Zakaj grad Čakovec dela na ljuckom???
Nesam niti znal da mi prinas v Čakovco imamo građane prvog i drugog reda, a građani drugoga reda so poduzetnici i gospodarstvenici šteri delajo vu čakoskoj robnoj hiži Međimorka. Neso oni sam građani drugoga reda neka so interesna skupina štera oče zeti grado i građanima svoje zemlište na čakoskomo Trgo Republike, zemlište štero je okoli Robne hiže i štero je navek bilo od gazdi robne hiže. I ve me vi pitate kaj oče tua interesna skupina? Oni očejo kaj se dospomenejo z čakoskom grackom načelnicom Ljerkom Cividini i z grackim ocima, očem reči, očejo kaj bi za to zemljo dobili tuliko penez kuliko tua zemlja na glavnomo čakoskomo trgo i vredi. Nikak ne razmem zakaj je tu došlo do svaje, zakaj je tua zemla, te devecto kvadratlinov, došlo na sod?
Gradonačelnica nam je sima lepo rekla kak je ne bilo zakonskih propusta dok si je grad v gruntovnici prisvojil to zemljo, ali zakaj jeonda interesna skupina dala to na sod i gle vraga, sod je presodil i grad je dobil spora, ali mora interesnoj skupini (čitaj:gazdima placa) , štera je zgubila soda, platiti cirka 250 jezer ojerov i to cirka 160 jezer za plac, a ovo drugo so stroški suckoga postupka i kamate. Kaj vam nek rečem, mene so odnavek vučili da on šteri plača on je zgubil soda. Tak mi je rekla i teca Franca. Ali kak zgledi prinas v Međimorjo, v Čakovco je to nekak drugač.
Kak dugo bode Međimorka zaprta???
Grad i Međimorka so još navek na sodo i to na onomo visokomo, a grad je več potpisal ugovora z firmom štera je dobila posla na natječajo, a ve ne znati kak bode to zišlo, očem reči, kak bodo građevinari delali i rovali po ljuckomo hataro (čitaj: grunto). I još nekaj, interesna skupina je najgerek kak bode dugo trajalo to lišpanje glavnoga čakoskoga trga. Si pripovedajo, a tak i v ugovoro z građevinarima piše da te posel bode trajal 330 dni, a neje nišči rekel kakši so to dnevi je li so to obični dnevi ili pak radni? Najte me krivo razmeti, ali ne verjem da so garđevinari vu dneve rovanja i lišpanja trga računali oliti prebrojili sobote, nedele i ostale državne svetke, a dok se to zbroji unda to dojde debelo prek leto dni. Pitam vas, a i sebe, od čega bodo živeli poduzetniki, trgovci i jive familije to leto (a i duže) dok ga ne bode kupcov, ne bode posla, ne bode prometa, ne bode penez niti za najam, a kamoli za plače i ostale stroške. Kak smo zazvedili od interesne skupine prek dvjesto težakov v robni hiži i jive familije bodo duže od leto dni delo zobe na klin ili je mortik grad Čakovec i gradonačelnica Cividini planerala v stroške rekonstrukcije trga i plače poduzetnikov i težakov v Međimorki? Najbrž gracki oci mislijo na se?
Međimorka nikomo ne treba!? A Čakovčanci??
Gracki oci, a i si okoli jiv, dobijo svoje plače, i to ne male, čim mesec mine, a poduzetnici v Međimorki si morajo nejpredi zaslužiti plače ak jiv očejo dobiti. Nišči jim ne davle plače ak si jiv ne zslužijo. Ve kupci steška dohajajo v Međimorko jerbo je grad naheznul velike drvene kioske pred ulazna vrata, a dok bodo građevinari počeli kopati i rovati po Trgo unda ne bode nišči došel jerbo ne bode mel kud dojti i kaj bode drugo preostalo poduzetnicima (čitaj: privatnoj interesnoj družini) v Međimorki nek kaj i oni obesijo zobe na klin.
Kuliko vidimo Međimorka nikomo ne treba jerbo ga dosti štacunov na se štiri strane sveta okoli Čakovca, ali ak je več tu, a tu je duže od četrdeset let, unda i grad mora pomoči kaj ostane kak onima šteri prodavlejo tak i onima šteri kupuvlejo. Još nekaj, neje baš lepo od gradonačelnice kaj se špotari z privatnom interesnom skupinom z Međimorke jerbo te poduzetnici punijo gracko kaso: plačajo komunalno naknado, vodno naknado, spomeničko rento, a i porez od profita ide v gracko kaso. Težaki Međimorke plačjo i grackoga parking placa. Morate priznati, dok to se skup zbrojite nabere se čistam kreden kupček ojero saki mesec. Pak se z tem bormeš gradonačelnica nej smela zbrčkavati. Kuliko sam mel za čuti predi izborov je govorila kak ona bode gradonačelnica sim građanima i sim poduzetnicima, a
ve se vleče fkrej od poduzetnika z interesne skupine.
Kaj je to interesna skupina???
Pita me teca Franca kaj je to interesna skupina? Kak me je več teca pošteno pitala tak joj moram pošteno i pojasniti kaj bode i ona znala. Znate več da teco imam jako rad makar je saki den se bliže desnomo miholjanskomo brego, ali još navek me kontrolera dok premišlavlem.
Neso interesne skupine sam poduzetnici z Međimorke šteri očejo nekaj kaserati na placo šteri je jiv duže od četrdeset let i šteroga so si oni črez tulikša leta zaslužili i ak oni gledijo za svoj žep unda je ne dobro. Interesna skupina so i sake fele športaši od labudoritašov prek rokometašov, košarkašov i tak dale. Interesna skupina so i BBB kibici Dinama. Ruon tak so interesna skupina i kibici Ajduka Torcida. Interesna skupina so i krčmari, šteri nam se dražeše prodavlejo pijačo jerbo jim je v intereso kaj bodo čim vejč zaslužili, a i mi pijanci smo interesna skupina, šteri imamo čistam kontra interese od krčmarov jerbo se mi očemo napiti, ali to čim faleše. I kaj ne bodem dale nabrajal interesne skupine, ljude šteri imajo iste interese.
Ruon tak je čakoska gradonačelnica v interesnoj skupini z svojim partiskim i stranačkim pajdašima šterima je interes kaj čim duže ostanejo na vlasti. Čim duže, jeden, gva, tri ili pak još vejč mandatov. I zato političari predi izborov govorijo jeno, posle izborov čistam drugo, a dok imajo interesa unda delajo čistam treće ili pak nekaj ono kaj jim paše. I zato ne razmem zakaj političari (čitaj: čakoska gradonačelnica) štera ima svoj politički interes za šteri je jako dobro plačena pobira na red poduzetnike z druge interesne skupine, šteri se borijo za svoj posel, za svoje plače. Neje lefko dok te interesi ido jeden protiv drugih, ali tre vu sakoj „borbi“ biti korektan i boriti se za svoj interes u granicam fer pleja, a ne iti na protivnika đonom kak to dela čakoska gradonačelnica. Nejleži je na drugoga z prstom kazati, ali nesmeti pozabiti niti ono biblijsko: nek hiti kamena prvi on šteri je bez greha.
I još nekaj…
Ak bode grad Čakovec sam platil preuređenje glavnoga trga, a to je cirka 3 i pol milijonov eura unda bi gradonačelnica trela podnesti ostavko jerbo ak je za štiri leti (kuliko se svadi z Međimorkom) ne mogla to rešiti unda je ne tak dobra gradonačelnica kak nam se do ve kaže. Nebrem razmeti da gradonačelnica ima peneze v kasi, zna kaj tre kupiti unda ne razmem kaj tu sod ima za delati? A i interesna skupina je nudila nagodbo i sam so se trebali skupa sesti za stol i dospomenuti se. Pred 35 let je socijalizam odišel z Lepe naše i od unda se nebre grunt sam zeti jenomo gazdi i v gruntovnici prepisati na drugoga jerbo saki grunt ima svojega gazdo pak i jega tre nekaj pitati!
Jožek Radnik