Kam zapičiš lopato smetje najdeš
Dok se zazvedilo za velike brege smetja v Gospičo, i dok se je pomalem vlekla istina o Šincekima na svetlo dneva, napisal sam tu na ovomo mesti kak je Lepa naš mala zemlja za veliki odmor, a ne mala zemlja za velike brege smetja. Morem vam reči dok sam si to pregruntal neje mi bilo niti na kraj pameti do kakše bode trakavice dovleko to smetje v Gospičo. Posle Gospiča saki den na svetlo dneva se zvleče nekši novi breg smetja, očem reči, smetlišče. Za naše sosede Varaždince več dvajsti let znuomo kak skrivlejo svoje smetje vu velikim balama i dok se je to genulo z mrtve točke (tu je pomogla naša Vlada i premijer Plenkovič), a unda se je zazvedilo da Varaždinci imajo novo „skladište“ sakefele smetja i to v pogonima negdašje fabrike stolcov Mundus. No, to je ne se, saki den se zazvedi za nekše novo smetlišče i to nejvečpot pod zemljom. Ve se zazvedilo da je jeno veliko smetlišče sakefele smetja i v Benkovco v negdašjemo kamenolomo, zazvedili smo kak i prinas v Puščinaj je jeno smetlišče… i kaj ne bodem dale nabrajal. Ve se vidi kakši smo mi Hrvati „poštejaki“, sako lukjo, sako grabo štera je de bila smo napunili z smetjom. I to ne z našim nek z ljuckim, dopelanim od naših sosedov, oni so punili naše rudnike, grabe, kamenolome, a oni šteri so jim pokazali te grabe oni so punili svoje žepe. Žepi bodo ostali puni, a se to pospravljanje smetja bodemo mi mali ljudi platili z svojih žepov ak očemo kaj bode Lepa naša i dale lepa zemlja za veliki odmor. Jerbo ak turisti zazvedijo za naše smetje brzčas več ne bodo hodali k nam na počinke i peneze trošili prinas, smetja imajo dosti i doma.
Politika se zmešala med smetje
Politika se je zmešala med smetje jerbo kak drugač to razmeti, smetje je v Gospičo, a prosvjed v „belom“ Zagreb grado. Najte me krivo razmeti, nesam vam ja za smetje, nesam, a posebno ne za ono opasno, ali što zna da se je to smetje počelo voziti v Gospič i što je pobral „judine škude“ za prve kamijone smetja v Gospičo? Slažem se z tem da se toga „sranja“ tre rešiti i to čim predi, ali o tomo se na prosvjedo ne nikaj prepovedalo, si so došli, si so se zišli sam z jenom miseli na pameti kak da se stira HDZ z vlasti, a smetje več bode nešči pospravil i to stoprocentno ne on što je Gospiča, Varaždina, Benkovca… zasmradil. Najgerek sam je li se bode igda ili pak nigda zazvedilo što je komo dal viziperte kaj so stranjski mogli voziti svoje smetje na naša na novo zmišlena smetlišča, kak za ono v Gospičo, tak za ovo vu Varaždino, Benkovc, Puščinaj…, što jim je dal viziperte kaj bodo ostavljali svoje smetje na kvarteljo prinas vu Lepoj našoj?
Kuliko sam mel za čuti našlo se je i smetje zakopano vu Puščinaj v šumici, očem reči, v jarko polek štreke i najbrž se nigdar za to nej zazvedilo da se je ne počel delati nadvožjak ober štreke. Se pomalem, predi ili posle, dojde na svetlo dneva. Barikin dečec se je minuli mesec oženil, ima več dvajstipet let i stopram se je na gostuvanjo zazvedilo što mo je japa. Ali se je ipak zazvedilo. Tak se je zazvedilo i za smetje v jarko pod pažom, a je li se bode zazvedilo što je to smetje v Puščine dopelal i što mo je pokazal de ga nek zmeče i za to ( ne male) peneze pobral – to te ja pitam?
Koncert ili pak prosvjed??
Dok dojde v Zagreb na Jelačič plac na prosvjed protiv smetja, očem reči, protiv HDZ-a sto jezer ljudi unda je to buđenje i događanje naroda, a dok dojde vu Vukovar na Thompsonov koncertlin prek 120 jezer ljudi unda je to došel „šljam“ ( kaj nebom spominjal težeše reči štere so nucali antifašisti) tak so bar rekli i napisali naši antifašisti. Na koncertlin so došli oni šteri so provocerali sosede Srbe šteri živijo vu tomo istomo Vukovaro, a te isti Srbi so, ruon tak, mogli dojti na Thompsonov koncertlin i nišči jim je ne branil kaj dojdo. Ak so ostali živeti vu Vukovaro posle sega kaj so mo naprajli 1991. leta da so došli na koncertlin unda bi mogli reči da je to napravil nešči drugi, nešči što je došel z tenkima z istoka, z Beograda i šteri je štel kaj mejo Lepe naše odrivle tijam do Virovitice. Srpski antifašisti so zgubili rata šteroga so sami započeli i ve bi šteli i dale gospodariti vu Vukovaro, a kuliko znuomo navek so pobjedniki hercuvali, pobedniki so poslušali svoje pevače i svoje pesme, a oni drugi kaj so rezrušili Vukovaro i neso uspeli od jega naprajti srpskoga grada morajo poslušati pesme pobjednikov. Ak očejo i dale skup živeti. Thompson i mladi ljudi šteri ga poslušajo, šteri žnjim popevlejo znajo kaj očejo i nečejo kaj jim bode nešči drugi komanderal v jivi zemlji, slobodnoj i neovisnoj!
Berbe so počele…, ne, ido pomalem krajo!
Negda so se za Bartulovo (24. augustoš) v goricaj navelikom postavljali klopoci šteri so plašili škvorce. To so se gazdi od goric osigurali kaj se gorice ne bi brale s polom, pol škvorci, pol gazdi jerbo so si ipak gazdi zaslužili nekaj vejč od ftičica nebeskih. A letos je bilo čistam drugač, još so se klopoci niti ne postajli, još so niti ne počeli klopotati, a berbe so več počele. Treba čim predi pobrati i posprajti ono kaj je suša ostajla. Suša je nekaj sebi zela, nekaj je pobrala, a ve bi još sam trelo kaj bi ono kaj je suša ostajla toča potukla tak da bi naši vinari ostali bez sega. Denes je se drugač, nega prave zime tak da prtuletje mam posle fašnika počne, a sunce več žari v majušo i ne zmoči se do septembra tak da se tre požuriti posprajti se ono kaj je na trsima ostalo. Znuomo da se je navek pripovedalo, a to mi je i prijatel Tonča priznal kak je denes lefko biti vinogradar jerbo se pobere ono se kaj je zraslo, a vina ga navek tuliko kuliko gazda lagvov ima. Si znuomo da so denes skorom si lagvi od rosfraja tak da se nebrejo resošiti, a saki pravi gazda vu svoji kleti ima spelanoga vodovoda i sam ovi našimeđimorski vodovodači znajo kuliko se vejč vode troši za vreme berbe. Ne bodete veruvali, ali još je niti jeden vinar ne priznal kak je dolejal vodo na trop jeno dva – tripot, stepel cukora i znova prešal, ali sako leto puni lagvi so navek bili stiha. A to kaj se čuda vejč vode potrošilo to so se tobož lagvi pet – šest pot prali,a i splaviti jiv je trelo. Da pak je šteri naš vinar priznal da je jegovo vino ne pravo domače, a mi, ak nam je vino dobro, nigdar ne pitamo de je zraslo?
Si da pil hudo vino? – Jesam! – I kakše je bilo? – Kaj, kakše? Dobro!
Jožek Radnik