Što je itak kriv?
Grad Čakovec ima novoga, očem reči, na novo zlišpanoga Trga Republike. Trg je novo napravleni, duže se je delal nek se je nejpredi planeralo ali tak je to navek dok se dela po vručini i dok ga ne dosti težakov. No, pustimo ve to, važno da je Trg tu da je novi i čuda lepši nek je bil ili kak se to seposot pripoveda takši kakšega so si Čakovčanci i Čakovčanke zaslužili. Ve zuomo da je lišpanje čakoskoga glavnoga trga koštalo cirka 3,5 milijonov ojerov i da to se bode plačeno z čakoske gracke kase, očem reči, platili ga bodo Čakovčanke i ,Čakovčanci kak porezni obvezniki šteri punijo čakosko gracko kaso. Dok je počel spominek kaj se bode lišpal glavni čakoski gracki trg unda se je furt pripovedalo da se to bode napravilo z EU penezi i to tak kak so i si drugi delali takše posle. No, to se je ne pripetilo jerbo so gracki oci prekesno došli i stali se vred pred EU kasom. Ve smo znova zazvedili kak so za to kaj so čakoski gracki oci zakesnili dok je EU delila peneze krivi suvlasniki robne hiže Međimorka Franjo Vlah i Đuro Bel. Tak je bar grackim večnikima i Čakovčankama i Čakovčancima rekla čakoska gracka načelnica Ljerke Cividini. Najbrž ona nejbole zna što je kriv ili bi bar trebala znati? Ak sam se več našel na grackoj optuženičkoj klupi z 2.5 procentov suvlasništva unda bi prosil kaj bi mi dali dopuščenje kaj vam rečem kak je došlo do problemov na čakoskomo Trgo i na zemli na šteroj več 45 let hercuje Međimorka.
Međimorka je tu odnegda
Međimorka je svoja vrata otprla kupcima, zdavnja, 1982. leta i od unda je tu. Dok je bila 1992.leta privatizerana unda so novi gazdi dobili robno hižo i zemljo na šteroj je hiža zafremana. Vidite, falaček zemle okoli robne hiže je bil problem dok so se čakoski gracki oci (čitaj: gradonačelnica) počeli spominati kak bi zlišpali glavnoga trga pak so si falaček Međimorkine zemle (cirka 900 m2) prepisali na sebe, a neso gazdo nikaj pitali. Po onoj staroj pučkoj: mortik se ne bode zazvedilo pak bode to naše. Ali se je zazvedilo. A čim se je zazvedilo nišči je od gracki oci ne došel na spominek v Međimorko kaj bi se dospomenuli kaj bode i tua Međimorkina zemlja gracka pak kaj se i ona zlišpa nek je problem odišel na sod. Kak ste mogli čuti od gradonačelnice gazda robne hiže (čitaj: nejvekši dioničar (65 %) jerbo je RK dionički društvo) Franjo Vlah je dvajsti pot bil v gracki upravi i nigdar so se ni mogli dospomenuti, očem reči, nagoditi. Ak je nešči došel dvajsti pot v gracko upravo unda je najbrž mel voljo kaj bi se nekaj dospomenul jerbo da je ne mel voljo unda ne bi dohajal? A to kaj je gradonačelnica niti jempot ne bila v Međimorki to je čistam drugi par rukava, a to kuliko je Vlah iskal za zemljo na čakoskomo glavnomo trgo to je za spominek i dogovor. Od nečega se mora početi. Grad Čakovec je zemljo v Golobetki plačal prek dvjesto ojerov po kvadrato pak unda zemlja na glavnomo trgo nebre biti faleša nek sam dražeša. Zakaj so se ne nagodili to sami zaključite. Po tom pitanjo je i sod svoje rekel. Kak veli gradonačelnica Cividini grad Čakovec je dobil soda i to tak kaj mora platiti cirka 300 jezer ojerov i to po lanjskoj presodi na štero je uložena žalba, a nova presuda se čaka. Ak sod ostane na staroj presudi unda bodo hajdi zrasli kamati na teh 260 jezer ojerov jerbo znuamo da so zatezni kamati ne mali.
Ne znati zakaj so čakoski gracki oci ne nejpredi rešili problema sa zemljom na Trgo pak unda išli v Brisel po peneze, a ne kak je ve Trg je več gotov, a ne zna se kuliko bode koštala zemlja. Nekaj si gruntam, dok se je več zazvedilo da je ljucki falaček zemlje prepisani vekšemo falato gracke zemle unda se je trelo ovak ili pak onak dospomenuti, a ne kak pravi i trdi Međimorci iti na sod. Odnavek se zna da so soci mudni i da se jim nikam ne žuri, a to kaj sam ja dobil spora, a moram platiti cirka 300 jezer ojerov to mi ruon ne vleče na dobro. Nejglavneše je da se zna što je za se kriv z jene strane i što bode to se platil z druge strane.
Zlatkija Daliča smo natirali
To kaj so nas VAR soci na Sveckomo labodoritaškomo prvenstvo v Ameriki pokrali i kaj so naše Vatrene poslali dimo dobro nam je došlo kaj se rešimo Zlatkija Daliča posle jegovih devet let kaj je hercuval v našoj labodoritaškoj reprezentaciji i kaj smo postali jena od prvih, očem reči, vodečih reprezentaciji. Bili smo srebrni i brončani na sveto, srebrni v Evropi i kaj ne bodem dale nabrajal… Dok se se dene na kup bili smo visoko pri vrho labodoritaške piramide de smo nigdar predi ne bili. Daliča smo natirali, a došel je Bilič kak jegov zamjenik. Oni šteri so ne trpeli Daliča i šteri so ne poslušali Thompsona so bili srečni jerbo je Bilič čuda bolši od Daliča, ali prve Biličove utakmice, prve zgube od Španjolcov dvapot i on debaklin protiv Englezov (0:7 na Rujevici) so pokazali da nebre bilo što biti izbornik i da je Dalič bil veliki mešter svojega zanata dok je to devet let držal pod kontrolom. Istina Božek i ve so igrali isti igrači, ali je ne bil isti rezultat. Tu se postavlja ono večno pitanje: kaj je bilo predi kokoš ili jejci ili pak ono kesneše: otkod se čisti riba? Kuliko vidimo nekomo je smetal Dalič i jegovi uspehi, smetal jim je Luka Modič na igrališčo, Zlatko Dalič na klupi i Thompson vu slačionici i na Jelačič placo, a i rezultati nejbolši od kak Lepa naša postoji, a ve dok naši protivniki Englezi i Španjolci z nas hurmake delajo unda davlemo Bilič sto dni (nejmeje) kaj se bode on privčil na igrače ili pak oni na jega, a kak sam več rekel naši protivniki nas ne čakajo nek nam punijo mreže i to do vrha. Nekak mi moj črvek neda mira i furt me zmišluvle kak smo posle košarkaškoga srebra na Olimpijadi v Barceloni 1992, bronce na Evropskomo prvenstvo v Dojčlando1993, svecke bronce na prvenstvo 1994. leta v Kanadi i bronce na Evropskomo prvenstvo 1995. leta v Ateni potonoli i do denešjega dneva (30 let) smo ne došli k sebi. Košarkaše imamo po Evropi, sveto, NBA ligi, a repka nam je nigdi i ne znati da bodemo pak došli do toga kaj bodemo vu kšarkaškomo sveto ili bar vu Evropi nekaj značili?
Akcija Stadion
Dinamovci i Zagrepčanci so respisali natječaja za novi stadion vu Zagrebo i glavni stadion v Lepoj našoj. Neje bog zna kakši, sam za 35 jezer kibicov, ali mora biti novi. Na natječaj se je prijavilo 88 kandidatlinov i nišči ne zna je li je to slučajno kak 88 stabala, ali je zebran sam jeden. I kak je to navek oni šteri so zbirali so dali časno reč kak so zebrali nejbolšega, a nišči jim to ne verje tak da ne znati je li se bode te stadion delal i kakši? Oni kaj so protiv so za ve glasneši tak ak se po jutro den pozna unda od toga stadiona tak fčasi ne bode ništ ili kak je teca Franca rekla od te mele se kruh ne bode jel. Šepetuji se i to dosti glasno da oni šteri morajo dati peneze so ne jako tožni kaj se stadion ne bode delal jerbo, kak velijo, bar jim penezi ostanejo. Dvajsti let se spominamo kak bodemo naprajli novoga stadiona, a ve bodemo, najbrž, još nejmeje dvajsti zbirali kakšega bomo delali?
Jožek Radnik