Soci i FIFA na strani (ne)pravde!
Kak se to veli svetla so pogašena, labode so zaklejene, a labodoritaši so odišli dimo saki k svojo hiži, nešterni so bili zadovojni (takši je bilo jako malo), a oni drugi so bili srditi i gombali so kak da jiv je nešči pokral. Najte me krivo razmeti, ali moram još nekaj reči makar sam ne kanil, ali mi moj črvek neda mira i furt rovari i morem vam reči da mi ne bode dal mira dok još nekaj ne napišem i denem točko na „i“. Kuliko ste meli za čuti, videti i prečitati nesam se samo ja bunil protiv soca, socov i VAR-a, protiv FIFE kaj se dotikavle utakmice protiv Portugalcov štero so naši „Vatreni“, tak bar velijo, zgubili. A znate da je labodoritašima i sim športašima nejhuje? Dok si dober i ne sam dober nek i bolši od protivnika, bole igraš, zabiješ vejč golov i na se zadje moraš priznati da si zgubil. Kak bi naši sosedi rekli i nad popom postoji pop šteri v labodoritanjo vedri i oblači i određuvle ne sam što bode pobedil nek i što bode zgubil. Kak je rekla teca Franca da so nas ne podsilom dimo natirali vu finalo bi bili igrali naši Vatreni z Argentinom i najbrž bi Argentina pobedila jerbo kak je glavni sodec, naš sosed Janez, Slavek Vinčičov, dukal za Argentino to je bila špot sramota.
Sosed Slavek je drukal
Makar je sosed Slavek drukal za Mesija i pajdašijo Španjolci so odnesli pobjedo, odnesli so pehara i zlatne želencije jerbo so bili jakši i od Argentincov i od soca Slaveka. Prvo poluvreme je još nekak bilo, ali če duže dale Slavek je bil se bliže Mesijo i na se mile načine je štel kaj bi Mesi znova zdigel pobjedničkoga pehara, ali neje išlo i neje. Skorom celo utakmico so Argentinci igrali z igračem vejč (sodec Slavek) i unda da bi Slavek to nekak zravnal unda je zbog radi jenoga smešnoga faula na sredini igrališča hitil jenoga Argentica vum. Kak god je to zgledalo bedasto, ali na se zadje dok se je broj igračov zravnal i na jenoj i na drugoj strani unda so Španjolci pobedili. Morem vam reči da je Mesi ne mogel dojti k sebi kak jim se je to pripetilo i suze so mo pobegle, ali je na s zadje ipak priznal Španjolcima da so bolši. No, precednik Tramp si je ne mogel mesta najti i nikak mo je ne bilo jasno kak so mogli Španjolci pobediti ak so se on (čitaj: precednik Amerike), Infantino (precednik: FIFE) i glavni sodec Slavek Vinčičov (zemljak Trampove žene Melanije) dospomenuli da bode Argentina prvak sveta.Tramp još dendenes nebre dojti k sebi kak se nekaj na ovomo sveto more pripetiti drugač nek se nadgradnja (politika i vodstvo FIFE) dospomene.
Teca Franca me pitala je li je točno da je Trampova žena Melanija zebrala glavnoga soca finalne utakmice sama ili joj je Leksi Čeferinov, precednik UEFE pomogel, ali tu sam joj nikaj ne mogel reči jerbo sam vu tak visoko politiko ne vpučeni.
Javil se je Pjerluiđi Colina
Makar so se naši Vatreni v miro i tišini spakerali kufre i otprajli se dimo posle pljačke v utakmici protiv Portugala verjem da nešterni, a posebno izbornik Dalič i kapetan Modrič nebrejo mirno spati i sako noč se bar tri – štiripot zbudijo i znova v glavi vrtijo snimko opsajda šteri je to ne bil i Gvardiolovoga gola šteri je bil, a ne so ga nikam zapisali, pak so naši Vatreni odišli po riti k meši, a Portugalci sam malo dale. Več mi je bedasto prepovedati o onomo milimetro Matanovičove kokot frizure, štero mo je laboda štrajfala, neje premenila smjera, ali je čip v lopti to registreral. Nebrem razmeti kak so ruon na toj tekmi v labodo deli čipa i to sam vu to labodo štera je štrajfala Matanoviča, a se druge so ne mele čipa (???). Furt se spominamo o tomo čipo, a nišči je toga čipa ne videl i nišči ga je nikomo ne pokazal. Nejčudneši mi je Pjerliđi Colina negda nejbolši labodoritaški sodec na sveto, a ve se spominajo da je on nejbolši labodoritaški sodec sih vremena. Se mogoče, ali dok je odišel vu sodačko penzijo unda je bil jako dober, ali je ne bil nejbolši, a nejbolši je postal dok je prešel na Fifino strano i postal glavni šrajf za se nejbolše svecke soce. Znate kak je to bilo, dok je Colina fučkal unda se je ne o tomo respravljalo je li je to bilo kaj je on dofaučkal nek je to tak bilo, a dok je z nekaj meje od pedeset let odišel v sodačko penzijo unda so ga labodoritaši znali pitati za neke sumnjive situacije na igrališčo i ak je on rekel kontra nek so soci dofučali onda je dohajalo do svaje kak vu UEFI, ta i vu FIFI, a da bi to zbegli ga je prefrigani švicarski taljan Giani Imfantino zel k sebi i del je ga je na svojo isplatno listo. I dok je Colina videl kak je to dober biznis biti na Fifinoj listi unda se je se zmiril i ve več hajdi dugo Colina i Fifa pušejo v isti rog. Zato se je i Tramp čudil kak je Mesi ne pobedil, a i Colina je bil na jivoj strani?
Još se je ne zazvedilo kak je to bilo pred šezdeset let?
Englezi so bili nejbole napeti kaj bi bili svecki prvaki na ovomo sveckom prvenstvo jerbo so bili svecki prvaki pred šezdeset let da je svecko prvenstvo igrani v Engleskoj. Mi malo stareši se još zmislimo kak so Eglezi Nemcima zabili tretjega gola v produžetko v 101. minoti posle 2:2 v regularnomo vremeno, a da je lopta ne prešla gol crto i neje se zakoprcala vu mreži. Glavni sodec se je pospominal z autrihterom z Rusije i dospomenuli so se da je bil gol. Sreča je kaj je Hurst zabil još jenoga gola i to v 120.minoti pak so unda Nemci ne bil preveč svadlivi. Ali štel sam reči da je od unda do denes minulo šezdeset let i da je elektrosnka tehnologija odišla jako čuda napre i da denes morejo to snimko deti vu VAR aparat i on jim bode rekel je li je laboda prešla gol-crto ili pak je gol ne bil. Jeni velijo da je ne prešla, a drugi pak velijo da je prešla za jen milimeter kak ova štera je štrajfala Matanovičovo frizuro. Lepo vas pitam, je li vas interesera kaj si o tomo gruntamo teca Franca i ja? Vidim da se na smeh držite kaj znači da ste jako najgerek: da je lopta prešla gol crto Englezi bi več zdavja mahali z VAR nalazom, a kak so oni stiha to znači da je ne bilo se onak ka dragi Božek zapoveda. Več unda se je znalo da ako so Englezi organizerali svecko prvenstvo uda i oni morajo biti svecki prvaki jerbo so do unda ne bili, a niti pak posle.
Rekel bi precednik Tramp v ciglastoj kravati: utakmica mora završiti onak kak smo se dospomenuli i nikak drugač!
Jožek Radnik