Kaj god bodete vi rekli, ali bodete se, na se zadje, složili z menom da je ne lefko delati z penezi i brigati se za jiv. Navek je tak bilo, a bormeš je i denes tak ak ne još i huje da je teško bilo dojti do penez, a fletno so se resprodili, očem reči, rezišli oliti ponucali. Tak kak je doma tak je to seposot. Rečite mi, prosim vas lepo da je to bilo penez dosti za se ono kaj ste nucali ili pak šteli? Brzčas nigdar! Tak vam je bilo i vu našemo glavnomo međimorskomo grado Čakovco, na početko ovoga izbornoga leta smo zazvedili od gracke načelnice, gospođe Cividini, kak je ondašja vlast štera je tirala prema krajo svoj prvi štiriletni mandat kak so bili jako dobri i jako skrbni i kak so vrnuli se one duge štere je napravil negdašji gracki načelnik Štef Kovačov. To je bilo jako lepo za čuti, ali to je još ne bilo se jerbo ga v grackoj kasi bilo još celi kupček penez šteri je ostal od minuloga mandata, a ponucal se bode za projektline štere je ova gracka vlada splanerala i za štere je od grackoga biračkoga tela dobila novoga mandatlina. Kaj bi rekli se kak dragi Božek zapoveda sam kaj so v gracko vlast dopelali SDP-eovce šteri ruon ne delajo stisko v cirkvi i šteri verjejo kak naš dragi Božek ne postoji. No, kak bilo da bilo, gracko biračko telo je svoje glase znova dalo gospođi Cividini jerbo jim se je ona vidla nejbolša od sih oni šteri so se nudili i šteri so meli željo kaj bi se seli vu foteljo čakoskoga grackoga načelnika.
No, veselje je ne dugo trajalo jerbo niti je pol leta ne minulo i več smo zazvedili kak je gracka kasa prazna, i ne sam prazna nek vu joj fali prek štiri milijonov ojerov. A nesmo nikaj čuli kaj bi nešči došel zvuna i spraznil gracko kaso. Ne znati kak se je to pripetilo kaj je v tak kratkomo cajto od viška zišel manjak? A još je niti ne kuplena zemla od RK Međimorke na glavnomo čakoskomo trgo. Kuliko sam mel za čuti da so večniki vu opoziciji Davor Križaič i Igor Rešetar o tomo nekaj pitali na zadjoj sesiji Grackoga veča pak bodemo bajbrž zazvedili što je to itak tak vu kratkomo cajto spraznil gracko kaso?
Prefletno smo se poveselili, z te mele se kruh ne bode jel!!!
Več sam se poveselil, a i teca Franca z menom, kak bodemo ipak zazvedili što je preljukljal gracko kaso i znosil peneze, a unda sam zazvedil isto tak kak i gracki večniki z opozicije Davor Križaič i Igor Rešetar kak je precednik grackoga veča i stari gracki političar Joža Vargov z Mačkovca vgasnol mikrofona dok so se Križaič i Rešetar žalili na gracko vlast i dok so grackim ocima postavljali teška pitanja i to kak ona kam so nestali gracki penezi tak i ona druga štera se dotikavlejo komunalnoga poduzeča Čakom. Morem vam reči da je niti eca Franca ne mogla veruvati da se to more pripetiti prinas v Čakovco kaj nešči isključi mikrofona dok oporbeni večniki govorijo ili pak da se zbriše ono kaj so pitali i ono kaj ne paše grackim ocima? Teško je nam običnim smrtnikima to za veruvati. Mam mi je palo na pamet kak je nešči vgasnol strujo Thompsono dok je popeval našim Vatrenima dok so 2018. leta donesli srebrno želencijo z Sveckoga labodoritaškoga prvenstva z Moskve. Negda smo o tomo sam čitali v novinama, a ve to imamo i prinas v Čakovco. Kaj sega bodemo doživeli od naše politike, a još vejč toga od političarov. Najgerek sam, jako sam najgerek je li se bode precednik Joža ispričal večnikima, a i Čakovčancima štere zastupa i zafalil se na funkciji štero se teži obnaša jerbo što bode jemo mogel dale veruvati??? Demokracija se podnaša sam fkajuvanje ne, a pogotovo ak te primejo!
Dragica se je ipak fčakala
Verjem da ga ne v Čakovco nikoga što ne pozna gospođo Dragico Benčik ravntelico, kak jo mi Čakovčanci i Međimorci skračeno zovemo, Specijalne škole v Čakovco. Gospa Dragica je v toj školi delala nekaj meje od tridesti let i dok je 2008. leta došla na mesto ravnatelice mam se je počela boriti za to kaj se napravi nova Specijalna škola jerbo je stara, polek III osnovne škole, bila več unda premala za se one šteri so nucali to školo, a još več stručnjake šteri so delali v joj. Zmislim se kak denes kuliko je tinte i novinskoga papera potrošeno kaj bi se zakopal temeljni kamen i kaj bi se počela delati nova škola, znuom kuliko pot je bila pre ondašnjemo grackomo načelniko Brankijo Šalamono, ali dale od toga kaj je grad Čakovec dal zemljo za to školo, i to v Martanama de je ve i škola zazidana,se je ne odišlo. Mejali so se gradonačelniki, mejali so se župani, mejali so se ministri, mejali so se premijeri, ali dale od zemle nikam. Ali kuliko vidimo gospa Dragica je ne hitila puške v kuruzo nek je saki den znova seposot kud je išla štečila peneze kaj bi nekak došla do nove škole i kaj bi oni šterima je pomoč nejbole bilo tre dobili svojega placa. Vejč od petnejst let je minulo od da so počeli spominki o novoj školi i gospa Dragica ve more mirno spati vu zasluženoj penziji jerbo so deca šteri nucajo pomoč ve imajo mesta v novoj školi. Fala čakoskoj gradonačelnici kaj je z Poveljom zafalila Dragici za se ono kaj je ona dala deci z posebnim potrebama. Gospođa Dragica fala od srca i kapa do poda! Veliko fala i nek joj dragi Božekv penziji podari dugo ,mirno i zdravo živleje. Zaslužila je! Premijero Plenkovičo čuda vejčpot bajamo nek ga falimo, ali tu mo moramo zafaliti jerbo da ga ne bilo jega ne bi bilo niti nove Specijalne škole, očem reči novoga Centra za deco z teškočama i posebnim potrebama.
Kaj je novoga v „belom“ Zagreb grado??
Ak ste se več poveselili kak so zagrebečke gracke vlasti (čitaj: Tomica i Možemosi) otpelali smetje i spraznili kante i kontejnere unda ste v kmico fritnoli. Neje zagrebečkoj grackoj vlasti do toga kaj se reši smetja po vulicama i kaj ne bodo vulice smrdele po gnilomo smetjo jim je glavneše kaj bodo mejali imena zagrebečkim vulicama.Ne bodete veruvali, ali Tomica i jegova „Družba Pere Kvržice“, štera več peto leto hercuje vu Zagrebo, je nakon štiri leti vladavine i osemdeset let od kraja Drugoga rata našla štiri „ustaše“ šterima je trelo zeti vulice jerbo to je bila nejvekša zagrebečka nevola. A to kaj so Vladimir Arko, Antun Bonifačič, Filip Lukas i Ivan Šarič ne meli nikše veze s NDH-om i ustašama to je čistam drugi par rokava. Nekaj je v Zagrebo, posle štiri leti hercuvanja, ipak trebalo premeniti. Natradali so štiri ugledni Zagrepčanci, ali je zato vulica Vladijo Ranogajco, šteri je 1945. leta poslal vu sakefele Jazovki i drugi jami cirka osemsto Zagrepčancov i to bez soda i sođenja. To se zna, ali so mo vulico ostalji. Pak nebrejo se spremeniti najempot!
Jožek Radnik