Rat je minul, a krv je tekla i dale…
Minulo soboto je i prinas vu Međimorjo obilježeni evropski den žrtvi totalitarnih sistema oliti sustava. A totalitarni sustavi so, kak nam je sima poznato, fašizam, nacizam i komunizam. Mi prinas vu Međimorjo imamo nejveč žrtvi komunizma, a grobišta v štera so komunisti, posle Drugoga rata, zakapali one šteri so drugač mislili so Leš v Kotoribi, Ksajpa vu Šenkovco, Sep na Dravi vu Gornjem Hraščano i Repova šuma vu Štrigovi. Vu dneve posle rata se je ne pisalo kuliko ljudi sfondano i što je to bil, ali kuliko znuomo, kak so nam naši stareši pripovedali, pod zemljom je brez soda završilo cirka jezero Međimorcov. Tuliko je ljudi falilo na ovom našemo falačko zemle, a de so to je nišči ne smel niti pitati.. Četrdeset pet let posle rata, za vreme komunizma, se ne smelo pitati ak si ne štel probleme meti, a posle se je niti ne ftegnolo na to misliti jerbo je več hapil novi rat, šteroga so hapili te isti antifašisti.
Den žrtava totalitarnih sustava je obilježen v Macinco na čijemo je hataro grobnica Sep na Dravi. V župni cirkvi je služena meša za se stradale vu Drugomo rato, posle rata i za se poginule branitelje, a posle meše su položeni venci i vužgane sveče Pri sepu na Dravi. Minotom tišine, molitvom i pesmom odana je počast sima šteri so nastradali, a neso bili nikaj krivi s željom da se takša olovna vremena več nigdar ne bodo ponovila.
Je li se bode ipak prekapalo okoli Jeasenovca?
Verjem kak nam je sima poznato kak je za vreme Drugoga rata bil v Jasenovco ustaški logor i pripoveda se več osemdeset let kak so v tomo logoro ustaše potukle hajdi partizanov, a nejveč Srbi, Židovi i Romi, ali se nikak nebrejo povjesničari i istoričari dospomenuti kuliko je itak tu žrtvi bilo jerbo je na spomen ploči v Jasenovco zapisano nekaj vejč od 83 jezere žrtvi, a Srbi i antifašisti pripovedajo da jiv je bilo čuda vejč, a brojke ido od 700.000 do 1.400.000, a za se te žrtve so krivi, što drugi, neg ustaše. Pred nekaj vejč od šezdeset let so počeli iskapati mrtve, ali je to fčasi prestalo jerbo je ono kaj so našli v zemlji ne ruon pasalo z onim kaj so partizani zapisali pak so iskapanja prestala. A kaj se nej nekaj pripetilo drugač kak se več osemdeset let pripoveda z Javnom ustanovom vu Jasenovco hercujejo Srbi tak da se nikaj preveč ne bode zazvedilo dok so oni tam. No, ve se je javil naš čovek Marko Franovič, Hrvat, šteri živi v Australiji i davle miljon dolarov, nejmeje, kaj bi se več jempot prekopal te hatar okoli Jasenovca i kaj bi se zazvedilo što je itak tu zakopani i kuliko je tu ljudi štere so ustaše ili pak oni posle pod pažo posprajli. Verjem da znuomo kak je logor Jasenovac zaprti 1951. leta dok je otprti Goli Otok, a cugle vlasti so v logoro posle Drugoga rata držali partizani, očem reči, komunisti, a ne ustaše. Jako sam najgerek je li bodo naši političari zeli toga milijončeka i jeli se bode počelo rovati na hataro negdašjega logora kaj se, na se zadje, ipak zazvedi što je tu završil pod zemljom i kaj se zazvedi istina štero jugokomunisti skrivlejo kak zmija noge več osemdeset let. Čim se zazvedi istina se bode leži, a i Javna ustanova Spomen područje Jasenovac bode brzčas prešla v roke Hrvatov jerbo kakša je to hrvacka ustanova vu šteroj hercujejo Srbi. To se sam v Lepoj našoj more pripetiti.
Marko je miljončeka dolarov del na stol, a ve so na potezo naši političari?
Đurek Kovačov z Bohnecovoga grunta je ne mogel zdržati
Več sam hajdi dugo nikaj ne pisal o Đureko ili pak Jureko Kolaričovomo z Doljnjega Hraščana, šteri je več duže od sedemdeset let na privremenomo poslo vu belom Zagreb grado. A on, kak ga zdraviče se bole stavlja, se vejč dela. Makar mo još sam par let fali do devedeset i kaj bode mogel vu mirovino jerbo je vu penziji več zdavnja. Kak je rekel, več je hajdi let minulo kak je prepravil pesme za knigo o Nikoli (Mikuli) Pavičo, a nigdar je te posel ne došel na red, ali neje štel kaj bi tua kniga ostala vu škrijici de drži ono kaj je napravil, a neje došlo na red kaj bi ugledalo svetlo dneva. No, ali kak sam več rekel Mikula Pavičov je došel na red i zato moram reči kak se je narodil v Zagrebo i kak je na se zadje, ruon tak, hmrl v Zagrebo, ali zato je delal kak navučittel v Čakovco i pisal je pesme na međimorskomo kajkavskomo narječjo (čitaj: jeziko) i unda je čistam normalno da mo je Đurek Kovačov, kak vu Doljnjemo Hraščano zovejo Jureka Kolaričovoga, to ne mogel nikak pozabiti. Mikula je tuliko toga napisal da je čistam vredo kaj mo je naš Jurek izdal knigo jerbo onoga šteri zna toga ne smeti skrivati. Štel bi vam reči ak vam ova kniga Đureka Kovačovoga dojde pod roko, a zove se Nikola Pavič, pjesnik Međimorja obavezno jo prečitajte i ne bode vam žal. Brzčas se bodete zmislili da ste Mikulino pesmo Međimorska več negdi čuli ili pak i reciterali. A počne ovak:
Da je z čistog vina morje pak da je kak Međimorje, lefko bi ga spil, al bi za njom išče plakal, sivim sozam brk namakal, žalosten bi bil…
Kaj bodete rekli zna monsinjor, profesor i doktor Đurek Kovačov kaj je dobro. Najbrž si je dobro pregruntal jerbo ak je nekaj dobro i lepo za jega unda je to i lepo i dobro i za nas. Kuliko vidimo mel je Đurek praf!
Kaj ne bodo Zagorci hujši od nas Međimorcov
Ne tak zdavnja naši sosedi Zagorci z Varaždina so počeli rušiti svojo nejvekšo i nejstarešo fabriko Varteksa. Morem vam reči čim so to hapili nam Međimorcaj so počeli teči soze i to čuda bole nek dok so naši meštri rušili našega MTČ-a. Par dni je Varteks bil glavna vest na mlekari, na čehari, na pijaco, po krčmaj i kafičima pak i vu novinaj. Najte me krivo razmeti, ali nigdar ne bi rekel da smo mi Međimorci tak dobroga i mehkoga srca kaj so nam pobegle suze za Varteksom. Ve stopram vidim kak smo stoječki podnesli dok je naš MTČ-e odišel po riti k meši, a dok so Varteksovci hitili puške v kuruzo to smo ne mogli zdržati. Bar ne stoječki, ali tuliko smo bili jaki kaj smo se jeden od drugoga fkrej obračali i brisali smo si suze tak kaj jiv je nišči ne videl.Varteks je odišel, ali Varteksove oprave i kapute smo si ostajli.
Jožek Radnik