Nekaj razmem, a nekaj pak bormeš ne razmem…
Teško je to za razmeti kak itak Sandra Benčič i Dalija Oreškovič se znajo i to predi sih kaj se politike dotikavle kak ove naše domače tak i one stranjske. Još nekak razmem Sandro, ona je ipak študerala osemnajst let pak se je nekšega vraga i morala navčiti makar ve nigdi nebrejo najti jeno diplomo niti ona doma, a niti pak ovi na fakso, ali kak je itak Dalija uspela, polek prava, pravice i fiškalije poloviti i sa znanja z politike vu teh 4-5 let kuliko je študerala? Kuliko vidimo ne hasnijo visoke škole (čitaj: fakulteti) sima jednako.
Žene morejo znova vu gorice
Minuli tjeden znova so se ljudi vrnoli vu gorice. Ne sam ljudi nek i pjesma, pjevači, bandisti i tamburaši. Se je to v gorice donesel sveti Vincek zaštitnik vina, vinara, očem reči, vinogradara, a najbrž se on briga i pomaže sima onima šteri se krepijo plodovima trsja i goric. Pak nešči se mora brigati i za nas pijance jerbo ak si imajo svoje zaštitnike unda si i moremo zeti svetoga Vinceka kaj bode i naš zaštitnik. Dok več hoda po goricaj zbog radi vinarov unda si nek pod muko zeme i nas pijance. Kak veli teca Franca jenim udarcem zatuče dve muhe i si zadovoljni. Posle Martinja, da smo dosti zmočeni odišli z goric, ve za Vincekovo smo se vrnuli, kak vinari tak i si drugi ljubitelji dobre kapljice. Trelo je odrezati prve rozgve, obesiti po brajdama ili pak trsima klobasice, suhoga špeha ili pak bonceke i to se zalijati z vinom kak bi ovo leto gorice rodile onak kak mi to očemo, očemo reči, kaj bi zraslo tuliko grozdja kaj bodo si lagvi štere imamo puni. A, ako bode i vejč toga ne bode nam teško kupiti kcoj još šteroga lagva. Kak sam rekel došli smo si, kak oni željni dobre kaplice tak i oni šteri so se šteli malo preljuftati, prešpancerati, okrepiti i zapopevati trseko skupa z tamburašima. Z sih međimorskih bregov se je moglo čuti kak vinoverniki popevlejo z kupicaj vu rokami i budijo trseka: – Trsek moj, zbudi se, dosti si spal…, trsek moj zbudi se, bom te vrezal… Nesam brojil, ali bilo je cirka okoli deset jezer vinovernikov, šteri so došli trseka budit!
Za Vincekovo so se mogle v goricaj znova videti i žene vinarov štere ne hodajo v gorice od Martinja do Vincekovoga jerbo kaj bodo v goricaj dok ga ne nikšega posla. Posla ga ne, a žene ne pijejo. Rečite mi, prosim vas lepo, da ste čuli štero ženo kaj je priznala da i ona pije? Makar tu i tam? Ne bode niti jena priznala makar joj bodete prsta rezali dok je got šteri moški polek. A ne verjem da se one ne okrepijo z tom nejbolšom kaplicom štero je Božek nam Međimorcaj dal za zdraviče mesto leka. Znate kak teca Franca veli: – Nam ne tre leka, klet je nam apoteka!
Nejhuje ti je dok ti tvoji peneze vum z žepa vlečejo
Čim je novo 2026. leto prevzelo svojega mandata mam so se okoli nas počele skakati cene. Još smo ne došli k sebi od novoletnoga mamurluka več so nas dočakale nove cene parking placa vu grado Čakovco. Dok so čakoski gracki oci počeli prodavati parking place lepo so nam rekli da oni to ne delajo kaj bi služili nek je to zato kaj bodo reda naprajli v centro grada. Tak je bilo unda, pred dvajsti let, dok so još ljudi hodali v centar Čakovca, a parking plac se još dendenes plača makar več skorom nišči ne hoda v centar grada. A kaj bode tam ak so se si štacuni i se ono kaj nuca preselili vum centra i tuliko jiv je kak glivi posle dežđa. Po tem trgovačkim centrima čovek se najde kaj nuca, k tomo i čuda sega kaj ne nuca, ali kupi da mo je več pre roki.
Poglečte, prosim vas lepo, več ga ne stiske po centro Čakovca i v kaso naši komunalcov z Čakoma (čitaj: kaso grada Čakovca) dohaja premalo penez pak je trelo zdiči cene. Ak si bodemo malo pregruntali bodemo se zmislili kak je denešja čakoska gradonačelnica v predizbornoj kampanji za svoj prvi mandat, pred pet let, lepo obečuvala kak bode ukinula naplato parking placa ak dojde na vlast. I kuliko znuomo došla je na vlast, ali parking plac se još navek plača i ne sam da se plača nek mo je ve još zdigla ceno. Zdigla je ceno jerbo so građani pozabili kaj jim je obečala?
Kaj bodem vam rekel, mi šteri plačamo parkinga smo ostali iznenađeni dok smo vidli nove cene za parking plac, a komunalci so ostali iznenađeni dok je sneg opal i to tak fest kaj so ga niti ne rezgrnuli. Cene so odišle gori, a parking placi so nerezmetani i škliski.
Nebreš parkerati auta šteri nema tablice
Ne sam kaj je parking podražil nek so komunalci postajli i nove aparate za parking na šteraj čovek mora upisati i svojo registracijo ak oče parkerati jerbo bez registracije nikaj. Zabadav čovek ima auta, ima peneze, ima voljo za platiti, zna i registracijo, ali je ne vpučeni kam mora natipkati to registracijo kaj bi mogel ostajti auta i oditi v apoteko, na pošto, v krčmo ili pak k ljubavnici i kaj bode siguren da ne bode našel kazno na šofer šajbi dok dojde nazaj. Kak sam rekel, još je niti novo leto ne pravzaprav počelo več šokovi na se strane. Neje dosti kaj si je čovek pogutnul to kaj so podražili parkinga, a to je naš gracki parking, ve se moraš zapisati vu večernjo školo kaj se navčiš kak dojti na kraj z umjetnom inteligencijom ak očeš parkerati auta. Nekaj sam si pregruntal, ak mi bodo još jempot prikelili kazno za brisače bodem prodal auta. Pak ne bodem ja služil sam za auto i za čakoske komunalce.
Čakom je se podražil
Pak lefko je tak biti direktor komunalcov, očem reči, Čakom jerbo dok ti penezi sfalijo sam zdigneš cene. Smetje sorteram tak kaj ves švicam i ve mi je i tu Čakom cene zdigel. Pelajo oni smetje, očem reči, imam ja smetje ili nemam čeka moram platiti. Žalijo se ljudi na placo i na semo kak je i jim dišla gori placovina. Trebaš jen čas prodavati kaj nakaseraš za placovino.
Ne znati kak je z pokojnima, oni se nikaj ne bunijo, ali brzčas so i tu cene odišle gori. Kuliko vidimo več se čoveko ne splati niti hmreti? Preveč košta. Kam gud se obrneš nove cene. I to kakše? Vekše, i to čuda vekše. Kak dugo bodemo itak mi to zdržali. Pak neje komunalno poduzeče za to zafremano kaj bode služilo na nami nek kaj bode si zaračunalo kuliko pobiranje smetja, placovina ili pak sprevod košta, a za profit so zadužena druga poduzeča.
Jožek Radnik