-a posle nepočiščenoga snega po vulicama: Molimo Zagrebčance nek ostanejo doma kak so to naprajli za vreme zadjih lokalnih izborov!
Jožek Radnik