Thompson  vu  Dojčlando

     Nebrete veruvati kak Marko Perković Thompson smeta našim antifama i to seposod de popevle. Nejpredi so naše antife ne mogle dojti k sebi dok je Marko popeval v belom Zagreb grado i to na Hipodromo pred šesto jezer ljudi, šteri so skupa žjim popevali se jegove pesme i to one štere antife nebrejo čuti jerbo Thompson niti nema druge. Neje jiv tuliko muočilo kaj ga je došlo poslušat i žjim popevat (kak z Mišijom) nego jiv je bole muočilo to kaj se je ne nikaj hudoga pripeteilo, kaj je ne morala dojti niti Hitna, a niti pak policija. Posle so ne mogli dojti k sebi dok je bil koncertlin v Sinjo, pak vu Splito, Imockom… To se još more nekak razmeti jerbo tu so v pitanjo naši ljudi, naši mladi ljudi i to so nekak prežvekali, ali ne razmem kaj jiv kršeli zajedajo ve dok popevle v Dojčlando, vu Štutgardo, (a bode i vu Frankfurto) i ve naši antife na red pobirajo nemačke vlasti zakaj mo dopuščajo kaj popevle na jivomo hataro? I ne sam to nek mo dopuščajo, očem reči, nišči se ne buni dok popevle Bojno Čavoglave i to v originalo z pozdravom ZDS, šteri jiv nejbole boli.  Našli so se naši ljudi kaj bodo Nemce vučili redo, kaj jiv bodo vučili kaj se sme, a kaj se nesme. Kuliko vidite Nemci so ne zabranili koncertline, neso zabranili pozdrav ZDS kak god su naše antife navaljivale, najbrž oni znajo kaj je smeti, a kaj ne i ne nucajo, nikše naše savjetnike. Ne moram vam niti reči kak je dvorana vu Štutgardo bila puna i kak je koncertlin prešel onak kak dragi Božek zapoveda kaj znači da na koncertlin dohajajo spametni ljudi i to zbog radi lepi domoljubni pesmi i popevanja!              

Neje  se  v  Brezovici! 

     Kristina Ikič Baniček je bila dvanajst let gradonačelnica Siska i nejbole smo jo zapamtili po tomo kaj je sako leto držala govore v Brezovici, šumici polek Siska, za Den antifašizma vu šteroj je, tak je bar ona rekla, zafremani prvi partizanski odred. Več sam o tomo pisal i rekel sam kak je prvi partizanski odred ne zafremanni dok je Hitler napal Jugo (06.04.1941.) nek dok je Hitler napal Staljina (22.06.1941.) i to tak kaj so Nemci napali Rusijo rano vjutro vu peti vuri, a komunisti so v Brzovici zafremali partizanskoga odreda v šesti vuri. Još dendenes se nezna što je komunistima vu Sisko poslal glase o napado, što jiv je zbudil tak zaron i kak se je to se pripetilo, ali se još navek pripoveda i te glase je širila i Teta Ikača, sisačka gracka načelnica i to sako leto se glasneše i glasneše.

     No, lani je gospa Baniček zgubila izbore v grado Sisko tak da je mesto SDP-ove gradonačelnice došel HDZ-ov gradonačelnik. Cugle vlasti je vu Sisko vu svoje roke prijel Domagoj Orlič i morem vam reči da ga Sisčani jako falijo, očem reči, da se vidi kak je v Sisko se genulo na bole otkak se je gospon Domagoj sel vu gradonačelničko foteljo. A kaj reči, neje niti jemo bilo lefko, neso niti esdepeovci takše cvetje kak pripovedajo dok so v opoziciji, najme kaj, dok je prevzel cugle vlasti v grackoj kasi je falilo prek dvesto milijonov eura. Tuliko so bili dugi, a i hajdi obaveza je bilo na sodo i ovrhe so čakale. Čuda toga, a nikaj dobroga. Dok se je to pomalem namirilo unda je gospon Orlič počel delati ono kaj mo je bilo na pameti i kaj je obečal svojemo biračkomo telo: počel je obnavljati škole i zabavišta, počel je davati potpore za novorođeno deco, povečal je stipendije študentima, sufinancera študentski prevoz. I to je još ne se, pokrenul je akcijo „Sisak je naš dom“, mladim familijama davle pomoč kaj ostanejo vu Sisko, pokrenul je stanogradnjo, otprl je tri nove poduzetničke zone i poduzetničke centre, počel je obnavljati prometno infrastrukturo i modernizera javni prevoz. Tuliko toga se je hapil v tak kratkom vremeno, a još ga je zgradi štere so zrušene v potreso, a neso obnovljene pak se i za to mora brigati. Pokazal je Sisčanima kak tre delati za svoj grad kaj bode grad rasel i širil se. Oni šteri pratijo športa vidijo da je šport vu Sisko prevel i jako čuda napreduval (hokej, nogomet, rukomet). Verjem da bodo ga Sisčani znali nagraditi, makar je niti jempot ne bil v Brezovici?

Kaj  nam  je  doneslo  Martinje?  

     Kak i sako leto tak i ovo so naši policaji bili na poslo dok smo si mi drugi feštali za Martinje, očem reči, bili smo na krštenjima mošta. Znate da je ne lefko ostati trezen na krštejo mošta i kak god čovek malo spije staroga vina i malo sproba mladoga i dok se se to skupa zbroji i dok ti naši policaji dajo frulico unda to zide prek oni 0,5 kuliko je dopuščeno. Moramo priznati da ipak stvari idejo na bole jerbo ovoletošji rekorder je mel v sebi 2,4 promila alkoholo, a kuliko se mi zmislimo ak je negda čovek štel biti rekorder po količini pijače vu sebi moral je meti nejmeje štiri promilov. Kak se je tu nekaj spremenilo tak so i policaji pri sebi hajdi toga spremenili: ak te policaji najdejo kaj si malo globleše pogledal v kupico nek je dopuščeno unda te pošteno rebnejo, a i vozačko moraš oročiti tak da boš si drugoč tripot premišlaval predi nek se bodeš sel za korman dok bodeš kak god malo pod gasom. Kaj god bodemo rekli, auti so se fletneši, promet gosteši, a još se tu motajo peciklini (obični i na strujo), romobili, motori, pešaki tak da furt tre paziti. A sima nam je poznato da čovek bole počne paziti dok se ga rebne po žepo.

     Zazvedili smo kak još navek 25 procentov prometni nesreči skrivijo ono šoferi šteri so si gutnuli malo prek mere, a oni pak velijo da ovi drugi kak god so trezni skrivijo 75 procentov nesreči, a si se sam spominajo za vinoljupce kaj ne bodem rekel pijance.

    Dok je od nas ili pak od vas odišel Sveti Martin unda nam je v pelnici ostalo mlado vino. A nejvečpot so ga točile mlade i fajne puce, nesam uspel zazvediti je li so vejč vina potočile one mlajše ili pak ove fajne? Vidim da se na smeh držite kaj znači da mi ne bodete povedali od šterih ste vejč spili, a još meje što vas je unda dimo pelal. Nek tak bode dok se ne bode zazvedilo.                         

„I  vu mojemo  grado  Vukovar  sveti“

     Kak i sako leto tak i ovo je leto 18. novembra obiležen „Dan sječanja na žrtvu Vukovara i Škabrnje“. V Čakovco je bilo posebno svetešje jerbo  je posle vužiganja sveči pre spomen ploči na igrališčo Sloge, meše v čakoskoj cirkvi na Jugo i mimohoda („Kolone sječanja“) do Vukovarske vulice, vužiganja sveči po celoj vulici, kak i sako leto, ovo leto je otkrivena maketa vukovarskoga Vodotornja polek rotora v Zrinsko frankopanskoj vulici na križajo z Vukovarskom vulicom. Si znamo da je Vodotoranj simbol obrane Vukovara, a maketa je postavlena na inicijativo međimorskih braniteljov tak da se bodemo navek dok bodemo vidli Vodotornja zmislili na Vukovar, jegove branitele i žrtve štere so podnesli.

Jožek  Radnik

By admin

Odgovori

Vaša adresa e-pošte neće biti objavljena. Obavezna polja su označena sa * (obavezno)