Što bo nas ve razveseljuval???
Nega vejč med nami Malomihaljevčara Damira Novaka, našega maloga (rastom) – velikoga (duhom) čoveka sveckoga glasa, šteri je, morem deti roko na srce i slobodno reči, osvojil celoga sveta z svojom rokom (čitaj: karikaturama), štera je crtala i z glavom štera je govorila kaj bode nacrtala. Več smo i to ne jempot rekli kak je on bil dobri duh Maloga Mihaljevca, jegovoga sakodnevnoga živlenja, politike, kulture, udruga, zbližavanja ljudi, kak stareših tak i mladih. Si so oni, polek Damira, dihali i živeli za svoje Malo Mihaljevce. A Damir je bil čovek iz naroda, vatrogasec, političar jerbo so tak Malomihaljevčari, pajdaši, sosedi, športaši, kulturnjaki, vatrogasci… šteli. I si so prek jega čuli za Mali Mihaljevec i to ne sam v Međimorjo, Lepoj našoj, ne sam vu Evropi nek po celomo milomo sveto jerbo seposot kud je išel Damir žnjim je išlo i jegov Mali Mihaljevec. Ne bi mogel nabrojiti niti na prste jene roke kuliko je mesti, opčini ili pak gradi v Lepoj našoj melo svoje festivale humora, izložbo karikaturi i to svecke, sako leto, humorističkoga lista (Zlatna smoliga), udruge mladih i moških, udruge ženi i nejbolše vatrogasce… A se je to bilo v Malomo Mihaljevco, se je to bilo zbog radi dobre vole, znanja, želje i zalaganja Damira Novaka. Nigdar mo je nikaj ne bilo teško. I što zna kak bi dugo se to trajalo i živelo vu Damirovom Mihaljevco da puška v rokama soseda Dragija neje prekinula Damirovo živleje zanavek? Kaj je itak to bilo tuliko vredno kaj je Damir moral oditi na drugi svet prek reda i čuda predi nek mo je bilo vreme? Nikaj nebre tuliko vrediti. A soseda je nekaj hudoga obletelo i dobroga duha Maloga Mihaljevca ga več nega med nami. Kaj nam preostaja drugo nek zafaliti Damiro za se ono kaj je napravil za Mali Mihaljevec,za Međimorje naše malo z jenim velikim fala i z jenim velikim naklonom do zemle. Jegova familija, Mali MIhaljevec, Međimorje, Lepa naša so zgubili velikoga čoveka i na jegovi mesti bo ostala velika lukja, a posebno v kulturi, crtanjo karikatura de je bil nejbolši na sveto, vatrogastvo i dobrovoljnim poslima za napredak Maloga Mihaljevca, štero je z Damirom došlo na kulturno karto Lepe naše.
Navek je nejteži bilo razveseliti ljude, nasmijati jiv i dopelati v dobro voljo, a Damir je to, z svojim karikaturama i humorom, navek išlo od roke i zato je žalost tak velika, a bol tak globoka.
Damire, još jempot velika hvala za tvoja znana i neznana djela i nek ti je lefka ova međimorska zemla štero si mel tak rad i za štero si živel. Počivao u miru!
Kuliko davlemo, a kuliko trošimo?
Nejhuje je dok nas nekaj vudri po žepo, očem reči, dok nekaj podraži. Znate kak je to dok nekaj podraži, a de si nebremo pomoči unda je to tak kak da bi nam nešči jemal peneze vum z žepa, a nebremo si pomoči. Moremo slobodno reči i nikaj ne bodemo zgrešili kak saki den nekaj podraži i to tam de se nejmej nadjaš. Cene vode, plina i struje se furt pomalem smickajo prema gori, ali na to smo se več prefčili kak foringaški koji. Posle nam je podražilo i smetje, a od prvoga februara je odišlo gori i dopunsko siguranje našega zdraviča. I unda smo mi zračunali kuliko penez črez leto davlemo za zdravstvo mesto kaj bi rekli kuliko davlemo za zdraviče. Dok se to se dene na kup unda to dojde čistam lepi kupček ojerov, a tre još kcoj platiti i dopunsko osiguranje. Je istina je da je i dopunsko podražilo, ali kuliko pivi moremo kupiti za teh 15 ojerov? Za te peneze pre Štefo v krčmi dobite pet pivi i ak vas posle policaji zastavijo zgledite tak spametno i trezno kaj alkoholno frulico nti vum ne jemlejo.
To je jena strana, a na drugoj strani smo mi stareši ljudi i penzioneri šteri se saki den parijo z sake fele betegima i retko da mine tjeden kaj ne delajo stisko pre doktorima. Zbog radi toga sam si gruntal kuliko itak mi koštamo naše zdrastvo, kuliko koštajo naši lekeci štere skorom saki den nosimo dimo z apoteke? Moramo priznati da nam je več ne dosti klet i gorična pelnica kak apoteka nek nucamo kajkaj drugoga od čega se naši apotekari bogatijo. Ne sam lekeci, koštajo i doktori, sakefele pregledi, nalazi, terapije tak da kaj se nas stareših dotikavle moramo biti stiha i srečni kaj smo pre doktorima ne na svojoj košti i ne plačamo se kaj nucamo. Ruon tak znuom da penzioneri ne plačajo nikaj jerbo oni so svoje platili. Platili so dok so ne trošili, a ve dok ne plačajo ve trošijo. Najte me krivo razmeti, ali z 15 ojerov mogli preživeti skorom celi tjeden. Negda!
Što birekel dasmo mi Međimorci tak haklik?
Ve vidite na kaj smo došli mi Međimorci kaj od sih lekov štere imajo v apoteki nejveč trošimo sakefele lekov za smirenje. Tak je rekel psihijatar doktor Živko Miševič, šteri je dotepenec prinas v Međimorjo, ali je več tak dugo znami kaj več ima i međimorsko državljanstvo. Ali nekaj drugo sam štel reči, ak je on rekel da trošimo preveč lekov za smirenje unda je to točno oliti kak bi matematičari rekli to je istina štera se ne mora dokazivati. Veli teca Franca: to je tak i fertik. Štel sam vas pravzaprav pitati, kak vas tak i sebe, kuliko itak tableti za smirenje moremo dobiti za 15 ojerov kuliko ve plačamo za dopunsko, a kuliko smo do ve mogli dobiti za dopunsko, štero je bilo meje od deset ojerov. Štel bi znati, a i najgerek sam je li bi trošili čuda meje tableti za smirenje ak bi si jiv sami kupuvali? Kak veli teca Franca dok je zabadav ne pitamo kuliko košta. Neje zabadav sam nešči drugi plača. Nesam pital doktora što je bole nervozen je li stareši ili mlajši? Mlajši bi šteli se meti i do sega dojti prek noči i ak je to ne onak kak so si oni pregruntali unda je nervoza saki den se vekša i vekša. A si znamo da od tableti za smirenje do droge je ne dauko jerbo oni šteri prodavlejo drogo nas jako lepo vabijo kak z drogom čovek dobi ono se kaj nuca i oče, a nikaj ne govorijo kak dugo to traje i kuliko to, na se zadje, košta?
Lepo je doktor rekel kak se moramo več družiti, spominati i unda bode meje tableti treba, a i ono nesmemo zabiti kaj so naši stareši govorili kak nam ne treba drugoga leka dok nam je klet apoteka. No kak v apoteki tak i v kleti treba meti mero jerbo se kaj je prek mere neje niti z kruhom dobro.
Jožek Radnik