Domače svije so pak na ceni?
Navek dok se žene hapijo spominati kak na čehari tak i na mlekari, makar je i jenoga i drugoga saki den se meje, o tomo kakše se meso kupuvle v trgovačkim cetrima unda znova dojdo na dnevni red i negdašje koline. Verjem kak se još navek si rado zmislimo, bar mi malo stareši, kak je to bilo kak so pajceki cvilili po gruntima dok so japa, stari japa, kum, sosed i tetec mesar klali svijo. A svija se klala ruon unda dok se je več voda vrela v kotlenki, a harinsko korito prepravljeno. I denes je to tak, ali sam tam de so v koco je domaći pajceki, a to se sam na seli more najti. Unda se klalo ono kaj se doma shranilo i dok je pajcek v koco mel okoli cirka 180 kil unda so se koline dogovarjale z tetecom Ferijo jerbo je on bil pravi maher za te posel. Istina Božek, neje mel majstorskoga ispita, ali je znal se okoli sviji i to tak dobro kak i vajdini mesari ak ne još i bole. Zmislim se kak denes, koline so nejvečpot bile po nejvekšoj zimi jerbo ga ne bilo škriji kam bi se meso pospravilo nek se je svija trela sharati, posle širom zeti i posložiti meso na svoje mesto. Harali smo jo vu velikoj harinskoj koriti, čistili dlako i to z boksovaj kaštuljkaj onak zvekšega, a z britvicaj za potbrivati na fineše. Kože so morale biti čisto podbrite jerbo so se žjiv delali prezmošti šteri so ne bili tak mesnati kak denes, a ono kaj je ostalo je bilo za hladnetino, štera se je kuhala mam po kolinaj kaj nej kože podkvar došle. Klobasi so se navek delali jerbo je tak bilo leži duže čuvati meso dok je bilo malo podimleno. Meso štero se je ne predelalo je završilo v rasolo, a posle se je sušilo i na najže ili pak v tiblico metalo. Nikaj je ne smelo podkvar dojti. Unda ga ne bilo praznoga mesa punoga zraka il pak punoga vode kak se to denes more kaj de najti. I denes bi se se to moglo naprajti od čurki do prezmošta, klobasovi tiblice, ali nega domaći pajceki. Kak ga ne pajceki tak ga i se meje teci Feriji šteri se razmijo v mesarijo. Hajdi ga grunti po Međimorjo našemo malomo na šterima so prazni koci de so negda hercuvali pajceki, marosci ili pak soprsnice, a denes so nutri sam paučine. Tak to dojde jerbo smo se mi Međimorci pogospodili. Velimo kak smo ne dosta bogati kaj bi kupuvali fal i hudo meso, ali si nebremo pomoči jerbo ga drugoga nega.
Zakaj nišči neče deco delati???
Negda ga dece bilo na sakomo korako, na sakomo grunto, a nega bilo dosti zabavišti, nega dosti bilo dečji igrališči, a denes zabavišta za sakim voglom, a dečja igrališča na sakomo korako. A nema se što igrati. Najte me krivo razmeti, ali nišči neče deco delati. Tak lepi posel, a nišči se niti ne hapljuvle. Mladi i oni šterima bi to moralo iti od roke, i ne sam od roke, oni se furt igrajo z mobitelima, a ove igračkice i igrice z šterima se deca delajo so furt na čakanjo. Ne bodete veruvali ali ve se stareši hrustijo kak bodo deco delali sam nek jim nešči da mlajše fabrike. No, neje dosti sam želja jerbo za saki posel tak i za of tre meti alata šteri je kreden i z šterim moreš nekaj naprajti kak to Božek zapoveda. Stareši se ravnajo k poslo, ali kak god je mlada partnerica nebre zbuditi „paloga borca“ i od posla nikaj. Neje dosta meti majstorskoga ispita ak „zmočeni heroji“ nečejo nikoga pod milim bogom posluhnuti. Japica je priznal da je to lani još nekak išlo dok so afričke slive kredno rodile, ali ovo leto dok jiv je suša pobrala nikak da z tem poslom dojde na zeleno kito. Kaj se bode išel rivat na frčno i mlajšo sosedo ak je ne siguren kaj bode delo napravil onak kak bi to ona štela jerbo ga alatka ne posluhe več kak je to negda bilo. A brez alata ga ne zanata. Zato bi trelo nekaj zmisliti kaj se nej delala sam zabavišta i dečja igrališta nek bi se morala i deca delati.
Rekel sam vam več lani kak se dosti pot španceram po parko i imam kaj videti, mlade puce se špancerajo, ali pred sobom ne rivlejo kolca z detetom nek na vojčici vlečejo kujseke, pese ili pak peseke. A z te mele se vu zabavištima kruh ne bode jel!
Film o Nikoli Čakoskomo z falingami
Več je minulo 360 let otkak je divji prasec sfondal Nikolo Zrinskoga Čakoskoga i to v šumici vu Kuršanco. To se odnegda pripovedalo ili bole rečeno šepetujilo jerbo je to odnavek bila istina o šteroj se je ne smelo preveč pripovedati. Posle preokreta 1990. leta so došla bolša vremena za naše velikane, ali se je, kaj se Nikole Čakovečkog dotikavle ne preveč toga spremenilo. Makar je on bil nejglavneši v ovom delo sveta dok je živel, očem reči, predi nek se je divji marosec dotepel na ov naš hatar jerbo dok je nešči spomenul Nikolo Zrinskoga nejvčpot se je to delalo o Nikoli Šubičo Zrinskomo šteri je z svojimi borcima branil Sigeta. Istina Božek imamo mi vejč Zrinskih, ali nekak smo se ne preveč kcoj držali pak oni šteri so hercuvali v Međimorjo 125 let nemajo niti svojo vulico, niti svoje trge, niti svoje škole makar so se to zaslužili. Nikola Šubič Zrinski Sigecki je dobil i svojo knigo, svojega spomenika, svojega Trga, ali v Zagrebo, ali Nikola Čakovečki nikaj od toga ak ne računamo da jim je Zrinska garda jenomo i drugomo organizerala znanstvene skupove. A Nikola Čakoveči je zafremal knižnico Zriniana, dopelal je fratre v Čakovec, zazidal je palačo v čakoskomo Staromo grado, izgradil je Novoga Zrina na Muri, poduzel je Zimsko vojno i vužgal Sulejmanovoga mosta v Osjeko, a nastradal je v lovo v Kuršanco. Ovo leto bode Zrinska garda izdala knigo o jemo. Novi Zrin je, prek Garde, dobil knigo pred pet let, a Nikola spomenika v čakoskoj knižnici. Sosedi z Varaždina, Alen Matušin i Martin Lukavečki, pak so snimili filma o Nikoli jerbo smo jega čistam pozabili makar je bil veliki čovek, vojskovođa, ban i pjesnik, a govoril je šet jezikov. Kuliko vidimo Nikola se mortik ne bi niti fčakal filma da je čakal na nas Međimorce. I ve se mi Međimorci čudimo kaj Nikola na filmo govori zagorski. I još nekaj, zazvedili smo da so se Nikola i Peter, kak brati, sfadili kaj je do ve nigdra nišči ne rekel. Film je još ne došel na svetlo dneva pak se te falinge, štere so vum došle na pretpremijeri filma morejo popraviti tak kaj ne bode Nikola, a i Peter ono kaj je ne nigdar bil. Nebre Alen ono kaj je ne nigdar bilo nam podlečiti kak umjetničko slobodo. Dosta se je toga pripetilo vu živlejo Nikole i ne tre zmišljuvati ono kaj je ne bilo. Alen je dosti veliki maher kaj to v red dotira. Toplo se nadjam!
Jožek Radnik