Kam plava brod Nove levice???
Furt si gruntam, ali nikak da zazvedim da bode itak nekaj od te naše hrvacke ljevice, da bodo itak prešli na drugo strano vulice i počeli živeti v Lepoj našoj kaj ne bodo i dale živeli v Jugi i jafkali za komunizmom i Ljubičicom belom. Nebrete mi reči da je to ne tak jerbo poglednite si sam Novo ljevicom štero ve vodi doktorica Ivana Kekin, a prevzela jo je od splickoga povjesničara (čitaj: istoričara), Dragana Markovine, iz Mostara, šteri živi i dela v Splito. Nova ljevica ne sam da podržavle Platformo Moremo nek je i dio te Platforme. Ne bi vam nikaj o jimi pisal da oni ne bi meli vu svojemo Programo napisano kak je naš Domovinski rat – mit. I ne sam to, Domovinskoga rata rivlejo med mitove, a antifašizma očejo zrivali vu fondoše Lepe naše. To je još ne se, nek nas očejo uvjeriti kak i v našemo Ustavo piše kak Lepa naša počivle na antifašizmo. Ustava sam tripot prečital i ne sam to nigdi našel. Najbrž naša ljevica ima nekšega svojega Ustava jebo mora biti v Ustavo napisano ono kaj jima paše i kaj bi oni šteli. Nebrem razmeti da jim smeta Domovinski rat, šteroga oni ne priznajo, a ne smetajo jim tenki vu Vukovaro (makar z pepicama), štere so vu Vukovar poslali ruon tak antifašisti, ali iz Srbije. Jako teško, očem reči, nikak je to ne za razmeti. A Ivana Kekin je štela biti precednica Lepe naše, a ne prizna Domovinskoga rata i naše branitele šteri so nam izborili neovisno i samostalno Lepo našo. Velijo da je Programa Nove ljevice pisal istoričar Dragan Markovina, ali kaj je se nutri napisal najbrž mo je nešči moral pomagati, to je me sam mogel, a to bi najbrž mogli biti jegovi pajdaši, istoričari, kak so, napriliko, Hrvoje Klasič, Tvrtko Jakovina i Ivo Goldstein.
I unda mi rečite kak bode v Lepoj našoj tekel med i mleko da se Možemo i Nova levica još navek držijo kak pijanec za blanjke i nebrejo se genuti od Drugoga rata kak da ne znajo kaj je bilo 5. augustuša 1995. leta. A ovo leto bodemo obslužavali tridesti letnico Oluje, Dneva pobjede i domovinske zahvalnosti i Dneva naših hrvackih branitelov!
Kam bodo itak odišli naši levičari dok se bode Svetešji mimohod oružanih snaga, policije, civilne zaštite, gorske službe spašavanja, ogjogascov, hrvackih branitelov, povjesnih postrojbi i pripadnika oružanih snaga naših saveznikov prešpanceral po nejdukšim zagrebečkim vulicama? Pak bodo pobegli kak dok so Thompson i jegovi kibici popevali na Hipodromo!
Morem vam reči da bodo i naši preštimani gardisti Zrinske garde Čakovec ruon tak maršerali vu Svetešjemo mimohodu u povodu Dneva pobjede. Saka čast dečkima, em so si oni to i zaslužili. Zrinska garda ruon tak, i to ne jempot! Ali kak jiv bodo ljevičari vidli ak bodo pak pobegli vum Zagreba?
Kak zgledi več je počel treči svecki rat. Mi se bodemo uključili čim završimo drugoga.
Misel stoletja: Živimo vu sveto vu šteromo nas hohštapleri i vandravci uveravlejo da bodemo z oružjem, šteroga još nemamo, došli do mira, šteroga več imamo!
Kaj bodemo dobili z novim cenama?
Verjem da se je Ivica Pehočov ne nadjal da ga bodemo spominjali i zvali nazaj posle kak je odišel v penzijo z mesta direktora čakoskoga Čakoma. Brzčas smo niti ne meli na pameti kaj bi Ivico zvali nazaj vu direktorsko foteljo jerbo je to mesto popunila Lidija Miše Jalšovec pred nekaj meje od leto dni. Bodem vam rekel zakaj sam se zmislil na Ivico makar smo mo bajali jerbo je v Totovco ne ostavil dosti placa za naše međimorsko smetje, šteroga ga saki den se vejč i vejč, ali dok je on hercuval vu Čakomo unda so ne zdiguvali cene za odvoz smetja. Ali dok je Ivica pete meknul cene so počel mam iti gori nejpredi gospodarstvenikima, a ve se navelikom pripoveda kak bode saki od nas vejč plačal i za sako konto štero mo komunalci z Čakoma otpelajo i to ne važno kakše je farbe kanta, a niti pak je ne važno je li je kanta puna ili pak na pol prazna. Negda zdavnja nam je Ivica obečal kak bodo vozili sam pune kante, a one na pol prazne bodo čuda faleše, ali na tomo programo se je, bar do ve, ne prešlo z reči na dela. Ne znati ak bode Čakom zdigel cene odvoza smetja je li se bode povečala graba v Totovcu vu štero bodo smetje posprajli? Pital sam dečke v Tehnixo, ali jiv je nišči nikaj ne pital niti z Totovca, niti z Čakovca, a niti pak z Čakoma makar oni jako dobro znajo kam se štero smetje meče i kak ga sfondati kaj čim meje pepela ostane. To sam več zadjipot rekel da bi trelo dati dečkima z Tehnixa šanso jerbo ak so v red dotirali vekše grade nek je Čakovec unda bodo znali i Totovca srediti.
Još nekaj, ak bode Čakom zdigel cene, a znate da najbrž bode jerbo se je još niti jempot ne pripetilo, od stoletja sedmog do denes, kaj bi se z rafonga v Čakomo kadelo, a kaj se nej posle spazil i ogej, očem reči, kaj se zdiguvanja ceni dotikavle tu so od reči. No, štel sam pravzaprav zazvediti je li se bodo, posle zdiguvanja ceni, Totovčari meje bunili, je li bodo meje gombali i je li bode slabeša duha z čakoskoga i međimorskoga smetlišča? Nove cene bi morale donesti nekaj bolšega i vrednešaga. I to za se!
Kaj bodemo dobili z novim cenama? Stoprocentno je sigurno da bodemo dobili nove i vekše čeke!
Dok mi hmajikujemo, očem reči, lenguzamo….
Dok smo mi po urlabima ili pak se držimo hlada i to čim deblešega jega i ljudi šteri furt delajo i nebrejo brez posla. Ne sam tu mislil na Japance jerbo oni delajo 300 dni na leto i po petnaest vur na den, ali imamo i mi koje za trko na ovim našim hatarima ili pak pre sosedima. Naš čovek z Čavoglava (neje MP Thompson) je zmislil novo Heineken pivo, očem reči, flašo jerbo je na flaši mesto črlene zvezde petokrake hrvacka šahovnica. Najgerek sam kuliko se bode itak takši pivi spilo do kraja leta v Lepoj našoj.
Još nekaj, v Bosni je podražilo meso i to tak fest kaj so Bosanci počeli jesti bureka z sirom! Kuliko vidimo i v Bosni je v nevoli se mogoče!
Jožek Radnik