Kak mi to v Međimorjo slavimo Den pobjede?
Kak je to cela Lepa naša napravila tak smo i mi prinas vu Čakovco i Međimorjo obilježili Den pobjede i domovinske zahvalnosti, Den naših hrvackih branitelov i preslavili tridestiletnico Oluje. V čakoskoj starešoj cirkvi Svetoga Nikole biškupa služena je meša za Domovino i za se branitele šteri so dali svoje živote za ovo samostalno i neovisno Lepo našo vu šteroj mi denes živimo. Pre spomeniko poginulim i nestalim branitelima z Međimorja vu čakoskomo parko so položeni venci, vužgale so se sveče i zafalili smo se sim branitelima, a posebno poginulim za jivo žrtvo. Pre spomeniko je postavljena nova prilazna steza, ali mi je žal kaj so ne meštri šteri so to delali malo vejč strpleja meli i kaj so ne to stezo naprajli kak Božek zapoveda, a ne kaj so jo skup zmetali kak da jim se je nekam žurilo, očem reči, kak da jo je voda donesla. Najbrž so si braniteli zaslužili kaj bode steza ruon tak fajna kak je to i spomenik. Oni so bili kak to lepo piše na spomeniko: „BILI STE VI HRVATSKOJ DOMOVINI, U POGIBELJI SMRTNOJ, BRANA I ŠTIT NEPROBOJNI“ i unda je čistam vredo da se mi jim odužimo nejbole kaj moremo i ne sam dok nekaj delamo ili pak dok dojdemo sam kaj reda zbavimo. Naši poginuli branitelji so to zaslužili. Moramo jiv nositi vu srcima i mislima i to dostojanstveno i z velikom zahvalnošču, a istino o njima moramo širiti i prenositi našoj deci i vnukima. Morajo naši mladi znati kak je to bilo v Domovinskomo rato, kaj so bili antifašisti, a kaj pak braniteli šteri je postavili fondoša Lepoj našoj.
Kaj Zrinska garda Čakovec oče ?
Več sam o tomo pisal kak je Zrinska garda Čakovec predložila kaj bi se pre spomeniko poginulim i nestalim braniteljima postavil i križ? Zakaj križ? Zato kaj je večina naših branitelja išla v Domovinski rat z krunicom okoli šijaka,z molitvom na vusnicama, a dok so bili v nejvekšoj nevoli unda so v pomoč vali dragoga Božeka, Mariji i druge svece… Prinas v Međimorjo se je po zadjemo popiso pučanstva prek osemdeset procentlinov Međimorcov izjasnilo kak katoliki, a to nam govori da je i med ovi 78 poginulih i nestalih branitelov ruon tak bilo cirka osemdeset procentov katolika, a to je prek šezdeset. Ak so živeli kak katoliki, ak so nosili krunice z križom, ak so se molili Božeko unda bi čistam normalno bilo da imajo i spomenika z križom. Dok je Zrinska garda to predložila zgledalo je da to bode se čistam vredo, ali pred mesec dni na sastanko v županiji je Koordinacija međimorskih branitelov, očem reči, Štefek Horvat, Dražen Tkalec i Danica Krhač so zdigli glase i roke protiv križa. Nesam baš siguren da se si Međimorski braniteli slažejo žnjimi, a jiv troje so je zelo pravo kaj odlučivlejo mesto jiv 2500. Nadjam se da je to ne zadja reč kaj se križa dotikavle?
Kak so se Čakovčanci zafalili branitelima
Sima nam je poznato da Čakovec obslužavle svoje glavno gracko proščeje Prcinkulovo par dni predi nek obilježavlemo obljetnico Oluje i slavimo Den branitelov. Ruon tak je Prcinkulovo nejvekša fešta ne sam v Čakovco, ne sam v celomo Međimorjo nek na glavno Čakosko proščeje dohajajo sosedi Mađari, sosedi Janezi, a i čuda, kak mi Međimorci velimo, dohaja naših prvih sosedov z Lepe naše. Kak so se pofalili čakoski turistički težaki ovo leto je za Prcinkulovo bilo cirka stopedeset jezer proščenikov šteri so došli na proščeje i usput so uživali v programima šteri so za jiv bili prepravleni od gostoljubivih Čakovčancov. Se bi to bilo lepo i dobro i z tem bi se nek dugo falili da so čakoski turistički težaki ne dovlekli, nebrem to lepše reči, derače z Kruševa, a si znuomo da so oni došli z Srbije i z sobom dopelali srpski dernek. Nebrem nikak razmeti komo je to palo na pamet, komo je to trelo kaj smo sam dva dni predi Dneva pobede, Dneva hrvackih branitelov i tridesti letnice veličanstvene pobjede naših branitelov v Oluji čakoski turistički težaki ili pak čakoski gracki oci dopelajo v Čakovec srpskoga benda i to Međimorcima šteri slavijo Marijico anđeosko i braniteljima šteri slavijo svoj den. I unda bode nešči rekel da je to ne provokacija, jerbo to nebre biti slučajno. Nebre nišči reči da ne zna kaj se je pripetilo 5. augustuša 1995. i kaj je bilo toga dneva v Knino. Ne znati što jiv je dopelal, što je dal dozvolo kaj dojdejo, što jiv je platil, očem reči, što je z naših branitelov napravil bedake. A mi se falimo kak jivo žrtvo nigdar ne bodemo pozabil?
Križ nebre kod spomenika v Čakovco, a prekodrinski mužikaši i srpski derneki oni morejo i to za nejvekše svetke naših ljudi, svetke šteri so nam Međimorcaj svetinja.
Čakoski ogjogasci so oprali čakoske vulice i fleki od mašče i olja šteri so ostali od Prcinkulovoga so zanavek nestali z čakoskih vulici. Najgerek sam, jako sam najgerek što bode opral fleke z duši Međimorcov štere je ostavil dernek prekodrinskih derača z Kruševca?
Naši sosedi so se još ne zavolili semov
Minuli tjeden so došli sosedi Janezi z Radgone kaj nas pozovejo na svoj Međunarodni sejam Agra. Dok so se sosedi Janezi falili z svojim semom i kak još navek dojde jako čuda izlagačov i to z 15 državi z celoga sveta i kak je te sejam sako leto se vekši i vekši unda se je med publikom našlo i onih šteri so se zmislili kak smo i mi Međimorci, i to ne tak zdavnja, meli svojega sema i to v Nedeliščo, šteri se je zval MESAP (Međimorski sejem poduzetništva). Neje se teško zmisliti kak je te sejem započel svojega „životnoga pota“ v Nedeliščo pod šatorima i išlo mo je jako dobro. Posle se je naprajla i dvorana Mesapa, ali dok je dvorana otprla svoja vrata unda so počeli spominki kak več sejme ne nucamo jerbo to se odelavle Internet. Ne znati je li bi Mesap još delal ili ne, ali zadje kaj smo tam meli je bilo cepleje protiv korone tak da moremo reči da so ljudi cepleni protiv korone i preživeli so, ali sejam na Mesapo je ne preživel.
No, moram vam reči da je na predstavljanjo sejma v Radgoni bil i Puščinčar Marjan Novakov šteri je bil direktor Mesapa dok je v Nedeliščo skorom saki mesec bil jeden sejam, ali otkak je Marjan odišel v penzijo i semi v Nedeliščo so odišli po riti k meši.. Sa je sreča kaj Nedeliščanci, a i mi Međimorci, imamo radi vina tak da je sako leto v dvorani Mesapa kršteje mošta pak i tua zgrada nečemo služi. A, joj, skorom sam pozabil, dvorano nucajo i male životinje tak da je i od toga nekši hasen. Verjem da Nedeliščanci trebajo deti glave skupa i da Mesap more početi znova živeti. Ak ne znajo kak nek se otpelajo v Puščine do Marjana Novaka brzčas bi jim on tu mogel dosti toga reči. On zna kak je bilo, da ne bi znal ne bi ga Janezi več na leta spituvali, nucali i plačali?
Jožek Radnik