Bil sam v Kumrovco
Bil sam pre pajdašo v Klanjco pak sam, dok sam išel dimo, skočil, onak usput, do Kumrovca pogledati kak zgledi negdašja jugokomunistička politička škola. I kaj sam videl? Katastrofa je preslaba reč za ono kaj sam videl. Zgledi ruon tak bogo kak Haludovo, negdašje elitno turističko naselje polek Malinske na otoko Krko. Šaka jada. Nigdi nikoga, sam vrane, čuki i sove. Zišel sam tam Štefa z Krapine. Još smo se niti ne počeli spominati več mi se pofalil kak je on ne komunista antifašista nek negdašnji komunista od malih nogu, od pionirske kape i marame i nikak nebre razmeti kak jim (jemo i jegovim pajdašima) ova naša država, Lepa naša, neče poprajti jivo komunističko školo. Nesam ga nejbole razmel kaj pravzaprav oče, ali sam razmel da bi štel državne (čitaj: naše) peneze kaj bo popravljal staro jugo školo pak sam ga unda pital kuliko je on penez, vu svojemo živlenju, dal za cirkvo? Rekel mi je onak napuhjeno: pak kaj bodem ja daval za cirkvo, pak ja verjem kak Božek ne postoji i ne delam stisko v cirkvi. No, pak kaj se unda buniš, pak mi z Lepe naše ne hodamo v komunističke škole pak kaj jiv bodemo unda popravljali? Mi šteri hodamo v cirkvo si sami popravljamo cirkve, pak si unda i vi sami popravljajte komunističke škole ako jiv očete i dale nucati!
Čiji je spomenik polek Jožijove hiže?
Pot me nanesel i do Jožijove rodne hižice štera je zlišpana tak kaj turisti imajo kaj videti, a polek hiže je veliki Jožijov spomenik na šteromo piše Josip Broz Tito. Po spomeniko se vidi da je moški po šteromo je spomenik napravleni bil veliki i močen čovek tak da ne znati komo je itak te spomenik napravleni? Zakaj? Zato kaj je tovariš Tito bil mali, očem reči, bil je veliki 162 centimetre, ali je mel se prste, kak of na spomeniko, a Joža Broz je bil visoki, 180 centimetrof veliki, ali je ne mel jeno prsta šteroga je zgubil v šloserskoj radionici mjastora Nikole Karasa. Najbrž je to spomenik Joži Brozo jerbo je polek jegove rodne hižice, ali spomenik ima se prste kak i Tito? Kak zgledi jeden spomenik za dve peršone!
Neje mogel najti dosti
Sima nam je poznato kak v belom Zagreb grado hercuje strankica (čitaj: partija) Možemo i jiva leva družina, a jivi je gracki načelnik Tomek Tomaševičov pod šterim je Zagreb grad se sam ne beli jerbo se, otkak je Tomek zel cugle vlasti vu svoje antifašističke roke, smetje niti ne vozi saki tjeden kak je to bil dok je hercuval pokojni Milanček Bandičov: No, pustimo to to je ne naš problem to je problem zagrebečkoga biračkoga tela i nek si ga oni rešavlejo kak znajo i morejo. Štel sam vam pravzaprav reči kak so Možemosi i jivi antifašistički pajdaši naručili od našega nejbole poznatoga redatelja Jakova Sedlara filma o ustaškomo logoro v Jasenovco za vreme Drugoga rata. Sedlar je nejpredi zel posla prek, ali je posle leto dni odustal jerbo je nikak ne mogel najti 700 jezer ljudi, statistov štere bi glumili logoraše i kaj bi jiv potamanil za vreme filma.
Kuliko so nas koštali Si sveci?
Nekak smo si odnavek zeli šego kaj smo hodali na grobja i vužigali sveče pajdašima i rodbini na Se svece, a ne na Den mrtvih šteri je mam drugi den. A to je još bole postala šega od da so Si sveci postali državni svetek tak da te den imamo nejbole časa za obilaske grobja, a i saki den imamo se več pajdašov i rodbine na grobjo. Tak je i ovo leto bilo. Vreme je bilo kak stvoreno za španceranje, lepo toplo i to bez dežđa. Španceral sam se po grobjima i gruntal sam kuliko so nas itak koštali Si sveci i kuliko smo potrošili za te dneve, očem reči, za našo pokojno rodbino? Nega bilo aranžmanov i cvetja tak čuda kak negda v nejbolša vremena, ali je zato sveči bilo cele kupe, ali so ne se svetile jerbo je nešterne vgasnol veter šteri je puhal cele dneve. Nešterne sveče so gorele duže, a nešterne krajše jerbo ga bilo premalo benzina (čitaj: voska) v lampašima, pak morajo i oni šteri delajo lampaše nekaj zaslužiti jerbo so i jim Si sveci i Den mrtvih sam jempot na leto.
A kuliko smo potrošili? Nigdar tuliko kak ovo leto. Zakaj? Zato kaj je se od cvetja do lampašov bilo nejdražeše do ve. Si so zaslužili sam mi šteri smo plačali smo ostali kratkih rokavov (čitaj: praznih žepov).
Otkod zmažemo tulikše tone zlata???
Navek dok je preveč penez po žepima nas ljudi, dok tiskare penez štampajo po cele dneve i dok se preveč kupuvle unda je inflacija saki den se vekša, očem reči, penezi se meje vredijo pak oni šteri imajo nejvekše kupe penez unda kupuvlejo zlato. Zlato se kupuvle makar je niti ono ne fal, znate kak je to dok se nekaj počne čuda več kupuvati nek je normalno unda i tu cene ide gori. Kak god cene zlata raste oni šteri imajo peneze rajši kupijo zlato nek kaj bi držali peneze v banki ili pak vu strožoko. No, nekaj drugo vam mene gvinta: Otkod ve najempot zmažemo tuliko zlata kuliko kulaki kupuvlejo, pak nega ve na sveto vejč zlata nek ga je? A kuliko vidimo zlata je dosti za se. Pitam se pitam de itak to zlato raste ak znuomo da je, več na leta, jako malo zlata sprano z Drave vu Donjemo Vidovco i Svetoj Mariji?
Trinajsta penzija nam je premala!
Ovo leto je naša Vlada zdigla sima šteri delajo ili pak hodajo na posel plače, a penzionerima penzije. I to je još ne se jerbo je Vlada donesla odluko kaj bodo si penzioneri dobili i trinajsto penzijo i to po leti radnoga staža 6 (čitaj: šest) ojerov. Morem vam reči da so to ne mali penezi i nišči ne pita otkod vladi penezi nek si gombajo da jiva leta minuloga dela vredijo vejč od šest ojerov. ???? Do dneva denešjega so leta isto ili pak vejč vredila pak so penzioneri ne dobili nikaj Štel sam pravzaprav reči penzionerima da je šest ojerov čuda vejč nek nika i zato bi bil red kaj bi Vlado, premijera i ministra financija malo pofalili pak unda oni mortik i vejčpot dali nekše dodatke kak so to leto dni nazaj delali. Si bi mi trošili i to vejč nek imamo sam moramo najti nekoga što bode služil za nas!
Pita pajdaš: – Je li morejo i penziči vu vojsko na mesece po 1100 ojerov?
Neje lefko biti moški, čuda jiv je odustalo, a još vejč fpešalo!
Jožek Radnik