Si poprek se svadijo sam Kinezi so stiha, delajo i rivlejo se prema Zapado
Kak se prinas v Lepoj našoj furt svadijo levica i desnica, nega dneva kaj ne bi letelo kameje z jene strane na drugo, a vu sveto tak delajo Istok i Zapad. Kak i navek Evropa je tu negdi na sredin, očem reči, negdi izmeđo kak vena,i i navek se je Evropo nekaj pitalo, ali denes, kuliko vidimo, Evropo se nikaj ne pita. To vam je kak i pre teci Franci, do par let teca je bila glavna ne sam v hiži nek i na celomo grunto, a ve kak je saki den se stareša, slabeše čuje i slabeše vidi ve se ide mimo je. Tak je i vu sveto ili pak je nekaj slično, Evropo se skorom nikaj ne pita i na tomo sveto je bole kak bogec bistrički. Po cele dneve, kaj dneve, po celo leto šteči, očem reči, furt nekaj šteči, ali se od toga ne vidi nekši hasen jerbo oni šteri so jakši delajo po svojemo i nišči jim nikaj nebre. Nišči pak niti Evropa. Neje da se ja nekaj preveč razmem vu svecko politiko, ali malo, malo pak se negdi otpre novi rat, a malo je onih ili pak niti jeden šteri se je vgasnol.
Poglednite, v Ukrajini nikaj novoga, v Palestini ruon tak, unda se nam je pojavila Venecuela, kaj ne bodem spominjal Grenland, Iran, Kubo… Za Severno Korejo se nikaj ne zna. Ona je sam stiha i dela po svojemo. Pripoveda se kak so Kubanci bokci, a Korejancima je čuda bole jerbo se nigdar i nikomo nikaj ne žalijo. Brzčas je v Demokrackoj Narodnoj Republiki Koreji takši hižni zakon. Kak zgledi, ne sam da zgledi nek je tak i je kaj ključe sveckoga mira vu svojimi rukami držijo Ameri i Kinezi, a si drugi so med publikom i drukajo za jeno ili pak drugo strano. Teško je biti spameten i znati štera strana (Istok ili pak Zapad) svecke političke vage bode prevagnula? Zidejo se svecki političari vu Švicarskomo Davoso kaj se bodo spominali o miro, a oni se spominajo o tomo kuliko što bode potrošil penez za oružje i od koga ga bode kupil. Brzčas je tak bilo ak je to i moja teca Franca zazvedila makar slabeše čuje, ali po cele dneve sedi pred televizorom i to naleta otkak smo vugnuli klupico pred potnom lesom. A klupico smo vugnuli jerbo so se tecine pajdašice, več zdavnja, odišle k Božeko na račun tak da je klupica sprhla makar joj je nišči, nejmeje petnajst let, ne nucal.
Tuliko za ve kaj se sveta dotikavle, čim zazvedim nekaj novoga, očem reči, čim zazvedim kam plava of naš (čitaj: svecki) Titanik vi bodete prvi znali.
Tak vam je to: 500 milijonov Evropljana prosi 300 milijonov Amerikancov kaj jiv obrani od 140 milijonov Rusi!
Nikola Tesla je još ne se rekel?
Več se to nikak nebre skriti kaj američki precednik Tramp oče biti glavni na ovomo sveto i kaj se bode za se kaj što oče naprajti mora jega pitati i pre jemo za se platiti takso.. Ste vidli, ve je on zafremal Mirovnoga odbora, a furt ratuje. On započne rata, posvadi ljude i unda bode te ljude miril prek svojega Mirovnoga odbora. On ga je zafremal, on je precednik, on je odredil kuliko je članarina za one šteri očejo nutri dojti. A, verjem da ste čuli, kak je članarina ne mala, milijardo dolarov. Istina Božek, niti dolar več ne vredi kak je negda vredil dok je bil glavna svecka valuta, ali miljardo tre nazobačiti. Milijarda je čuda i za one šteri zobačijo po tiskarama, a ne kaj ne bi bila nam šteri nemamo svoje tiskare za dolare otkak nam je tiskara Zrinski odišla vu stečaj i likvidacijo. No, to je još ne se, v Davoso je „stari dobri“ Donald govoril o oružjo i prodaval je oružje, a kakšo formo je bilo to oružje to nisči ne zna što je ne bil tam.
Navelikom se pripoveda kak so Ameri došli vu Venecuelo: nejpredi so vgasnoli radare, unda so došli dronovi cela jata kak prinas lastavice dok se selijo na jug. Posle toga se je čul glasni zvučni signal od šteroga so bili bleserani si stražari i vojniki tak da so otpelali precednika Venecuele Nikolasa Madura i jegovo ženo bez velikih problemov i bez ijedne žrtve. Pripoveda se i to se glasneše i glasneše kak je Tesla mel prvi prste vu tomo oružjo štero se koristi stiha i se napravi kaj se nuca, a nikaj se ne čuje. Osim bežičnoga gašenja radarov, invazije dronova, zvučne buke još postoje i laserske zrake smrti štere so Ameri vu Venecueli ne nucali kaj ne znači da jiv nemajo. Tu i tam svečurkajo po kugli zemaljskoj tak kaj bode Putin znal z kim ima posla, a ruon tak i Kinezi z šterima se Tramp furt svadi. Tesla je to zmislil kaj se bode jegova rodna gruda, Lepa naša, obranila od jakših i pošlokjenih, a ve to Ameri nucajo kaj plašijo sveta.
Tramp i Kinezi
Kak se Tramp ne bode svadil z Kinezima ak se nebre žnjimi nikaj dospomenuti. A kaj znači dospomenuti? To bi značilo kaj bi Kinezi, bar negda delali onak kak bi to „stari dobri“ Donald štel. Kinezi se obečajo, ali i dale delajo po svojemo. Malo so na Trampa. Verjem da ste ne pozabili kak so se Ameri i Kinezi svadili okoli carini? Tramp je kričal tak kaj ga je celi svet čul, ali Kinezi so ne niti okom trepnuli i črez jeno kratko vreme se je došlo na svoje pak Ameri i Kinezi i dale trgujejo. Pak i morajo trguvati jerbo Kinezov je prek milijardo tristo jezer i oni morejo čuda vejč naprajti nek tristo milijonov Amerov. I ne sam to, čuda vejč sega i nucajo od Amerov: Istina Božek da je Kinezima dosta šaka riže za preživeti dneva, ali ne sima, a i nebrejo ruon saki den jesti rižo. Negda so Kinezi delali sam bofl robo, štera je ne bogzna kuliko koštala, ali je još meje vredila. No, pred cirka pedeset let dok je Mao Ce-tung odišel vu vječna lovišta Kina je otprla svoje meje i to, predi sega, modernoj tehnologiji tak da denes morejo se naprajti kaj vi očete sam ak imate peneze kaj to pošteno platite. Ono kaj so ne znali so prekoperali tam pre onima šteri so znali. Poznato je sima kak so oni, ruon tak kak i Japanci, lojsali po celomo sveto z foto-aparatima i slikali so se do čega so došli. Još navek to delajo, ali z mobitelima. Najgerek sam, jako sam najgerek, kaj so sam poslikali prinas dok so delali Pelješkoga mosta? A kaj so i mogli doli na debeloj vodi? Napriliko kak muoči dobro živeti celo leto i lenguzati, očem reči, ne iti vum z hladovine. Premalo je cajta minulo kaj bi vidli što je to itak prvi probal, očem reči, je li je prav zaprav lenguzanje prinas zmišleno?
Jožek Radnik