Je li bodo naši levičari to preživeli ???
Nesam siguren je li bodo naše antife to preživele kaj je američki precednik Donald Tramp predložen za Nobelovo nagrado i to za mir, a naše antife so bile stoprocentno sigurne kak bode on posvadil celoga sveta z Kinezima, a Kineze z celim svetom čim on prime vu svoje preštimone roke cugle američke vlasti. Si znuomo da je Amerika ne sam svecka sila nek glavna svecka velesila vu semo kaj se na sveto pripeti. Istina Božek Ameri (čitaj: precednik Tramp) gospodarijo z celim svetom, gospodarijo kaj se dotikavle rata i mira, a kaj ne bodemo banke i peneze niti spominjali. No, kaj se penez dotikavle tu tre nekaj i Židove pitati, a kuliko vidimo vu tem penežlivim vodama precednik Tramp čistam dobro plava. Znuom da naše antife to ne bodo nigdar priznale, ali kak god što Trampa hiti on navek padne na noge. Kak štefov maček.
Nebo ober Svete zemle pak je mirno
Malo je oni šteri so veruvali da se bode zmiril rat na Bliskomo istoko, vu Svetoj zemli, v Gazi, Palestini, ali ipak je oružje fčuhnulo i to čuda predi nek so se i nejvekši optimisti nadjali. Oružje je fčuhnulo posle pregovorov v Egipto, a države štere so bile nejbole zgrabne kaj se rat smiri bile so Egipat, Katar i Turska, a pomagali so Ameri jerbo bez jiv i bez precednika Trampa to ne bi tak fletno i tak mirno završilo. Zato so i Trampa predložili za Nobela. Precednik Egipta Abdel Fatah el – Sisi je čuda doprinesel miro, ali je sejeno priznal kak je Tramp jedini sposoben donesti mira na Bliski istok. Dok se je rat smiril, dok je oružje fčuhnulo Tramp je lepo rekel i to urbi et orbi: – Ovo je izuzetan dan za Bliski istok.Nebo nad Svetom zemljom je mirno, nad zemljom koja će živjeti u miru, nadam se, od danas zauvijek!
Zbog završetka rata i uspostavljenoga mira, razmjene talaca i zatočenika, Izrael je odlikoval precednika Trampa Medaljom časti nejvekšim civilnim odlikovanjem v Izraelo.
Poslije Bliskoga istoka i Svete zemle na redo so Rusija i Ukrajina. Dok smo vidli kak je Tramp smiril Izraela, Gazo, Hamasa i Palestino verjemo da ima i nekšega asa v rukavo kaj se dotikavle Rusko-Ukrajinskoga rata brzčas so se on i Putin nekaj dospomenuli pred par meseci na Aljaski.
Neje lefko niti čakoskim grackim večnikima
Čakoski gracki večniki so meli pred sobom spora šteri je nastal na glavnomo čakoskomo trgo – Trgo Republike v Čakovco de je došlo do svaje izmeđo interesne skupine z gracke uprave, štero vodi čakoska gradonačelnica i privatne interesne skupine štera hercuje z robnom hižom Međimorka, a vodi jo nejvekši dioničar Franjo Vlah. Tam se ne zna čiji je devcto kvadratlinov zemle okoli robne hiže. Najme kaj, nekaj vejč od četrdeset let je to bil falaček zemle šteri se je držal za robno hižo i bil je od onoga čija je i robna hiža, a unda si je to grad Čakovec, jeno jutro z čista mira, prepisal na sebe jerbo je to grackim ocima (čitaj: gradonačelnici) tak pasalo. Dok se je to zazvedilo, pravi gazdi z robne hiže so se pobunili. Teško je tu biti spameten i reči što je kriv kaj so se dve interesne skupine ne dospomenule nek je to završilo na sodo tak kaj ve služijo i soci i fiškali. Gradonačelnica je na Gracko večo, de se mora govoriti istina i samo istina, priznala kak je predstavnik privatne interesne skupine z Međimorke, Franjo Vlah, bil pre njoj v grackoj upravi nejmeje dvajsti pot, očem reči kak je čovek mel voljo kaj bi se to rešilo dogovorno i mimo soda, ali je ne uspel. Z druge strane čakoska gradonačelnica je niti jempot ne bila v Međimorki po istomo pitanjo, a ve krivi privatno interesnoi skupino da je ona kriva kaj je grad Čakovec ostal bez tri i pol milijonov ojerov. To so ogromni penezi i nekaj si gruntam da so gracki oci i gradonačelnica trebali se naprajti kaj bi te evropski penezi završili v gracki kasi, a ne kaj se čakalo kaj sod reče čija je zemlja. Kak zgledi imajo praf oni šteri velijo da mi Međimorci, pak i Čakovčanci nebremo nikaj rešiti bez soda. Kak god, ali neje se smelo pripetiti kaj te tri i pol milijoni ojerov padne na grbačo čakoskih poreznih obveznikov. Pak mi znuomo kak je to veliki kup penez!
Kuliko poštuvlemo branitelje???
Minulo soboto je 54. samostalna pješačka bojna obiležila 34. godišnjicu otkak je zafremana. Nejpredi so položeni venci i vužgane sveče kod spomenika poginulim i nestalim branitelima vu čakoskomo parko, a posle je v Staromo grado održana svečana sjednica skupa z izložbom o ratnomo poto Samostalne bojne. Samostalna bojna je dala veliki doprinos u Domovinskomo rato, a dvajsti devet branitelja iz 54, samostalne bojne je položilo svoje živote na oltar domovine za ovu samostalnu i neovisnu Lepo našo. Si mi pripovedamo navek kak poštuvlemo naše branitele, njihove žrtve, a unda se pripeti kak na svečano sjednico o obljetnici osnutka ne dojde nišči od politike i nišči od novinarov. A naši braniteli so navek bili tihi, skromni, očem reči, samozatajni, a mi nebremo za jiv, za jivo žrtvo odvojiti jeno vuro na leto!!! Kaj reči?
Zebre v Preloškoj vulici još navek čakajo lampaše
V prošlomo brojo naši i vaši Međimorski novin mogli ste videti nejstarešega pileka na hataro čakoskog Juga, očem reči, župe Svetoga Tončeka Padovanskoga. Te pilek je v parkeco na levoj strani, ak putujete z Čakovca prema Vanovco (prek Hute), nejdukše čakoske vulice, a to je Preloška. Zazvedili smo de je pilek, zazvedili smo da je nejstareši i da je postavleni 1750. leta, da ga je pater Tonček zlišpalal ida je te pilek ne v Buzovcu. Ali neje v Buzovo, kak smo čital, nek je v Pustakovco, oliti kak v katastro piše v Gornjemo Pustakovcu. Znuomo da je Pustakovec v Čakovco ruon tak kak i Buzovec i sam oni ljudi šteri tu živijo znajo de ide meja izmeđo Buzovca i Pustakovca pak bi prosil Maria, šteri je odvlekel pila v Buzovec nek dojde kaj ga vrne nazaj vu Pustakovec. Ljudima šteri stanuvlejo v Preloški vulici i neje važno je li je to v Buzovco ili pak Pustakovco još navek čakajo kaj se postavijo lampaši (čitaj: reflektori) ober zebri po šterima pešaki, kak deca tak i stareši hodajo prek ceste. Leto je minulo i jesen več zdavnja hercuje i po ovomo našemo hataro tak da bodo črez šteri den počele i megle pak bi prosil gracke oce (čitaj: gradonačelnico) kaj bi toga problema rešili predi nek se pak pripeti nekši unfal i kaj ne bi što nastradal. Vu Preloški vulici so štiri zebre po šteraj i deca hodajo v školo, a ve dok se premeni vura, črez dva tjende, fčasi bode kmica, a đaki još nemajo jednosmensko nastavo tak da po kmici ido dimo. Štiri zebre to je osem lampaši i to so ne bog zna kakši penezi. Bole sprečiti nek lečiti!
Jožek Radnik