A  kaj  to  za  nas  znači? 

          Pre našim istočnim sosedima je biračko telo zrušilo Aleksandra Vučiča posle četnajst let kak je vu svojim bledim četničkim rokama držal cugle vlasti. Čim se to zazvedilo mam se je vidlo nekše veselje prinas v Lepoj našoj po levim stranama političke vulice i nikak nebrem razmeti zakaj je to tak? Nikak nebrem razmeti zakaj bi se mi morali veseliti i jeli bode nam nekaj bole i je li bode nova vlast vu Srbiji meje četnička, očem reči, je li bode poštivala Lepo našo i je li bode priznala kak je ona (čitaj: Srbija) pred 35 let napala Lepo našo: Vukovar, Škabrnjo, Pakrac, Dubrovnik… i da ne bode i dale halosila prek meje i vlekla državno mejo na linijo Virovitica – Karlovac – Karlobag? Kuliko čujemo brzčas nikaj od toga. Pripoveda se kak je srpsko biračko telo ne zmenilo Vučiča zbog radi demokracije nego zato kaj neje uspel ostvariti ciljeve štere so zacrtali v memorandumu SANU, a si znuomo kaj tam piše. Mortik ne znamo se kaj tam piše, ali znuomo da nam se ne piše dobro. Spomenula me teca Franca nek vam rečem kak je Vučiča pobedila Študencka lista na šteroj ga ne bilo niti jenoga študenta. Nek se zna!

     Vučič je bil četnik šteroga so si poznali, pak i mi, i dok je on bil tu unda so si v EU i sveto znali da je on kriv kaj je nekaj ne vredo izmeđo Lepe naše i Srbije, a dok ga jega ne bilo unda smo mi Hrvati (čitaj: ustaše) bili krivi za se.

     Srbi so zrušili Vučiča, a sakefele Dalije Oreškovič, mostovci, možemosi, Klasiči, Sandre… spituvlejo jeni druge da bodemo mi Hrvati zrušili Plenkoviča? Neje da jim Plenkovič nekaj smeta, ali polek jega se nikak nebrejo dokopati vlasti, a več na leta senjajo državno kočijo vu šteroj oni v rokaj držijo cugle vlasti. Neje da imajo nekši program, strategijo nek jiv vlast prekprokleto jako vleče i od toga nebrejo pobeči, jerbo što drži v rokaj cugle vlasti te ima i ključe od državne kase. Ne bi se štel toga včakati!

Kaj  bo  z  Dinamovcima? 

     Kaj bode z Dinamom? Istina Božek bil je prvak vu minuloj sezoni 25/26., igral je kvalifikacije za Ligo prvakov i popičil se je na zadjoj štengi. I nikomo nikaj, kak da se nikaj ne pripetilo.Mogli ste prečitati na Fejsbuko ili pak na nešternoj drugoj, kak se to veli, društvenoj mreži kak je velika sreča kaj je Dinamo ispal z Lige prvakov kaj se ne bode sramotil jerbo nema niti igrače, niti trenera, a niti pak igro za Ligo prvaka. To čudo kaj je Dinamo ispal z Lige prvakov je trajalo tri dni i se je včuhnulo. Nišči je ne pital kak to kaj Dinamo ima sveckoga precednika oliti menađera, Zvonkija Bobana, a rezultati so mo drugoligaški. Za one šteri so v klubo je čistam normalno kaj v Maksimiro vedrijo i oblačijo Boban i Tomaševič, a dok so to delali Mamič i Bandič unda so rezultati bili vrhunski, ali to je ne bilo dosti jerbo so sakefele mediji furt meli na piko jenoga i drugoga, očem reči, jen tjeden jim je trn v oki bil Mamič, a drugi tjeden trn v peti Bandič i to tak dugo dok so ne Mamiča natirali prek Save n a hodočašče v Međugorje, a Bandiča pak so poslali, makar si je on sam shodil potnoga naloga, k Božeko na (konačni) (ob)račun.

     Kak smo rekli Dinamo je zglajzal na zadji štengi za Ligo prvakov, a nikomo je ne niti suza došla na oko jerbo je zagrebečkim „modrim dečkima“ mesto v Evropskoj ligi, a ve dok je mesto v Evropskoj ligi postalo golob na kiti ve so Dinamovci zmenili trenera. Pak nešči mora biti kriv: igrači nebrejo biti krivi jerbo jiv je trener zebral i poslal na igrališče, a Boban nebre biti kriv jerbo je on precednik kluba i jega je nešči (čitaj: Tomaševič) postavil.

     Dok čitam životopisa Zvonkeca Bobanovoga unda mi moj črvek frflja v glavi, a i teca Franca mi furt zvoca,  o tomo kak je Boban mortik poslani k Dinamovcima kaj bode Hajduk prvak Lepe naše. To je prinas doma, a vidim da mo nešči sedi na sfori i brenza kaj ne bi Dinamovci pak previsoko odleteli kak so to naprajli zadji dvajsti let. Kaj se Zvone Bobana dotikavle on je bil dober igrač, očem reči, jako dober, ali posle se je ne proslavil kak menadžer niti v Italiji, niti v UEFI, a niti pak v u FIFI i sigdi so ga dimo spakerali predi nek je nekaj napravil i predi nek mo je mandatlin stekel, tak da ne verjem da bode so raskoš svojega labodoritaškogs talenta pokazal v Lepoj našoj i to v Maksimiro. Kak veli teca Franca kak mo se je v najempot v glavi nekaj presvetilo i ve bode on reda napravil kak vu klubu tak vu slačionici, a i na igrališčo, očem reči, stadiono.                                                                  

Stadion  je  čistam  nekaj  drugo

     Več sam o tomo pisal kak je na natječaj za stadion v Maksimiro došlo 88 ponudi. Ne znamo kakše so druge ponude, ali teca Franca veli kak je zebrana nejgrša i kuliko se čuje od oni šteri se navek nejbole znajo od toga stadiona ne bode nikaj. I bole da ne bode kak bogo zgledi. Ve dok se igrajo Lige prvakov, dok se igrajo Evropske lige ve vidimo kak stadioni trebajo zgledati, a ne tak bogo kak zledi ova šibična škatuljka, of škedej, šteroga kak da je voda donesla i to bi tebal biti nacionalni stadion na šteromo bi naši Vatreni igrali, ali sam za 35 jezer vatrenih kibicov. Pak kaj svecki i evropski doprvaki bi morali igrati na tak malomo stadiono, a nekaj si gruntam da bi to moral biti stadion za bar 60 jezer mesti kak je ve of stadion v Maksimiro dok je još istok delal, očem reči, predi potresa.    

     Ne znati kaj so se dospomenuli Zvonkec Bobanov i Tomica Tomaševičov, ali se to kaj se dela ne vleče na dobro. Si se bunijo kak zebrani stadion je ni ono kaj zagrebečki purgeri i BBB senjajo več dvajsti let, a nejhuje kaj bi se moglo pripetiti je ono kaj so naprajli v Reki. Tam so naprajli novo igrališče, očem reči, stadiona na Rujevici za šest jezer kibicov z tem kaj se bode stari stadion Reke na Kantridi renoveral i kaj bode tam mesta za dvajsti  jezer kibicov. Duže od deset let Reka igra na Rujevici i več se ve nišči ne spomina o Kantridi pak bi štel kaj nej tak bilo v Zagrebo kaj bi se naprajla Kajzerica, Dinamo bi se preseli na Kajzerico za kratek čas, a stadion v Maksimiro se vruhne, a dok se vruhne unda novi stadion padne v tibro i dale nikod nikam. Znate kaj me tu gvinta kaj so vu Zagrebo na vlasti Možemosi, to so oni kaj se morejo dok ne treba, a dok tre nekaj naprjati unda napreduvlejo kak muhe v močjako. Pak v Reki je bil SDP-e na vlasti i Vojko Obersnel pak je Kantrida ruon tak zišla. Kak zgledi da ovi levačari (SDP i Možemosi) imajo nekaj protiv labodoritanja i da delajo kontra ne sam labodoritašov nek i kontra jive publike. Kaj velite?    

     I veli Ivan Supek: Moramo se pomiriti z tem da političari bodo pretežno srednje inteligencije i pošteja, a oberprosječnih pohlepa za vlaščo, slavom i penezima!

     A Grigor Vitez: Zaspal je na lovorikama pak so ga skorom požvekale krave!   

Jožek Radnik

By admin

Odgovori

Vaša adresa e-pošte neće biti objavljena. Obavezna polja su označena sa * (obavezno)