Tak vam je to bilo na Jelačič placo
Zabadav je o tomo respravljati zakaj si je nešči nekoga zebral jerbo on što je to napravil zna zakaj je to napravil. Dok naš rokometni izbornik Dagur Sigursson nekoga zbere i pozove ga v repko unda te bode igral, a ne nešči drugi kak god je te drugi dober, bolši ili pak nejbolši. Tak so si i naši rokometaši zebrali kaj jim bode Thompson popeval v Zagrebo i neso šteli nikoga drugoga kak god je te drugi, šteroga jim je Tomek Tomaševičov nudil, ruon tak dober ili pak i bolši od Thompsona. Tomek je nejpredi dal viziperta za Thompsona, ali je posle prozivke vu svojoj grackoj upravi zazvedil kak nema nikoga, kak je to mel Bandič 2018. leta dok so se srebrni Vatreni vrnuli z Rusije, kaj bi Thompsono isključil strujo pak je unda rajši otkazal to Thompsonovo popevanje v glavnomo grado sih Hrvata, drugoč, posle Hipodroma, v pol leta. To je Tomek ne smel dopustiti jerbo je jegovo biračko telo gombalo. I neje dopustil. Ali kak velijo stareši ljudi, a i teca Franca, i nad popom se najde pop, pak je cugle organizacije dočeka bronastih rokometašov zel vu svoje precedničke roke premjer Drašek Plenkovičov. Rekel je, i to jasno i glasno, kak so si rokometaši to na igrališčo zaslužili pak so zagrebečke antife i možemosi okoli Jelačič placa morali zaprti obloke dok so rokometaši, Thompson i mladi Hrvati slavili bronasto želencijo. Kak je i red. Što oče nek slavi, a što pak to nebre precerati nek zapre obloke.
Nekaj si gruntam, ali se se meje nadjam da bodem doživel kaj bodemo si skupa: desni, levi, mladi, stari, domoljubi, športaši, Thompson i Hrvacke ruže feštali na Jelačič placo dok bodejo pak naši športaši donesli bilo kakšo evropsko, olimpisko ili pak svecko želencijo. Čuda je zvanih, a jako malo zebranih, kak naši športaši, šteri nam sako malo donesejo nekše odličje, očem reči, pokažejo sveto kuliko vredijo i kak je veliko srce športaša Lepe naše. Lepa naša – mala država velikih ljudi (čitaj: športaša).
Pita Joško Marušič:Dok se je posle Drugoga sveckoga rata rušil spomenik bano Jelačičo što je bil nadležan: grad ili pak država?
Maškori so hercuvali po celomo Međimorjo
Mogel bi slobodno, onak čiste srca, reči kak ga ne v Međimorjo niti jenoga mesta štero drži do sebe, a neje melo svoje maškore. Nega bilo opčine vu šteroj so maškori ne prevzeli vlast i to dragovoljno. Takše preuzimanje vlasti morete videti sam za fašnik i navek je se bilo vredo i dok je ključ vlasti išel od opčinskoga načelnika maškorima v roke i dok so ga maškori donesli nazaj jerbo, kak so maškori na krajo rekli, pak ta lokalna vlast je niti ne nekša velika sreča. Vidli smo sakefele maski od starih do novih, a nejveč je bilo veselja, popevanja, plesanja, a kaj se stareših dotikavle bez pijače je ne išlo. Morem vam reči da smo v nejveč mesti mogli videti međimorske svate i međimorsko gostuvanje. To je našim ljudima, našim maškorima, nekak nejlepše jerbo ga onih prav starinskih gostuvanja več ne pak naši stareši očejo mladima pokazati kak je to negda bilo. No, nekaj ipak ne razmem, saka mladenka maškor je trudna a negda ga toga ne bilo bar ne tak čuda kak nam maškori očejo to pokazati. Mortik je to zato kaj deca falijo pak saki mladenec oče nejpredi sprobati mladenko, očem reči, oče stoprocentno biti siguren da bode mel prestolonaslednika. Bode mel ak se pokoleje izjasni da je muško. A do toga tre čakati.
Nejveč maškorov ga bilo v Čakovco. Pak je Čakovec glavni, kaj nem rekel nejglavneši grad našega Međimorja. Tu so bili nejpredi nejmenši maškori z čakoskih jaslica, a unda i dečica iz zabavišta. I to celi šereg. A v nedelo dok so svoje mesto pod suncom dobili nejstareši unda jiv je bilo iz sih krajov Međimorja, a i stranjski so došli da vidijo je li ovo naše međimorsko sunce znova tak lepo greje kak je to bilo predi korone. Fašnik je ne došel jerbo mo je več bilo dosti kaj so ga sako leto okrivili za se, kak tam de je mel svoje prste tak i tam de je ne luka jel, a niti pak ga šnjofal. No, to mo je ne pomoglo jerbo je on-line odišel po riti k meši. Ak so čakoski turistički težaki rekli da je fašnik kriv za se i da ga tre skuriti unda se fašnik nema kaj tu okrajati ili pak zgovarjati. Dok se drugač ne naredi.
Maske i maškori so bili i med publikom jerbo ak je fašnik unda je fašnik za se. Tre skoristit te dneve dok saki more biti kaj oče i more reči kaj oče. More govoriti i dok ga nišči nikaj ne pita. Kak doma. Šteli naši političari priznati ili ne ipak je fašnik nejvekši demokrata.
Strahoninski maškori
Ako čovek dene roko na srce unda mora priznati da je jena od nejveseleših, ak ne i nejveseleša opčina, opčina Strahoninec. Črez leto, kuliko sam uspel prebrojiti tam ga nejveč veselici pak bez veselice vu Strahoninco nebre niti fašnik minuti. I to sako leto. Tam ga isto je sakefele maškorov kak i sesposod, ali tam je i načelnik opčine, Francek Lehkecov, med maškorima. Nekaj sam si gruntal zakaj itak je on sako leto maškor? Pitam sam sebe, a i vas pak ste pošepetnoli kak je Francek maškor sam kaj ne bode moral da ti zrok kjluča opčine jerbo dok je maškor ključ opčine ide ovak: načelnik Franjo drži ključa opčine v desnoj roki i davle ga Franceko maškoro v levo roko i tak so ključi tri dni vu Francekovoj levoj roki, a unda dok se zdojdejo fašinski dnevi i dok se skuri fašnik, krivec za se opčinske nevole, unda Francek vrne ključe opčine načelniko Franji i to tak kaj ključi dojdejo nazaj z leve v desno roko. Ve vidite, hajdi let je trelo kaj to nam običnomo, kaj nam rekel, prostomo puko padne na pamet. Gospon Lehkec, saka čast. More Tramp dojti vu Strahonince kaj se nekaj navči!
De je tua šega?
Pitala me teca Franca kaj je z onom starom šegom dok so žene hodale po kvasa na fašinski pondelek? Po kvasa za fašinske krofline šteri so se pekli drugi den. Po kvasa se je hodalo v krčme štele so mele licenco za to. Morete si gruntati kaj je tu sega bilo da je teca i posle pedeset let da je zadji pot išla po kvasa o tomo z veseljom pripovedala. No, ak so mož i žena na fašnik navečer skup bili maškori unda se je znalo da je žena na vreme donesla dimo kvasa i da se je pre hiži zdiglo i nekaj drugo ne sam testo za kroflini. Škoda, to bi trelo obnoviti kaj bi naši mladi zazvedili kaj so i kak feštali za fašnik naši japeki i mamike, očem reči, naši japice i mamice kaj kume i sosede ne bodem spominjal!
Jožek Radnik