Zakaj braniteli reda delajo v Lepoj našoj?
To se pita, a što drugi nek istoričar Hrvoje Klasič mam posle čim je zazvedil kaj so braniteli i građani grada Solina (posle Siska) stornerali koncertlina srpskomo pevačo Momčilo Bajagičo Bajagi. Kak nas je lepo podučil drug Hrvoje Klasič neje dobro, neje demokratično, a niti pak lepo kaj smo ne pustili Bajago kaj bi popeval vu Solino. A braniteli, šteri so bili protiv, so ne pozabili kak je Bajaga za vreme Domovinskoga rata popeval četnikima i prepravljal jiv je kaj bodo išli v Lepo našo kak bi pomogli kaj se preselili državna meja na crto Virovitica – Karlovac – Karlobag, štero so naši sosedi sejali odnegda, a nešternima ta meja još dendenes nejde vum glave. Dok mo je pasalo unda je Bajaga popeval našim agresorima, a ve bi hodil k nam peneze služit. Moremo čoveka razmiti jerbo si mora i on negdi peneze zaslužiti, očem reči, mora i on od nečega živeti, ali nikak nebrem razmeti kak si je ruon nas zebral, a dok je bil mlajši, dok smo ratuvali jeni protiv drugih unda je bil na drugoj, protivničkoj strani.
Kak smo rekli, Bajago bi još mogli nekak razmeti, ali našega istoričara Hrvoja Klasiča jako nikak. A kak bi ga mogli razmeti jerbo je nigdar ne zel v roke olovko i papera i nekaj napisal protiv Pule, Siska, Zagreba (do prekfčera) i kaj nam dale nabrajal naše grade šteri so ne šteli pustiti Thompsona kaj bi prijim popeval. Ne sam da je ne nikaj napisal nek je ne niti glasa zdigel, unda je to ne bilo protiv demokracije, unda je to bilo se vredo jerbo je Marko Perkovič bil pitanjo, a ve dok se je to pripetilo Bajagi ve je počel puhati čistam drugi veter.
I ne sam to, ve se Hrvoje čudi kaj se posluša branitele kak da ne zna što je natiral četnike nazaj prek Drine na svoj hatar i tak nam omogučil slobodno i naovisno Lepo našo. Jako mi je čudno kak Hrvoje Klasič ne zna kaj je bilo od 1991. – 1995, kak ne zna što je pobedil v Domovinskomo rato, kak ne zna kaj je bilo 5.augustuša 1995. i kaj je bilo posle Oluje, a se zna kaj je bilo v Brezovici 41, Srbo 41. Jasenovco ili pak vu Zagrebo 45? No, ak bodete ga nekaj pitali za Bleiburg, Jazovko, Tezno, Macelj, Hudo jamo tu se več ničega nebre zmisliti jerbo ga je unda ne bilo na ovomo sveto. Tak vam je to dok istoričari predavlejo povjest!
A kaj bi još sega čuli od Hrvoja da je del na tapeto sosede Mađare?
Kaj bi sega čuli o demokraciji da je naš Hrvoje zel na tapeto soseda Orbana šteri je zabranil gej parado, parado ponosa, po glavnomo mađarskomo grado Pešti. Zabranil ga je jeden den predi nek je peršecija morala genuti, a pederi i lezbijke so več bile v niskomo starto. Rekel je da neče kaj mo bodo seksualne manjine i rodne ideologije odgajale deco i mele glavno reč vu zabavištima i školama i kaj se ne bodo mešale v odgoj familiji. Neje da v semo podržavlem Orbana jerbo on još navek seja Veliko Mađarsko i podržavle Rusijo, ali kaj se gej parade dotikavle tu ima praf. Ne tre vu semo poslušati Evropo i Brisel.
Najgerek sam kaj bode itak drug Hrvoje Klasič napisal o demokraciji vu Srbo predi pet dni de so se zišli naši braniteli i demokrati Milčija Pupovca. Jako sam najgerek!
Neje več niti bažolj kaj je negda bil?
Negda je bažolj bil hrana za bokce (čitaj: sirotinjo), a ve vu 21. stoletjo se je to se spremenilo. Najme kaj, negda je saka hiža sadila bažolja po svojemo poljo, po kuruzama i kalampero, po vrtima i vrčakima i bažolj je bil na stolo nejmeje dva – tri pot na tjeden, a ne sam v petek. Ak ga ne bilo nikaj drugoga bažolj je bil furt pre roki i mogel je zameniti se od mesa, pečenki, trganci, klobasi, kremenatlini… Mesto sega čega ga ne bilo bažolj je bil tu kaj popuni jelovnike, očem reči,stola, tajere i želoce. No, ve so došla čistam druga vremena, ve i po stolima puše čistam drugi veter tak da nebre na stol dojti nikaj kaj je ne po voli onima šteri sedijo okoli stolov. Znate kak je to denes vu vreme umjetne inteligencije niti mi obični smrtniki nečemo bilo kaj jesti, točneše rečeno bažolja smo hitili vum z jelovnikov, očem reči, doli z kuhinskih stolov. A dok je tak unda je i bažolj repa zdigel i došel med preštimane hrane pak mo je unda i takša cena na čakoskomo pijaco. Morete veruvati, prosim vas lepo, kaj mladi bažolj košta 12 ojerov za kilo? Dražeši je od teletine, a z svinjetine se norca dela. Veruvali vi to meni ili ne, ali je tak. Imate praf dok velite da ga ne moraš kupiti ak ti je predragi, ali ako ga očeš jesti, ak ti je došla želja unda moraš roko globoko porinuti v žep ak očeš meti bažola na stolo, očem reči, vu tajero.
Najgerek sam, jako sam najgerek je li se vetri po denešjemo mladomo bažolo čujejo tak dauko kak so se negda čuli po staromo bažoljo? Neje bilo tak zdavnja dok so nas političari kupuvali z bažoljom z prvi maj kaj smo jim unda davali glase tri tjedne posle. Tak je bilo, a denes kuliko vidimo, bažlja nam morejo ponuditi sam pravi i močni političari. Negda smo se zbrčkavali z bažolja, a denes ga moremo sam senjati, a ako ga vidite nekomo na stolo unda znajte da ste došli vu hižo kulaka!?
Seposot sparine i vručine sam osvježenje z Maloga Mihaljevca
Dok so vručine unda so i sparine i dok je nejbole vroče vu sredini meseca juljuša unda nam, sako leto, dohaja osvježenje z Maloga Mihaljevca. Tak je bilo i ovo leto. Neje to nikaj novoga jerbo nam je več sima poznato kak je v Malomo Mihaljevco za humor, veselje i dobro raspoložeje zaduženi čovek šteri je navek dobre vole, a k tomo je i karikaturista, a to je Damir Novakov. Nejpredi nas je se, šteri imamo radi humora i veselje, razveselila nagrada z Turske štero je za svoje karikature dobil organizator „Dnevov smeha i humora“ Damir Novakov. Znuomo da Damir ne govori turski, ali jegove svetske karikature razmijo si šteri jiv vidimo pak je tak bilo i v Turskoj, šteri so ne naše vere. V Malomo Mihaljevco so glavne žene, a brzčas morajo biti jako dobre ka jiv moški ne sam magadijo nek i podržavlejo. I ovo leto so si oni šteri so došli vu Mali Mihaljevec mogli videti igrokaze šteri so nas nasmijali do suza. Znate kuliko to vredi dok žene vodijo glavno reč, to je ruon kak doma sam nam je doma ne do smeha.
Kak i sako leto tak je i ovo leto zišel novi humoristički časopis „Zlatna smoliga“, a ovo leto je zišla i kniga karikaturi. Još nekaj, i ovo leto je bila izložba karikaturi, a svoje so karikature izlagali Marko Ivič iz Solina i Nikola Listeš iz Kaštel Sučurca. Kak bi to rekli karikature povežuvlejo naš plavi Jadran i naše zeleno Međimorje. Kaj so ne uspeli naši političari i turistički težaki to je uspelo Damiro Novako.
Jožek Radnik